Di Nɔmba Dɛm 25 - Krio Fɔs Oli Baybul

Di Izrɛlayt Dɛn De Na Peɔ

¹ Di tɛm we di Izrɛlayt dɛn bin tap na di Akeshia Vali, di man dɛn bigin gɛt biznɛs wit di Moabayt uman dɛn

² we kin de kɔl dɛn fɔ go na di sakrifays we dɛn bin de mek to dɛn yon gɔd dɛn. Di Izrɛlayt dɛn kin it ɛn ivin pre to dɛn gɔd dɛn de.

³ Na so dɛn tek jɔyn an fɔ wɔship Baal we de na Peɔ. Dat mek PAPA GƆD vɛks bad bad wan pan dɛn.

⁴ PAPA GƆD, tɛl Mozis se, “Kil ɔl di lida dɛn ɛn sho dɛn gbanbaode bifo PAPA GƆD, santɛm, so dat PAPA GƆD in at go kol ɛn i nɔ go vɛks bad bad wan igen pan di Izrɛlayt dɛn.

⁵ So Mozis tɛl di jɔj dɛn se dɛn fɔ kil ɔl dɛn man dɛn we jɔyn an fɔ wɔship Baal we de na Peɔ.

⁶ We dɛn ɔl de de na di Tɛnt usay dɛn kin mit PAPA GƆD in domɔt de kray bɔt wetin dɛn yɛri, nain wan Izrɛlayt man kɛr in Midianayt uman go insay in tɛnt.

⁷ We Finɛas we na Ɛlieza in bɔypikin ɛn Erɔn in grampikin si dat, i nɔ du wan, i nɔ du tu; i jɛs grap lɛf ɔlman, tek in spia

⁸ ɛn fala dɛn go insay di tɛnt. I chuk dɛn ɔltu. Di spia pas pan di man go insay di uman ɛn kɔmɔt na do. Na so di bad bad sik we bin dɔn bigin kil di Izrɛlayt dɛn tek dɔn;

⁹ dis bad bad sik bin dɔn kil 24,000 pipul.

¹⁰ PAPA GƆD tɛl Mozis se,

¹¹ “Na Finɛas we na Ɛlieza in bɔypikin ɛn Erɔn in grampikin mek mi at kol; bikɔs i bin gɛt maynd ɛn nɔ want fɔ mek a gɛt bad nem so dat a nɔ go kil dɛn fɔseka mi traŋa at,

¹² a de mek mi pis Kɔvinant wit am.

¹³ Sote go, in ɛn in jɛnareshɔn go bi man dɛn we go de mek sakrifays fɔ pipul sin dɛn bikɔs i gɛt maynd nɔ fɔ gi mi bad nem ɛn so i ebul beg fɔ mek a padin di Izrɛlayt dɛn.

¹⁴ Di Izrɛlayt we i kil wit di Midianayt uman nem Zimray. In na Salu in bɔypikin ɛn lida fɔ di Simiɔnayt fambul.

¹⁵ Di Midianayt uman in nem Kɔzbi we na Zɔ in gyal pikin ɛn na bin chif fɔ wan trayb na wan Midianayt famili.

¹⁶ PAPA GƆD tɛl Mozis se,

¹⁷ “Trit di Midianayt dɛn lɛkɛ ɛnimi ɛn kil dɛn ɔl

¹⁸ bikɔs dɛn bin trit yu lɛk ɛnimi wɛn dɛn mek una ful na Peɔ ɛn bikɔs ɔf dɛn sista we na Kɔzbi, we na wan pan di Midianayt lida in gyal pikin we dɛn bin kil bikɔs ɔf aw una bin de biev na Peɔ.