Di Nɔmba Dɛm 27 - Krio Fɔs Oli Baybul

Zɛlofead In Gyal Pikin Dɛn

¹ Zɛlofead in gyal pikin dɛn kɔmɔt na Josɛf in fambul layn bay Manasɛ we na Josɛf in bɔypikin. Zɛlofead in papa na Ifa we na Giliad in bɔypikin ɛn Maka we na Manasɛ in bɔypikin na bin in grampa. Di gyal pikin dɛn nem Mala, Noa, Ɔgla, Milka ɛn Tiza.

² Wande dɛn go mit Mozis ɛn Ɛlieza we na man we de mek sakrifays fɔ pipul sin, wit di bigman dɛn na Izrɛl na di Tɛnt usay dɛn kin mit PAPA GƆD in domɔt usay ɔlman de.

³ Dɛn tɛl am se dɛn papa day na di ɛmti land we pɔsin nɔ go ebul tap, bɔt nɔto bin wan pan Kora in kɔmpin dɛn we jɔyn gɛŋ fɔ mek rebɛl pan PAPA GƆD. Dɛn se dɛn papa day fɔ in yon sin ɛn nɔ lɛf ɛni bɔypikin.

⁴ Dɛn se if bikɔs dɛn papa nɔ gɛt bɔypikin in nem fɔ day. Dɛn aks se dɛn fɔ gɛt pan di prɔpati we dɛn papa in famili fɔ gɛt.

⁵ So Mozis tɛl PAPA GƆD bɔt dɛn kes

⁶ ɛn PAPA GƆD tɛl am se,

⁷ wetin Zɛlofead in gyal pikin dɛn se na tru. I tɛl Mozis se i fɔ gi dɛn pan di prɔpati we i de gi in papa in pipul dɛn ɛn gi dɛn papa in yon prɔpati to dɛn.

⁸ PAPA GƆD tɛl Mozis fɔ tɛl di Izrɛlayt dɛn se, “If man day we nɔ gɛt bɔypikin dɛn fɔ gi in prɔpati to in gyal pikin.

⁹ If i nɔ gɛt gyal pikin, dɛn fɔ gi in prɔpati to in brɔda dɛn.

¹⁰ If i nɔ gɛt brɔda dɛn, dɛn fɔ gi in prɔpati to in papa in brɔda dɛn.

¹¹ If in papa nɔ gɛt brɔda dɛn, dɛn fɔ gi in prɔpati to di fambul we klos pas ɔl, mek i tek am fɔ in yon.” Dis fɔ bi lɔ fɔ ɔl di Izrɛlayt dɛn jɛs lɛkɛ aw PAPA GƆD tɛl Mozis.

PAPA GƆD Pik Jɔshwa Fɔ Tek Mozis In Ples

¹² PAPA GƆD tɛl Mozis se, “Klem ɔp dis mawnten na Abarim, ɛn luk di land we a dɔn gi di Izrɛlayt.

¹³ We yu dɔn luk am dɔn, yusɛf go day lɛk yu brɔda, Erɔn,

¹⁴ bikɔs wɛn di Izrɛlayt kɔmyuniti barɔf pan mi na di wata dɛn na di di ɛmti land we pɔsin nɔ go ebul tap na Zin, una ɔltu nɔ du wetin a se, we bin fɔ lɛ una sho dɛn se mi na Oli GƆD. Dis bin apin na di wata dɛn na Mɛriba we de na Kedɛsh insay di ɛmti land we pɔsin nɔ go ebul tap na Zin.

¹⁵ Mozis tel PAPA GƆD se,

¹⁶ “Duya mek PAPA GƆD we sabi aw ɔlman tan pik sɔmbɔdi fɔ bi bɔs fɔ dɛn pipul ya,

¹⁷ sɔmbɔdi we go kɛr dɛn go usay fɔ go ɛn briŋ dɛn kam usay dɛn fɔ de so dat PAPA GƆD in pipul dɛn nɔ go tan lɛk ship we nɔ gɛt udat de mɛn am.

¹⁸ PAPA GƆD tɛl Mozis se, “Tek Jɔshwa we na Nɔn in bɔypikin, na man we gɛt PAPA GƆD in spirit insay am ɛn put yu an nain ed.

¹⁹ Mek lɛ i tinap bifo Ɛlieza we na di man we de mek sakrifays fɔ pipul sin ɛn di wanol kɔmyuniti fɔ mek i no se nain gɛt fɔ lid di pipul dɛn naw.

²⁰ Gi am sɔm pan di pawa we yu gɛt so dat di wanol Izrɛlayt kɔmyuniti go du wetin i tɛl dɛn fɔ du.

²¹ I fɔ tinap bifo Ɛlieza we na di man we de mek sakrifays fɔ pipul sin dɔn in go yuz di Yurim ɛn aks PAPA GƆD wetin i want am fɔ du. Na we PAPA GƆD se dɛn fɔ go nain dɛn fɔ go ɛn we PAPA GƆD se dɛn fɔ kam, nain dɛn fɔ kam.

²² Mozis du wetin PAPA GƆD se. I mek Jɔshwa tinap bifo Ɛlieza, we na di man we de mek sakrifays fɔ pipul sin ɛn di wanol kɔmyuniti.

²³ Dɔn i put in an nain ed ɛn mek i no se in na di pipul dɛn lida naw, jɛs lɛkɛ aw PAPA GƆD bin tɛl Mozis se dɛn fɔ du.