Di Nɔmba Dɛm 29 - Krio Fɔs Oli Baybul

Di Ɔfrin Dɛn Fɔ Mek Fɔ Bigin Di Nyu Ia

¹ “Na di fɔs de pan di sɛvin mɔnt, dɛn ɔl fɔ kam gɛda we dɛn go du tin dɛn we oli. Dɛn nɔ fɔ du nɔn wok. Na de we dɛn fɔ blo trɔmpɛt dɛn nɔmɔ.

² Fɔ pul fayn sɛnt we go mek PAPA GƆD in at gladi, dɛn fɔ bɔn wan yɔŋ man kaw, wan man ship ɛn sɛvin yɔŋ man ship we dɛn nɔn nɔ fɔ gɛt bɔt as sakrifays.

³ Wit di man kaw dɛn fɔ mek sid sakrifays wit twɛnti-fo kɔp fayn flawa we dɛn miks wit ɔyl; wit di man ship i fɔ bi sikstin kɔp flawa miks wit ɔyl;

⁴ ɛn wit ɔl di sɛvin yɔŋ ship, na et kɔp fɔ miks wit ɔyl; fɔ ɛni wan pan dɛn.

⁵ Dɛn fɔ mek wan man got de de we go bi sin sakrifays. Dɛn go tek am fɔ beg padin fɔ dɛn sin.

⁶ Ɔl dis ad to di sakrifays we dɛn kin bɔn ɛvri mɔnt ɛn ɛvride wit di sid sakrifays ɛn drink sakrifays we dɛn fɔ mek. Dɛn na sakrifays we dɛn de mek to PAPA GƆD na faya fɔ lɛ i pul fayn sɛnt fɔ mek i gladi.

Ɔfrin Dɛn Fɔ Mek Di Big De We Na Fɔ Fɔgiv Sin

⁷ “Di tɛn de na di sɛvin mɔnt, na di de we dɛn fɔ fast. Dɛn fɔ lɛ ɔlman gɛda fɔ du tin dɛn we oli ɛn nɔ fɔ wok.

⁸ Dɛn fɔ bɔn as sakrifays wan yɔŋ man kaw, wan man ship ɛn sɛvin yɔŋ man ship we ol wan ia fɔ mek i pul fayn sɛnt we go mek PAPA GƆD gladi. Dɛn nɔn nɔ fɔ gɛt bɔt.

⁹ Wit di man kaw dɛn fɔ mek sid sakrifays wit twɛnti-fo kɔp fayn flawa we dɛn miks wit ɔyl; wit di man ship, sikstin kɔp fayn flawa miks wit ɔyl,

¹⁰ ɛn wit ɔl di sɛvin yɔŋ ship, na et kɔp fayn flawa miks wit ɔyl de go wit ɛniwan pan dɛn.

¹¹ Dɛn fɔ put wan got de fɔ sin sakrifays plɔs di ɔda sin sakrifays we dɛn de tek fɔ beg padin. Ɔl fɔ ad to di sakrifays dɛn we dɛn de bɔn ɔltɛm wit dɛn sid sakrifays ɛn dɛn drink sakrifays.

Di Ɔfrin We Dɛn Fɔ Mek Di Tɛm We Dɛn Tap Na Bafa

¹² “Di fiftin de na di sɛvin mɔnt, dɛn fɔ gɛda ɔlman mek dɛn du dɛn tin we oli, dɛn nɔ fɔ du nɔn pan dɛn ɛvride wok. Dɛn fɔ sɛlibret fɔ sɛvin de to PAPA GƆD.

¹³ Dɛn fɔ mek sakrifays na faya to PAPA GƆD we go pul fayn sɛnt fɔ mek i gladi. Dɛn fɔ bɔn tɔtin yɔŋ man kaw, tu man ship ɛn fotin yɔŋ man ship we fɔ ol wan ia, ɛn dɛn nɔ fɔ gɛt wan bɔt.

¹⁴ Wit ɔl tɔtin di man kaw, dɛn fɔ gi dɛn wit lɛkɛ twɛnti-fo kɔp fayn flawa we dɛn miks wit ɔyl; wit ɔltu di man ship, i fɔ bi sikstin kɔp fayn flawa miks wit ɔyl;

¹⁵ ɛn wit ɔl di fotin yɔŋ ship na et kɔp fayn flawa fɔ miks wit ɔyl.

¹⁶ Dɛn fɔ put wan man got de as sin sakrifays. Dat fɔ ad to di sakrifays we dɛn de bɔn ɔltɛm wit dɛn sid sakrifays ɛn dɛn drink sakrifays dɛn.

¹⁷ “Di de we mek tu pan di sɛvin de, dɛn fɔ bɔn twɛlv yɔŋ man kaw, tu man ship ɛn fotin yɔŋ manship we fɔ ol wan ia, ɛn dɛn nɔ fɔ gɛt bɔt pan dɛn.

¹⁸ Dɛn fɔ mek di sid sakrifays ɛn di drink sakrifays dɛn lɛk aw i fɔ bi wit di man kaw dɛn, di man ship dɛn ɛn di yɔŋ ship dɛn, bay di nɔmba we i fɔ bi.

¹⁹ Dɛn fɔ put wan man got de as sin sakrifays. Dat fɔ ad to di sakrifays we dɛn kin bɔn ɛvride wit in sid sakrifays ɛn dɛn drink sakrifays.

²⁰ “Di de we mek tri pan di sɛvin de, dɛn fɔ bɔn ilɛvin man kaw, tu man ship ɛn fotin yɔŋ man ship we fɔ ol wan ia ɛn dɛn nɔn nɔ fɔ gɛt bɔt.

²¹ Dɛn fɔ mek di sid sakrifays ɛn di drink sakrifays dɛn lɛk aw i fɔ bi wit di man kaw dɛn, di manship dɛn ɛn di yɔŋ man ship dɛn bay di nɔmba we i fɔ bi.

²² Dɛn fɔ put wan man got de as sin sakrifays. Dat fɔ ad to di sakrifays we dɛn kin bɔn ɛvride wit in sid sakrifays ɛn drink sakrifays.

²³ “Di de we mek fo pan di sɛvin de, dɛn fɔ bɔn tɛn man kaw, tu man ship ɛn fotin yɔŋ man ship we ol wan ia, ɛn dɛn nɔ fɔ gɛt bɔt.

²⁴ Dɛn fɔ mek di sid sakrifays ɛn di drink sakrifays dɛn lɛk aw i fɔ bi wit di man kaw dɛn, di man ship dɛn ɛn di yɔŋ man ship dɛn bay di nɔmba we i fɔ bi.

²⁵ Dɛn fɔ put wan man got de as sin sakrifays. Dat fɔ ad to di sakrifays we dɛn kin bɔn ɛvride wit in sid sakrifays ɛn drink sakrifays.

²⁶ Di de we mek fayv pan di sɛvin de, dɛn fɔ bɔn nayn man kaw, tu man ship ɛn fotin yɔŋ man ship we ol wan ia, ɛn dɛn nɔ fɔ gɛt bɔt.

²⁷ Dɛn fɔ mek di sid sakrifays ɛn di drink sakrifays dɛn lɛk aw i fɔ bi wit di man kaw dɛn, di man ship dɛn ɛn di yɔŋ man ship dɛn bay di nɔmba we i fɔ bi.

²⁸ Dɛn fɔ put wan man got de as sin sakrifays. Dat fɔ ad to di sakrifays we dɛn kin bɔn ɛvride wit in sid sakrifays ɛn drink sakrifays.

²⁹ “Di de we mek siks, pan di sɛvin de, dɛn fɔ bɔn et man kaw, tu man ship ɛn fotin yɔŋ man ship we ol wan ia, ɛn dɛn nɔ fɔ gɛt bɔt.

³⁰ Dɛn fɔ mek di sid sakrifays ɛn di drink sakrifays dɛn lɛk aw i fɔ bi wit di man kaw dɛn, di man ship dɛn ɛn di yɔŋ man ship dɛn bay di nɔmba we i fɔ bi.

³¹ Dɛn fɔ put wan man got de as sin sakrifays fɔ ad to di sakrifays we dɛn kin bɔn ɛvride wit in sid sakrifays ɛn drink sakrifays.

³² “Di de we mek sɛvin, dɛn fɔ bɔn sɛvin man kaw, tu man ship ɛn fotin yɔŋ man ship we ol wan ia, ɛn dɛn nɔ fɔ gɛt bɔt.

³³ Dɛn fɔ mek di sid sakrifays ɛn di drink sakrifays dɛn lɛk aw i fɔ bi wit di man kaw dɛn, di man ship dɛn ɛn di yɔŋ man ship dɛn.

³⁴ Dɛn fɔ put wan man got de as sin sakrifays. Dat fɔ ad to di sakrifays we dɛn kin bɔn ɛvride wit in sid sakrifays ɛn drink sakrifays.

³⁵ “Di de we mek et, dɛn ɔl gɛda wan ples ɛn dɛn nɔ fɔ du wok.

³⁶ Dɛn fɔ bɔn wan man kaw, wan man ship ɛn sɛvin yɔŋ man ship we ol wan ia as sakrifays na faya to PAPA GƆD fɔ mek i pul fayn sɛnt we go mek i gladi. Dɛn nɔn nɔ fɔ gɛt bɔt.

³⁷ Dɛn fɔ mek di sid sakrifays ɛn di drink sakrifays aw i fɔ bi wit di man kaw, di man ship ɛn di yɔŋ ship dɛn bay di nɔmba we i fɔ bi.

³⁸ Dɛn fɔ put wan man got as sin sakrifays. Dat fɔ ad to di sakrifays we dɛn kin bɔn ɛvride wit in sid sakrifays ɛn drink sakrifays.

³⁹ Dɛn fɔ mek dɛn sakrifays ya to PAPA GƆD wɛn dɛn gɛt dɛn spɛshal gladi-gladi. Di wan we na fɔ bɔn, di sid sakrifays, di drink sakrifays ɛn di pis sakrifays. Dɛn ɔl fɔ ad to wetin dɛn bin dɔn se dɛn go du ɛn ɛni ɔda wan we dɛn fil fɔ mek.

⁴⁰ Mozis tɛl di Izrɛlayt dɛn ɔl wetin PAPA GƆD tɛl am.