Di Nɔmba Dɛm 24 - Krio Fɔs Oli Baybul

¹ We Belam si se PAPA GƆD in at gladi fɔ blɛs Izrɛl, i nɔ bɔda fɔ lukgrɔn lɛkɛ aw i bin de du, i jɛs tɔn in fes de luk na di ɛmti land we pɔsin nɔ go ebul tap.

² Wɛn Belam luk de i si di Izrɛlayt dɛn de na dɛn kamp ɛn dɛn bin de na grup bay na dɛn difrɛn fambul. Nain PAPA GƆD in Spirit kam pan am

³ ɛn i bigin tɔk dis mɛsej: I se, “Na Belam we na Beɔ in bɔypikin de tɔk dis mɛsej, na pɔsin we de si gud de tɔk dis mɛsej.

⁴ Na pɔsin we de yɛri wetin PAPA GƆD de se de tɔk dis mɛsej, pɔsin we kin si aw PAPA GƆD Ɔlmayti want mek i si, pɔsin we de lidɔm na grɔn bifo PAPA GƆD ɛn we PAPA GƆD de opin in yay:

⁵ Luk we di tɛnt dɛn we Izrɛl in jɛnareshɔn dɛn de fayn!

⁶ Dɛn fiba we gadin kin de na di ɛj na watasay lɛk alo tik we na PAPA GƆD plant am ɔ lɛk sida tik we de gro nia watasay.

⁷ Dɛn go ebul ful dɛn bokit dɛn wit wata; ɛn di sid dɛn we dɛn plant go gɛt beberebe wata. Dɛn kiŋ dɛn go tɔf pas Egag; dɔn dɛn go gɛt mɔ ples fɔ rul.

⁸ PAPA GƆD pul dɛn kɔmɔt Ijipt; ɛn gi dɛn trɛnk lɛk dɛn wayl animal. Dɛn de bit ɔl dɛn neshɔn we nɔ lɛk dɛn ɛn nyamanyama dɛn bon dɛn, dɔn, na dɛn aro dɛn kin tek chuk dɛn.

⁹ I kin mek lɛk we layɔn kin lidɔm fɔ slip lɛkɛ uman layɔn we nɔbɔdi nɔ kres fɔ wek am. Lɛ udat blɛs dɛn, gɛt blɛsin ɛn lɛ swɛ fala ɔl udat ib swɛ pan dɛn.

¹⁰ Belak vɛks bad bad wan pan Belam. I klap in an dɛn ɛn tɛl am se in kɔl am fɔ kam ib swɛ pan in ɛnimi dɛn bɔt na blɛs Belam dɔn de blɛs dɛn di tri tɛm we i dɔn tɔk.

¹¹ I drɛb Belam ɛn tɛl am se i bin wan gi am gud tin as pe, bɔt PAPA GƆD dɔn mek i nɔ go gi am natin fɔ pe.

¹² Belam mɛmba am se we i bin sɛn di fɔs mɛsenja dɛn, i bin dɔn tɛl dɛn se

¹³ if ivin Belak ful in os wit gold ɛn silva fɔ pe am, i nɔ go du gud ɔ bad, pas wetin PAPA GƆD se fɔ du.

Di Las Tin Dɛn We Belam Tɔk

¹⁴ Belam tɛl am se i de go bak to in yon pipul dɛn, bɔt i wɔn Belak bɔt wetin di pipul dɛn we i bin want am fɔ ib swɛ pan gɛt fɔ du am.

¹⁵ Nain i se: “Na Belam we na Beɔ in bɔypikin de tɔk dis mɛsej na pɔsin we de si gud de tɔk dis mɛsej.

¹⁶ Na pɔsin we de yɛri wetin PAPA GƆD de se de tɔk dis mɛsej, we no bɔt PAPA GƆD Ɔlmayti, pɔsin we kin si aw PAPA GƆD want mek i si, pɔsin we de lidɔm bifo PAPA GƆD ɛn we PAPA GƆD de opin in yay.

¹⁷ A de si am, bɔt nɔto naw: a de luk am, bɔt i de fa. Wan sta go kɔmɔt na Izrɛl in jɛnareshɔn ɛn i go bi kiŋ na Izrɛl. I go bit di Moabayt lida dɛn ɛn brok dɛn wan we de kak dɛn fɛda dɔŋ.

¹⁸ Dɛn go win Idɔm wit Sɛir we nain ɛnimi bɔt Izrɛl go tinap traŋa.

¹⁹ Wan pɔsin na Izrɛl in jɛnareshɔn go bi kiŋ ɛn nain go dɔnawe wit di pipul dɛn na di siti.

²⁰ We Belam si Amalɛk, i se “Pan ɔl dɛn neshɔn dɛn na Amalɛk na di fɔs wan; bɔt nain go pwɛl pas dɛn ɔl

²¹ Wɛn i si di Kɛnayt dɛn, i se, una nɔ fɔ wɔri bɔt usay una de slip, una sef lɛk we bɔd bil in os insay insay ston.

²² Pan ɔl dat dɛn go dɔnawe wit una di Kɛnayt dɛn wɛn Asiria go kech una.

²³ Dɛn na dis mɛsej i tɔk; “Udat na dɛn pipul ya we kɔmɔt frɔm di Nɔth.

²⁴ Dɛn go tek ship dɛn kam na Sayprɔs; dɛn go ovatro Asiria ɛn Eba bɔt dɛnsɛf go pwɛl kpatakpata.

²⁵ We Belam dɔn tɔk dɔn, i grap saful ɛn go nain os ɛn Belak insɛf go in we.