Di Nɔmba Dɛm 28 - Krio Fɔs Oli Baybul

Di Kayn Tin Dɛn We Fɔ Gi As Ɔfrin Ɔltɛm

¹ PAPA GƆD tɛl Mozis se,

² “Gi di Izrɛlayt dɛn dis ɔda. Tɛl dɛn se dɛn fɔ mek shɔ se di tɛm we a dɔn se, nain dɛn fɔ bɔn it as sakrifays to mi we go pul fayn sɛnt we go mek a gladi.

³ Tɛl dɛn se na di sakrifays dis we dɛn fɔ gi PAPA GƆD: ɛvride, dɛn fɔ gi tu yɔŋ manship we ol wan ia ɛn nɔ gɛt wan bɔt.

⁴ Fɔ mek wan yɔŋ ship na mɔnin ɛn di ɔda wan ivintɛm

⁵ wit lɛkɛ et kɔp fayn flawa we dɛn miks wit lɛkɛ wan ɛn af paynt ɔyl we dɛn pul frɔm ɔliv.

⁶ Na di sakrifays dis we fɔ bɔn ɔltɛm we dɛn bin dɔn bigin na Mawnt Saynay as sakrifays to PAPA GƆD na faya we fɔ pul fayn sɛnt we go mek PAPA GƆD gladi.

⁷ Di drink we fɔ go wit am as sakrifays fɔ bi lɛkɛ wan paynt so ɔf ɛni drink we de mek pɔsin drɔnk fɔ ɛni wan yɔŋ ship. Fɔ tɔn di drink bifo PAPA GƆD na di ples we oli pas ɔl.

⁸ Dɛn fɔ mek di sɛkɛn yɔŋ ship ivintɛm we go tan lɛk di sid sakrifays we dɛn bin dɔn mek na mɔnin wit insɛf yon drink sakrifays ɛn dɛn fɔ bi sakrifays we dɛn bɔn na faya fɔ pul fayn sɛnt we go mek PAPA GƆD gladi.

Di Ɔfrin We Fɔ Mek Di De We Mek Sɛvin We Fɔ Blo

⁹ We di de we mek sɛvin de kam, dat na di de fɔ blo, dɛn fɔ mek sakrifays wit tu yɔŋ manship we ol wan ia ɛn nɔ gɛt wan bɔt, togɛda wit in drink sakrifays ɛn di sid sakrifays we na lɛkɛ sikstin kɔp fayn flawa miks wit ɔyl.

¹⁰ Ɛnitɛm we di de we mek sɛvin de kam, dat na di de fɔ blo, na dis dɛn fɔ de mek as sakrifays wit di nɔmal sakrifays we dɛn de bɔn ɔltɛm ɛn in drink sakrifays.

Di Ɔfrin We Dɛn Fɔ Mek Di Fɔs De Na Di Mɔnt

¹¹ Di fɔs de na ɛvri mɔnt na fɔ mek sakrifays. Di sakrifays fɔ bi tu yɔŋ man kaw, wan man ship ɛn sɛvin yɔŋ man ship we ol wan ia. Dɛn ɔl nɔ fɔ gɛt wan bɔt.

¹² Fɔ ɛni man kaw, dɛn fɔ mek di sakrifays wit in sid sakrifays we fɔ bi lɛkɛ twɛnti-fo kɔp fayn flawa we dɛn miks wit ɔyl;

¹³ wit ɛni wan pan di yɔŋ ship dɛn, dɛn fɔ mek lɛkɛ et kɔp fayn flawa as sid sakrifays miks wit ɔyl. Dis na fɔ bɔn am as sakrifays to PAPA GƆD na faya mek i go pul fayn sɛnt we go mek PAPA GƆD gladi.

¹⁴ Wit ɛni man kaw, dɛn fɔ mek drink sakrifays we fɔ bi lɛkɛ tri paynt wayn: wit di man ship i fɔ bi lɛkɛ tu ɛn af paynt ɛn wit ɛni yɔŋ ship, i fɔ bi lɛkɛ wan ɛn af paynt. Dis nain dɛn fɔ bɔn as sakrifays ɛni mɔnt ɛn dɛn fɔ mek am na ɔl di nyu mun dɛn na di ia.

¹⁵ Apat frɔm di sakrifays we dɛn de bɔn ɔltɛm wit in drink sakrifays, dɛn fɔ gi PAPA GƆD wan man got we fɔ bi sin sakrifays

Di Ɔfrin We Dɛn Fɔ Mek Na Di Fɛstival We Dɛn Nɔ De It Bred Wit Yist

¹⁶ Dɛn fɔ sɛlibret di Pasova Fɛstival na fɔ ɔna mi di fotin de na di fɔs mɔnt.

¹⁷ Di fiftin de dɛn fɔ mek gladi-gladi we dɛn fɔ it bred we nɔ gɛt yist fɔ sɛvin de.

¹⁸ Di fɔs de, dɛn ɔl fɔ kam togɛda ɛn du tin dɛn we oli. Dɛn nɔ fɔ du dɛn nɔmal wok we dɛn kin du ɛvride.

¹⁹ Dɛn fɔ bɔn tu yɔŋ man kaw, wan man ship ɛn sɛvin yɔŋ man ship as sakrifays na faya to PAPA GƆD. Dɛn ɔl nɔ fɔ gɛt wan bɔt.

²⁰ Wit ɛniwan pan di man kaw dɛn, dɛn fɔ mek lɛkɛ twɛnti-fo kɔp fayn flawa we miks wit ɔyl, wit di man ship, na sikstin kɔp fayn flawa fɔ miks wit ɔyl fɔ ich wan,

²¹ ɛn wit di sɛvin yɔŋ ship na et kɔp fayn flawa fɔ miks wit ɔyl fɔ ich wan.

²² Dɛn fɔ mek shɔ se dɛn put wan man got we fɔ bi sin sakrifays fɔ yuz fɔ beg padin fɔ dɛn sin.

²³ Ɔl dɛn sakrifays ya fɔ ad to di sakrifays we dɛn kin bɔn ɛvri mɔnin.

²⁴ Na so dɛn go de mek di it we na sakrifays na faya fɔ di sɛvin de to PAPA GƆD we go pul fayn sɛnt we go mek i gladi.

²⁵ Di de we mek sɛvin dɛn fɔ gɛda bak ɛn du tin dɛn we oli. Dɛn nɔ fɔ du ɛni wok we dɛn de du ɛvride.

Di Ɔfrin We Dɛn Fɔ Mek Fɔ Sɛlibret Dɛn Avɛst

²⁶ “Wɛn dɛn de gi PAPA GƆD dɛn sakrifays, di de we dɛn avɛst di fɔs tin dɛn we gro, ɛn dɛn de mek fɛstival fɔseka dat, dɛn fɔ mek ɔlman gɛda ɛn du di tin dɛn we oli. Dɛn nɔ fɔ du nɔn wok, da de de.

²⁷ Dɛn fɔ bɔn tu yɔŋ man kaw, wan man ship ɛn sɛvin yɔŋ man ship as sakrifays we fɔ pul fayn sɛnt we go mek PAPA GƆD gladi.

²⁸ Wit ɛni wan pan di man kaw dɛn, dɛn fɔ mek lɛkɛ twɛnti-fo kɔp fayn flawa we miks wit ɔyl, wit di man ship na sikstin kɔp fayn flawa fɔ miks wit ɔyl;

²⁹ ɛn wit di sɛvin yɔŋ ship, na et kɔp fayn flawa fɔ miks wit ɔyl.

³⁰ “Dɛn fɔ put wan man got de fɔ tek fɔ beg fɔ padin.

³¹ Dɛn fɔ mek dɛn ɔl wit dɛn drink sakrifays ɛn dɛn fɔ ad to di nɔmal sakrifays we dɛn kin bɔn ɛvride ɛn di sid sakrifays. Dɛn fɔ mek shɔ se nɔn pan di animal dɛn nɔ gɛt bɔt.