Di Nɔmba Dɛm 2 - Krio Fɔs Oli Baybul

Aw Di Difrɛn Fambul Dɛn Fɔ De Na Di Kamp

¹ PAPA GƆD tɛl Mozis ɛn Erɔn se,

² ɔl di Izrɛlayt dɛn fɔ kamp rawnd di Tɛnt usay dɛn kin mit PAPA GƆD bɔt dɛn fɔ de fawe smɔl. I se ich man fɔ de wit in fambul dɛn ɛn dɛn fɔ put bana fɔ sho us fambul dɛn bi.

³ Bay di istɛn pat, nia usay di san kin grap na mɔnin yu gɛt Juda Kamp. Na de Juda in pipul dɛn fɔ de. Dɛn fɔ de de bay grup wit dɛn bana ɛn Nashɔn we na Aminadab in bɔypikin na dɛn lida.

⁴ Dɛn na 74,600.

⁵ Isaka in fambul dɛn fɔ de neba dɛn. Dɛn yon lida na Netanɛl we na Zua in bɔypikin.

⁶ Dɛn na 54,400.

⁷ Zɛbyulɔn in fambul dɛn fɔ bi Isaka in yon fambul dɛn neba. Dɛn lida na Ɛliab we na Ɛlɔn in bɔypikin.

⁸ Dɛn na 57,400.

⁹ Ɔl dɛn wan ya, fɔ de na Juda Kamp ɛn dɛn fɔ de bay dɛn grup. Ɔl ɛn ɔl dɛn na 186,400. Na dɛn fɔs fɔ lɛf fɔ go.

¹⁰ Na di sawtɛn pat yu bin gɛt di Rubɛn Kamp we fɔ de bay grup wit dɛnsɛf yon bana. Di lida fɔ Rubɛn in fambul dɛn na Ɛlayzɔ we na Shɛdiɔ in bɔypikin.

¹¹ Dɛn na 46,500.

¹² Simiɔn in fambul dɛn fɔ de neba dɛn. Dɛn yon lida na Shɛlumiɛl we na Zurishaday in bɔypikin.

¹³ Dɛn na 59,300.

¹⁴ Gad in fambul dɛn fɔ bi Simiɔn in yon fambul, dɛn neba. Dɛn lida na Ɛlayasaf we na Duɛl in bɔypikin.

¹⁵ Dɛn na 45,650.

¹⁶ Ɔl dɛn wan ya fɔ de na Rubɛn Kamp ɛn dɛn fɔ de bay grup. Ɔl ɛn ɔl dɛn na 151,450. Na dɛn sɛkɛn fɔ lɛf fɔ go.

¹⁷ Afta dɛn, di Livayt dɛn kamp go lɛf fɔ go so dat dɛn go de midul di ɔda kamp dɛn. Dɛn go lɛf wit di Tɛnt usay dɛn kin mit PAPA GƆD di sem we aw dɛn bin kam, ɔlman go de usay i blant.

¹⁸ Na di Wɛst, na de Ifrem Kamp go de bay dɛn grup wit dɛn yon bana. Di lida fɔ Ifrem in pipul dɛn na Ilayshama we na Amiɔd in bɔypikin.

¹⁹ Dɛn na 40,500.

²⁰ Manasɛ in fambul dɛn fɔ de neba dɛn. Dɛn yon lida na Gamelial we na Pɛdazɔ in bɔypikin.

²¹ Dɛn na 32,200.

²² Bɛnjamin in fambul dɛn fɔ bi Manasɛ in fambul dɛn neba. Dɛn lida na Abidan we na Gidiɔni in bɔypikin.

²³ Dɛn na 35,400.

²⁴ Ɔl dɛn wan ya, fɔ de na Ifrem Kamp ɛn dɛn fɔ de bay dɛn grup. Ɔl ɛn ɔl, dɛn na 108,100. Na dɛn fɔ bi di tɔd grup fɔ lɛf fɔ go.

²⁵ Na di nɔtan pat, Dan Kamp bin de bay dɛn grup wit dɛn yon bana. Di lida fɔ Dan in pipul dɛn na Eayiza we na Amishaday in bɔypikin.

²⁶ Dɛn na 62,700.

²⁷ Asha in fambul dɛn fɔ de neba dɛn. Dɛn yon lida na Pegiɛl we na Okran in bɔypikin.

²⁸ Dɛn na 41,500.

²⁹ Naftali in fambul dɛn fɔ bi Asha in fambul dɛn neba. Dɛn lida na Aira we na Ɛnan in bɔypikin.

³⁰ Dɛn na 53,400.

³¹ Ɔl di man dɛn na Dan Kamp na 157,600. Na dɛn las fɔ lɛf ɛn dɛn fɔ de wit dɛnsɛf yon bana.

³² Na di Izrɛlayt dɛn dis we dɛn kɔnt. Dɛn ɔl bin de na grup bay dɛn fambul dɛn ɛn dɛn na 603,550.

³³ Bɔt dɛn nɔ bin miks di Livayt dɛn we dɛn de kɔnt di ɔda wan dɛn bikɔs na so PAPA GƆD bin dɔn tɛl Mozis.

³⁴ Di Izrɛlayt dɛn du ɔltin we PAPA GƆD bin tɛl Mozis se dɛn fɔ du; dɛn kamp bay dɛn grup wit dɛn bana ɛn lɛf bay dɛn grup. Ɔlman bin de wit in yon fambul dɛn yon grup.