Di Nɔmba Dɛm 22 - Krio Fɔs Oli Baybul

Di Kiŋ Na Moab Sɛn Fɔ Belam

¹ Dɛn di Izrɛlayt dɛn waka na di flat grɔn na Moab ɛn kamp na di Jɔdan rod we yu krɔs oba frɔm Jɛriko.

² Belak we na Zipɔ in bɔypikin yɛri bɔt ɔl wetin di Izrɛlayt dɛn dɔn du di Amɔrayt dɛn.

³ Di pipul dɛn na Moab fred bikɔs di Izrɛlayt dɛn bin bɔku. Fɔ tru tru Moab bin de fred di Izrɛlayt dɛn.

⁴ Di Moabayt dɛn tɛl di bigman dɛn na Midian se we di Izrɛlayt dɛn bɔku so, dɛn go it ɔl wetin de rawnd dɛn fɔ it lɛk aw kaw de it gras na fil. So Belak we na Zipɔ in bɔypikin ɛn we na bin di kiŋ na Moab da tɛm de,

⁵ sɛn sɔm mɛsenja fɔ go kɔl Belam fɔ am. Belam we na Beɔ in bɔypikin we bin tap na Pɛtɔ nia Riva Yufretis usay i kɔmɔt. Belak tɛl am se sɔm pipul dɔn kɔmɔt Ijipt we dɔn ful di land ɛn dɛn de nia am.

⁶ I se Belam fɔ kam ib swɛ pan dɛn fɔ am bikɔs in nɔ ebul dɛn. I se dɛn gɛt pawa pas am bɔt sɔntɛm we Belam ib di swɛ pan dɛn, i go ebul fɛt dɛn ɛn bit dɛn dɔn i go drɛb dɛn kɔmɔt nain kɔntri. I sɛn to Belam se in no se ɛnibɔdi we i ib swɛ pan go gɛt swɛ ɛn ɛnibɔdi we i blɛs go gɛt blɛsin.

⁷ Di bigman dɛn na Moab ɛn Midian we i sɛn lɛf fɔ go wit smɔl mɔni fɔ lukgrɔn. Wɛn dɛn rich to Belam, dɛn tɛl am ɔl wetin Belak se.

⁸ Belam se mek dɛn slip de da nɛt de dɔn i go tɛl dɛn wetin na PAPA GƆD in ansa we i go gi am. So di Moabayt dɛn bigman dɛn slip de.

⁹ PAPA GƆD in go mit Belam ɛn aks am se, “Udat na dɛn pipul ya we de wit yu?

¹⁰ Belam tɛl PAPA GƆD se na Belak we na Zipɔ in bɔypikin ɛn we na di kiŋ na Moab sɛn wɔd to am se,

¹¹ sɔm pipul dɔn kɔmɔt Ijipt we de ɔlsay na di land. I se Belak kɔl am fɔ go ib swɛ pan di pipul dɛn fɔ am ɛn sɔntɛm da tɛm de i go ebul fɛt dɛn ɛn drɛb dɛn.

¹² Bɔt PAPA GƆD tɛl Belam se, “Nɔ go wit di mɛsenja dɛn. Yu nɔ go ebul ib swɛ pan dɛn pipul de bikɔs dɛn gɛt blɛsin.

¹³ Di nɛks de mɔnin, Belam grap ɛn tɛl di bigman dɛn we Belak sɛn se lɛ dɛn go bak saful bikɔs PAPA GƆD nɔ gri mek i go wit dɛn.

¹⁴ So di Moabayt bigman dɛn tɔn bak saful go to Belak ɛn tɛl am se Belam nɔ gri fɔ go bak wit dɛn.

¹⁵ Belak sɛn ɔda sɛt bigman dɛm we bɔku ɛn tɔf pas di fɔs wan dɛm bak.

¹⁶ We dɛn rich to Belam, dɛn tɛl am se Belak we na Zipɔ in bɔypikin se lɛ i nɔ mek natin tap am nɔ fɔ go to am

¹⁷ bikɔs in go gi am gud tin ɛn i fɔ du wetin in di Belak se. I se Belam fɔ go ib swɛ pan dɛn pipul de fɔ am.

¹⁸ Bɔt Belam ansa dɛn se ivin if Belak ful in wanol os wit silva ɛn gold ɛn gi am, in nɔ go du ɛnitin big ɔ smɔl we go mek i nɔ du wetin PAPA GƆD we nain GƆD se.

¹⁹ I tɛl dɛn se mek dɛnsɛf slip de fɔ wan nɛt lɛkɛ dɛn kɔmpin dɛn, ɛn in go fɛnɔt wetin PAPA GƆD go tɛl am.

²⁰ Da nɛt de PAPA GƆD kam mit Belam ɛn tɛl am se, “Sins dɛn man dɛn ya dɔn kam kɔl yu, go wit dɛn, bɔt na wetin a tɛl yu nɔmɔ fɔ du, yu fɔ du.

²¹ Belam grap di nɛks mɔnin ɛn rɛdi in dɔŋki dɔn i fala di man dɛn go.

Wetin Belam In Dɔnki Du?

²² Bɔt PAPA GƆD nɔ bin gladi we i fala dɛn go, so PAPA GƆD in enjɛl tinap midul di rod fɔ tap am nɔ fɔ go bifo. Belam bin sidɔm pan in dɔŋki, dɔn i bin gɛt in tu bɔy we go wit am.

²³ Wɛn di dɔŋki si PAPA GƆD in enjɛl tinap na di rod, ol sɔd lɛk udat rɛdi fɔ fɛt, i kɔmɔt na di rod go na bush fɔ balans am. Belam bit am fɔ mek i go na di rod bak.

²⁴ Dɛn PAPA GƆD in enjɛl tinap na wan tayt ples we gɛt wɔl na ɔltu di sayd dɛn.

²⁵ We di dɔŋki si PAPA GƆD in enjɛl, i kwis to di wɔl fɔ balans am bɔt dat mek Belam krep in fut na di wɔl. So Belam bit di dɔŋki bak.

²⁶ So PAPA GƆD in enjɛl muf go tinap bifo na ples we tayt ɛn nɔ gɛt nɔn kɔna fɔ kwis pas na di lɛft ɔ na di rayt.

²⁷ Wɛn di dɔŋki si PAPA GƆD in enjɛl, i jɛs sidɔm wit Belam, ɛn nɔ gri muf. Dat mek Belam vɛks ɛn bit am wit i wɔkinstik.

²⁸ So PAPA GƆD mek di dɔŋki tɔk. Di dɔŋki aks Belam wetin in du we mek Belam de bit am tri tɛm naw.

²⁹ Belam tɛl di dɔŋki se na bikɔs i de mek am fiba lɛk i bigful, ɛn tɛl di dɔŋki se if in bin ol sɔd i bin fɔ jɛs kil di dɔŋki.

³⁰ Nain di dɔŋki aks Belam if nɔto in na di dɔŋki we Belam bin de rayd ɔl di tɛm. I se, “A dɔn ɛva du yu so? Belam ansa am se nɔ.

³¹ Na da tɛm de PAPA GƆD opin Belam in yay fɔ si wetin de apin. I si PAPA GƆD in enjɛl tinap midul di rod wit in sɔd lɛkɛ udat rɛdi fɔ fɛt. As i si am so, i butu fɔ wɔship am.

³² PAPA GƆD in enjɛl aks Belam wetindu i bit in dɔŋki tri tɛm. I se in kam fɔ tap Belam afwe bikɔs i nɔ fɔ go da go de, we i de go.

³³ Di dɔŋki bin de si am ɔl di tri tɛm ɛn i bin de tray fɔ balans am di tri tɛm. If nɔto we di dɔŋki bin de balans am, lɛk i bin fɔ dɔn kil Belam bɔt i nɔ bin fɔ kil di dɔŋki.

³⁴ Belam tɛl PAPA GƆD in enjɛl se i dɔn du bad. I se i nɔ bin no se na PAPA GƆD in enjɛl bin de tinap bifo am fɔ blɔk in we bɔt if i nɔ gladi wit wetin in di Belam de du, i kin tɔn bak.

³⁵ PAPA GƆD in enjɛl tɛl am se i kin go wit di man dɛn bɔt na wetin i tɛl am fɔ tɔk nɔmɔ Belam fɔ tɔk. So Belam go wit di man dɛn.

Kiŋ Belak Tɛl Belam Kabɔ

³⁶ Wɛn Kiŋ Belak yɛri se Belam kam, i go mit am na rod na wan Moabayt siti we de na Anɔn bɔda insay in kɔntri.

³⁷ Belak aks Belam wetindu i nɔ bin kam we i bin sɛn fɔ am ɔjɛnt wan. I se if Belam min to se i nɔ ebul pe am bɛtɛ.

³⁸ Belam se, “Wɛl, a dɔn kam naw, bɔt nɔto ɛnikayn tin a go tɔk. Na wetin nɔmɔ PAPA GƆD se a fɔ tɔk a go tɔk.

³⁹ So Belam fala Belak na Kiriath Uzɔth.

⁴⁰ Belak sakrifays kaw, ɛn ship dɛn. I gi Belam ɛn di bigman dɛn we bin de wit am, sɔm.

Di Fɔs Tin We Belam Tɔk

⁴¹ Di nɛks mɔnin, Belak kɛr Belam go ɔp Bamɔth Baal, usay i go ebul si sɔm pan di pipul dɛn.