Di Nɔmba Dɛm 26 - Krio Fɔs Oli Baybul

Di Sɛkɛn Tɛm We Dɛn Kɔnt

¹ Wɛn di bad bad sik we bin de kil pipul dɔn dɔn, PAPA GƆD tɛl Mozis ɛn Ɛlieza we na Erɔn we na di man we bin de mek sakrifays fɔ pipul sin, in bɔypikin se,

² “Kɔnt ɔlman na wanol Izrɛl, we dɔn ol twɛnti ia, we go ebul fɔ jɔyn di ami, bay dɛn famili.

³ So aw dɛn de na di flat grɔn na Moab, nia Riva Jɔdan we yu krɔs kɔmɔt Jɛriko, nain Mozis ɛn Ɛlieza we na man we de mek sakrifays fɔ pipul sin tɔk to dɛn ɔl ɛn tɛl dɛn se

⁴ fɔ kɔnt ɔl di man dɛn we dɔn ol twɛnti ia jɛs lɛkɛ aw PAPA GƆD se. Na di Izrɛlayt dɛn dis we kɔmɔt na Ijipt.

⁵ Di wan dɛn we kɔmɔt na Rubɛn, di fɔs-bɔy-pikin na Izrɛl in fambul layn na bay Anɔk, dat na di Anɔkayt; bay Palu, dat na di Paluayt,

⁶ bay Ɛzrɔn, dat na di Ɛzrɔnayt; bay Kami, dat na di Kamiayt.

⁷ Na di pipul dɛn dis we kɔmɔt na Rubɛn in fambul. Na 43,730 dɛn kɔnt.

⁸ Ɛliab na bin Palu in bɔypikin,

⁹ dɔn Ɛliab in yon bɔypikin dɛn na Nɛmyuɛl, Detan ɛn Abiram. Dis na di sem Detan ɛn Abiram we na lida na dɛn kɔmyuniti ɛn we bin mek kuskas pan Mozis ɛn Erɔn. Dɛn bin jɔyn gɛŋ wit Kora fɔ barɔf pan PAPA GƆD.

¹⁰ Di grɔn bin opin ɛn swɛla dɛn wit Kora we faya bɔn di tu ɔndrɛd ɛn fifti man we fala am. Dis na bin sayn fɔ wɔn ɔl di Izrɛlayt dɛn.

¹¹ Bɔt nɔto ɔlman day pan Kora in famili.

¹² Di wan dɛn we kɔmɔt na Simiɔn in fambul layn na: bay Nɛmyuɛl, dat na di Nɛmyuɛlayt; bay Jamin, dat na di Jaminayt; bay Jakin dat na di Jakinayt;

¹³ bay Zira, dat na Ziraayt, bay Shaul, dat na di Shaulayt.

¹⁴ Na di pipul dɛn dis we kɔmɔt na Simiɔn in fambul layn. Na 22,200 dɛn kɔnt.

¹⁵ Di wan dɛn we kɔmɔt na Gad in fambul layn na bay Zɛfɔn, dat na di Zɛfɔnayt; bay Agi, dat na di Agayt; bay Shuni, dat na di Shunayt;

¹⁶ bay Ozni, dat na di Oznayt, bay Eri, dat na di Erayt;

¹⁷ bay Arodi, dat na di Arodayt; bay Areli, dat na di Arelayt.

¹⁸ Na dɛn pipul ya kɔmɔt na Gad in fambul layn. Na 40,500 dɛn kɔnt.

¹⁹ E ɛn Onan na bin Juda in bɔypikin dɛn bɔt dɛn bin day na Kenan.

²⁰ Di wan dɛn we kɔmɔt na Juda in fambul layn na: bay Shila, dat na di Shilanayt; bay Pɛrɛz, dat na di Pɛrɛzayt; bay Zira, dat na di Ziraayt.

²¹ Di wan dɛn we kɔmɔt na Pɛrɛz in fambul layn na: bay Ɛzrɔn, dat na di Ɛzrɔnayt; bay Amul, dat na di Amulayt.

²² Na di pipul dɛn dis we kɔmɔt na Juda in fambul layn. Na 76,500 dɛn kɔnt.

²³ Di wan dɛn we kɔmɔt na Isaka in fambul layn na: bay Tola, dat na di Tolayt; bay Pua, dat na di Puayt;

²⁴ bay Jashɔb, dat na di Jashɔbayt; bay Shimrɔn, dat na di Shimrɔnayt.

²⁵ Na di pipul dɛn dis we kɔmɔt na Isaka in fambul layn na 64,300 dɛn kɔnt.

²⁶ Di wan dɛn we kɔmɔt na Zɛbyulɔn in fambul layn na: bay Serɛd, dat na di Serɛdayt; bay Ilɔn, dat na di Ilɔnayt; bay Jalil, dat na di Jalilayt.

²⁷ Na di pipul dɛn dis we kɔmɔt na Zɛbyulɔn in fambul layn. Na 60,500 dɛn kɔnt.

²⁸ Di wan dɛn we kɔmɔt na Josɛf in fambul layn bay Manasɛ ɛn Ifrem na:

²⁹ Di wan dɛn we kɔmɔt bay Manasɛ na: bay Maka we bɔn Giliad, dat na di Makarayt; bay Giliad, dat na di Giliadayt.

³⁰ Na dɛn wan ya kɔmɔt na Giliad in fambul layn bay Iɛza, dat na Iɛzarayt; bay Ɛlɛk, dat na di Ɛlɛkayt,

³¹ bay Asriɛl, dat na di Asriɛlayt; bay Shɛkɛm, dat na di Shɛkɛmayt,

³² bay Shɛmida, dat na Shɛmidayt; bay Ifa, dat na di Ifarayt.

³³ Zɛlofead we na bin Ifa in bɔypikin nɔ bin bɔn ɛni bɔypikin; na gyal pikin dɛn nɔmɔ i bin gɛt we dɛn nem dɛn na Mala, Noa, Ɔgla, Milka ɛn Tiza.

³⁴ Na di pipul dɛn dis we kɔmɔt na Manasɛ in famili. Na 52,700 dɛn kɔnt.

³⁵ Na di wan dɛn we kɔmɔt to Ifrem dis: bay Shutela, dat na di Shuthelayt, bay Bɛka, dat na di Bɛkarayt; bay Taan, dat na di Taanayt.

³⁶ Dɛn wan ya kɔmɔt na Shutela in fambul layn bay Eran, dat na di Eranayt.

³⁷ Na di pipul dɛn dis we kɔmɔt na Ifrem in famili. Na 32,500 dɛn kɔnt. Na dɛn pipul ya kɔmɔt na Josɛf in fambul layn bay udat dɛn kɔmɔt to.

³⁸ Di wan dɛn we kɔmɔt na Bɛnjamin in fambul layn na: bay Bela, dat na di Belayt; bay Ashbɛl, dat na di Ashbɛlayt; bay Airam, dat na di Airamayt;

³⁹ bay Shufam; dat na di Shufamayt; bay Ufam, dat na di Ufamayt.

⁴⁰ Di wan dɛn we kɔmɔt to Bela bay Ad ɛn Neman na: bay Ad, dat na di Adayt dɛm; bay Neman, dat na di Neamayt dɛm.

⁴¹ Na di pipul dɛn dis we kɔmɔt na Bɛnjamin in fambul layn; na 45,600 dɛn kɔnt.

⁴² Di wan dɛn we kɔmɔt na Dan in fambul layn na: bay Shuam, dat na di Shuamayt. Na dɛn nɔmɔ.

⁴³ Ɔl di pipul dɛn we kɔmɔt na Dan in fambul layn na Shuamayt; na 64,400 dɛn kɔnt.

⁴⁴ Di wan dɛn we kɔmɔt na Asha in fambul layn na: bay Imna, dat na di Imnayt, bay Ishva, dat na di Ishvayt; bay Bɛraya, dat na di Bɛraayt;

⁴⁵ dɔn di wan dɛn we kɔmɔt to Bɛraya: bay Eba dat na di Ebarayt; bay di Malkiɛl, dat na di Malkiɛlayt.

⁴⁶ Asha bin gɛt wan gyal pikin we nem Sera.

⁴⁷ Na di pipul dɛn dis we kɔmɔt na Asha in fambul layn; na 53,400 dɛn kɔnt.

⁴⁸ Di wan dɛn we kɔmɔt na Naftali in fambul layn na: bay Jazil, dat na di Jazilayt; bay Guni, dat na di Gunayt;

⁴⁹ bay Jeza, dat na di Jezarayt; bay Shilɛm, dat na di Shilɛmayt.

⁵⁰ Na di pipul dɛn dis we kɔmɔt na Naftali in fambul layn: na 45,400 dɛn kɔnt.

⁵¹ Ɔl ɛn ɔl, di man dɛn na Izrɛl we dɛn kɔnt na 601,730.

⁵² PAPA GƆD tɛl Mozis se,

⁵³ na bay di nɔmba we ɛni wan fambul gɛt fɔ sheb di land we fɔ bi dɛn prɔpati.

⁵⁴ Di grup we big fɔ gɛt big prɔpati, ɛn di wan we smɔl fɔ gɛt smɔl prɔpati: ɔlman fɔ gɛt prɔpati bay di nɔmba we dɛn kɔnt.

⁵⁵ Dɔn aks PAPA GƆD fɔ sho dɔn aw fɔ sheb di land. Wetin ɛni grup gɛt go de bay di nem ɔf di fambul layn we i kɔmɔt.

⁵⁶ Dɔn naw dɛn fɔ sheb di prɔpati bay udat de na big grup ɔ na smɔl grup bay aw PAPA GƆD sho dɛn.

⁵⁷ Na di Livayt dɛn dis we dɛn kɔnt bay dɛn famili bay Gashɔn, dat na di Gashɔnayt; bay Koath, dat na di Koathayt; bay Mɛrari, dat na di Mɛrarayt.

⁵⁸ Dɛn wan ya sɛf na bin di Livayt fambul: di Libnayt, di Ɛbrɔnayt di Maliayt, di Mushayt, di Koraayt, Koath na bin di grampa fɔ Amram;

⁵⁹ Amram in wɛf bin nem Jokibad, wan pan Livay in jɛnareshɔn dɛn we wan Livayt bin bɔn na Ijipt. Amram bɔn Erɔn, Mozis ɛn dɛn sista Miriam.

⁶⁰ Erɔn na bin Papa fɔ Nadab ɛn Abiu, Ɛlieza ɛn Ithama.

⁶¹ Bɔt Nadab ɛn Abiu bin day we dɛn mek sakrifays to PAPA GƆD wit faya we nɔ bin fayn fɔ am.

⁶² Ɔl di man Livayt dɛn we bin dɔn ol wan mɔnt we dɛn kɔnt na 23,000. Dɛn nɔ bin miks dɛn we dɛn de kɔnt di ɔda Izrɛlayt bikɔs dɛn nɔ gɛt fɔ gɛt pan di prɔpati we dɛn de sheb.

⁶³ Ɔl dɛn pipul ya na di wan dɛn we Mozis ɛn Ɛlieza di man we de mek sakrifays fɔ pipul sin, kɔnt we dɛn bin de na di flat grɔn na Moab nia Jɔdan, we yu krɔs kɔmɔt Jɛriko.

⁶⁴ Nɔn pan dɛn nɔ bin de di tɛm we Mozis ɛn Erɔn, di man we bin de mek sakrifays fɔ pipul sin, bin kɔnt di Izrɛlayt na di ɛmti land we pɔsin nɔ go ebul tap na Saynay.

⁶⁵ Bikɔs PAPA GƆD bin dɔn tɛl dɛn se dɛn go mɔs day na di ɛmti land we pɔsin nɔ go ebul tap; so nɔn nɔ bin lɛf pas Kelɛb we na Jɛfunɛ in bɔypikin ɛn Jɔshwa we na Nɔn in yon bɔypikin.