Di Nɔmba Dɛm 23 - Krio Fɔs Oli Baybul

¹ Belam se fɔ bil sɛvin ɔlta de fɔ am ɛn fɔ gi am sɛvin man kaw ɛn sɛvin manship.

² We Belak dɔn rɛdi dɛn, dɛn ɔltu mek sakrifays pan di sɛvin ɔlta. Dɛn put wan man kaw ɛn wan man ship pan ɔl di ɔlta dɛn.

³ Dɔn Belam tɛl Belak lɛ i wet fɔ am usay dɛn mek di sakrifays. I se in go go na kɔna, sɔntɛm PAPA GƆD go go mit am de ɛn ɛnitin we i tɛl am, in go tɛl Belak. Na so in wan tek go ɔp wan il.

⁴ PAPA GƆD mit am de. Belam tɛl PAPA GƆD se in dɔn mek sɛvin ɔlta ɛn sakrifays wan man kaw ɛn wan man ship pan dɛn ɔl.

⁵ PAPA GƆD gi Belam mɛsej we i se i fɔ go bak go gi Belak.

⁶ Wɛn i go bak i mit Belak ɛn in man dɛn tinap nia di sakrifays.

⁷ So Belam tɔk di mɛsej we PAPA GƆD gi am. I se “Belak we na kiŋ na Moab pul mi kɔmɔt na Siria, di mawnten dɛn na di ist i tɛl mi se fɔ kam ib swɛ pan Izrɛl in jɛnareshɔn fɔ am fɔ kam mek di Izrɛlayt dɛn alaki.

⁸ Aw mi fɔ ebul ib swɛ pan udat PAPA GƆD nɔ swɛ? Aw a go ebul mek dɛn alaki if PAPA GƆD nɔ mek dɛn alaki?

⁹ A de ay ɔp di il usay a kin si dɛn a kin wach dɛn gud usay a de so ɔp di il. A de si pipul dɛn we de to dɛnsɛf dɛn nɔ de biev lɛk ɔda pipul dɛn.

¹⁰ Udat ebul fɔ kɔnt Izrɛl in jɛnareshɔn dɛn. Udat ebul fɔ kɔnt af ɔf dɛnsɛf. Lɛ a day lɛk udat no PAPA GƆD lɛ mi layf ɛnd lɛk dɛn yon.

¹¹ Belak aks Belam wetin i du am so. I se, in kɔl Belam fɔ ib swɛ pan in ɛnimi dɛn bɔt Belam nɔ du natin pas fɔ blɛs dɛn.

¹² Nain Belam se na wetin PAPA GƆD se fɔ tɔk nɔmɔ i fɔ tɔk.

Di Sɛkɛn Tin We Belam Tɔk

¹³ Belak tɛl Belam fɔ go wit am na ɔda pat usay i go ebul si dɛn; I tɛl Belam se na sɔm pan dɛn nɔmɔ i go si. I se Belam nɔ go si dɛn ɔl bɔt i fɔ ib di swɛ pan dɛn na da say de fɔ am.

¹⁴ So Belak kɛr Belam go na di Zofim fil we de pantap Pizga ɛn na de i bil sɛvin ɔlta usay i sakrifays wan man kaw ɛn wan man ship pan dɛn ɔl.

¹⁵ Belam tɛl Belak lɛ i wet fɔ am usay dɛn de mek sakrifays bikɔs in de go mit PAPA GƆD oba say.

¹⁶ PAPA GƆD mit Belam ɛn gi am ɔda mɛsej fɔ go bak go tɛl Belak.

¹⁷ So wɛn Belam tɔn bak i mit Belak ɛn in man dɛn tinap nia in sakrifays. I aks Belam wetin PAPA GƆD se,

¹⁸ so Belam bigin fɔ tɔk in mɛsej. “Belak, Zipɔ in bɔypikin, grap, opin yu yes ɛn lisin;

¹⁹ PAPA GƆD nɔto mɔtalman we de lay, ɛn in nɔto mɔtalman we kwik fɔ chenj in maynd. PAPA GƆD nɔ de tɔk natin we i nɔ de du ɛn i nɔ de mek prɔmis we i nɔ de kip.

²⁰ I dɔn tɛl mi se na blɛs a fɔ blɛs in dɔn blɛs ɛn mi nɔ fɔ chenj am.

²¹ I nɔ de luk se Izrɛl in jɛnareshɔn bin du am bad ɔ pan ɔl di bad tin dɛn we di Izrɛlayt dɛn dɔn du. PAPA GƆD we na dɛn PAPA GƆD de wit dɛn; nain de tɔk fɔ dɛn.

²² PAPA GƆD pul dɛn kɔmɔt Ijipt; dɛn gɛt trɛnk lɛk wayl animal.

²³ Nɔn majik nɔ de we go wok pan Izrɛl in pipul dɛn ɔ nɔbɔdi nɔ go ebul lukgrɔn fɔ di Izrɛlayt dɛn. Ɔlman go tɔk bɔt wetin PAPA GƆD dɔn du fɔ di Izrɛlayt dɛn.

²⁴ Di pipul de grap lɛk uman layɔn ɛn i de mek lɛk layɔn we nɔ go blo pas i it wetin i dɔn kech ɛn drink dɛn wan we i kech, dɛn blɔd.

²⁵ Dɛn Belak tɛl Belam se if i nɔ de swɛ dɛn, i nɔ fɔ blɛs dɛn atɔl.

²⁶ Belam aks am se if i nɔ bin dɔn tɛl am se na wetin PAPA GƆD se i fɔ du i go du.

Di Tɔd Tin We Belam Tɔk

²⁷ Dɛn Belak tɛl Belam se i go kɛr am go ɔda say. I se sɔntɛm PAPA GƆD go gladi fɔ mek Belam ib swɛ pan di pipul dɛn fɔ am na da say de.

²⁸ So Belak kɛr Belam go pantap Pɛɔ oba di ɛmti land we pɔsin nɔ go ebul tap.

²⁹ Belam se dɛn fɔ bil sɛvin ɔlta fɔ am ɛn rɛdi sɛvin man kaw ɛn sɛvin man ship fɔ am.

³⁰ Belak du wetin Belam se ɛn sakrifays wan man kaw ɛn wan man ship pan dɛn ɔl.