Di Nɔmba Dɛm 19 - Krio Fɔs Oli Baybul

Wetin Fɔ Du Wit Di Rɛd Uman Kaw In Ashis

¹ PAPA GƆD tɛl Mozis ɛn Erɔn se,

² “Dis na di lɔ we PAPA GƆD se: Una tɛl di Izrɛlayt dɛn fɔ briŋ wan rɛd yɔŋ uman kaw we nɔ gɛt nɔn bɔt ɛn we dɛn nɔ yuz wande fɔ du ɛni wok.

³ Gi am to Ɛlieza, man we de mek sakrifays fɔ pipul sin. Fɔ tek am kɔmɔt na di kamp ɛn dɛn fɔ kil am bifo in yay.

⁴ Ɛlieza we de mek sakrifays fɔ pipul sin in naw fɔ tek sɔm pan in blɔd wit in fiŋa ɛn sprinkul am sɛvin tɛm bifo di Tɛnt usay wi kin mit.

⁵ As i de de de luk, dɛn fɔ bɔn di yɔŋ uman kaw wit in kanda, in bif, in blɔd ɛn in gɔt.

⁶ Di man we de mek sakrifays fɔ pipul sin fɔ tek sɔm sida wud, Isɔp lif, ɛn rɛd wul sɛn am pan di yɔŋ uman kaw we i de bɔn.

⁷ Afta dat, di man we de mek sakrifays fɔ pipul sin fɔ was in klos dɛn ɛn was insɛf wit wata. Dɛn i kin go insay di kamp bɔt na te ivintɛm i go klin na PAPA GƆD yay.

⁸ Di man we bɔn am insɛf fɔ was in klos dɛn, was insɛf bɔt na te ivintɛm insɛf go klin na PAPA GƆD yay.

⁹ Na wan man we klin fɔ gɛda di yɔŋ uman kaw in ashis ɛn put am na ples we klin na PAPA GƆD yay bɔt we nɔ de insay di kamp. Dɛn go kip am de fɔ mek di Izrɛlayt dɛn put am na wata we dɛn kin yuz fɔ was fɔ mek dɛn klin na PAPA GƆD yay. Na fɔ yuz am fɔ mek dɛnsɛf klin afta dɛn dɔn sin.

¹⁰ Di man we gɛda di yɔŋ uman kaw in ashis, insɛf fɔ was in klos dɛn ɛn insɛf nɔ go klin na PAPA GƆD yay te ivintɛm. Na so una fɔ de du. Una ɛn di fɔrina dɛn we tap wit una fɔ du dis te go.

Wetin Fɔ Du If Yu Ol Dedebɔdi

¹¹ Ɛnibɔdi we ol dedebɔdi nɔ go klin na PAPA GƆD yay fɔ sɛvin de.

¹² I fɔ was wit di wata di de we mek tri ɛn di de we mek sɛvin dɔn i go klin. If i nɔ was wit di wata di de we mek tri ɛn di de we mek sɛvin, dɔn i nɔ go klin.

¹³ Ɛniwan we nɔ gri fɔ was insɛf fɔ klin na PAPA GƆD yay afta we i ol dedebɔdi, de bamfa PAPA GƆD in Tɛnt. Dɛn fɔ drɛb da pɔsin de mek i kɔmɔt na Izrɛl. Bikɔs dɛn nɔ sprinkul da wata we fɔ mek am klin pan am, i nɔ klin ɛn na so i go de as pɔsin we nɔ klin.

¹⁴ Na di lɔ dis bɔt ɛnibɔdi we day insay ɛni tɛnt: ɛnibɔdi we go insay di tɛnt ɛn ɔl udat tap de nɔ go klin fɔ sɛvin de,

¹⁵ ɛn ɛni bol ɔ pan ɔ ɛnitin we nɔ kɔba, insɛf nɔ go klin.

¹⁶ Ɛnibɔdi we tɔch sɔmbɔdi we dɛn kil wit sɔd ɔ sɔmbɔdi we day nachɔral wan ɔ ɛnibɔdi we tɔch mɔtalman bon ɔ grev nɔ go klin na PAPA GƆD yay fɔ sɛvin de.

¹⁷ Fɔ put sɔm ashis we dɛn tek kɔmɔt pan di sakrifays we dɛn mek fɔ klin dɛnsɛf, insay wan jɔg ɛn put frɛsh wata pan am fɔ di pɔsin we nɔ klin na PAPA GƆD yay.

¹⁸ Dɛn wan man we klin na PAPA GƆD yay fɔ tek sɔm pan di Isɔp lif, dip am insay di wata ɛn sprinkul am na di tɛnt pan ɔl di tin dɛn we de de, ɛnibɔdi we de de ɛn pan ɛnibɔdi we dɔn tɔch mɔtalman bon ɔ ɛni grev ɔ sɔmbɔdi we dɛn dɔn kil ɔ sɔmbɔdi we day nachɔral wan.

¹⁹ Na di tɔd de ɛn di de we mek sɛvin, di man we klin fɔ sprinkul di man we nɔ klin ɛn na di de we mek sɛvin i fɔ klin. Di pɔsin we dɛn de mek klin fɔ was in klos ɛn was wit di wata bɔt i nɔ go klin na PAPA GƆD yay te ivintɛm.

²⁰ Bɔt if di pɔsin we nɔ klin ɔ nɔ mek insɛf klin, dɛn fɔ drɛb am kɔmɔt na di kɔmyuniti bikɔs i dɔn bamfa PAPA GƆD in Tɛnt. Dɛn nɔ sprinkul di wata we fɔ mek am klin pan am so i nɔ klin na PAPA GƆD yay.

²¹ Na tin dis we fɔ bi te go. Di man we de sprinkul di wata we fɔ mek pɔsin klin na PAPA GƆD yay insɛf fɔ was in klos dɛn dɔn ɛnibɔdi we tɔch di wata nɔ go klin na PAPA GƆD yay te ivintɛm.

²² Ɛnitin we di pɔsin we nɔ klin tɔch, nɔ go klin ɛn ɛnibɔdi we tɔch da tin de insɛf nɔ go klin te ivintɛm.