Di Nɔmba Dɛm 18 - Krio Fɔs Oli Baybul

Wetin Di man Dɛn We De Mek Sakrifays Fɔ Pipul Sin Ɛn Di Livayt Dɛn Fɔ Du.

¹ PAPA GƆD tɔk to Erɔn. I se, “Na yu ɛn yu bɔypikin dɛn ɛn yu papa in fambul dɛn rɛspɔnsibul fɔ ɛnitin we go rɔŋ insay di Tɛnt dɔn na yu ɛn yu bɔypikin dɛn rɛspɔnsibul fɔ ɛnitin we go ambɔg di wok bikɔs una na di man dɛn we de mek sakrifays fɔ pipul sin.

² Mek yu kɔmpin dɛn we na Livayt lɛk yu jɔyn an fɔ ɛp yu ɛn yu bɔypikin dɛn we una de wok na di Tɛnt usay di Kɔvinant Bɔks de.

³ Na una fɔ de tɛl dɛn wetin fɔ du ɛn dɛn fɔ du ɔl di wok we fɔ du na di Tɛnt bɔt dɛn nɔ fɔ go nia di tin dɛn we dɛn tek fɔ drɛs di Tɛnt ɔ di ɔlta, ɔ nɔ so dɛn go day ɛn unasɛf go day.

⁴ Dɛn fɔ jɔyn an wit una fɔ wok ɛn tek kia ɔf di Tɛnt usay wi kin mit. Nɔbɔdi igen nɔ fɔ kam nia usay una de.

⁵ Na una rɛspɔnsibul fɔ tek kia ɔf di Tɛnt ɛn di ɔlta so dat PAPA GƆD nɔ go vɛks ɛn baranta pan di Izrɛlayt dɛn igen

⁶ Na mi dɔn pik yu kɔmpin Livayt dɛn pan ɔl di Izrɛlayt dɛn fɔ de de wit yu as mi prɛzɛnt to yu fɔ mek dɛn de wok na di Tɛnt usay wi kin mit ɛn gi dɛnsɛf to PAPA GƆD.

⁷ Bɔt na yu ɛn yu bɔypikin dɛn nɔmɔ fɔ de as man dɛn we de mek sakrifays fɔ pipul sin ɛn we gɛt ɛnitin fɔ du wit di ɔlta ɛn di Tɛnt. A de mek una bi man dɛn we de mek sakrifays fɔ pipul sin as prɛzɛnt to una. Dɛn fɔ kil ɛni ɔda pɔsin we kam nia di Tɛnt.

Wetin Di Man Dɛn We De Mek Sakrifays Fɔ Pipul Sin Fɔ Gɛt

⁸ Dɛn PAPA GƆD tɛl Erɔn se, “Na misɛf sɛf dɔn mek yu fɔ bi bɔs oba ɔl wetin pipul dɛn de gi mi as sakrifays, ɔl di tin dɛn we dɛn de gi mi, a de gi sɔm bak to yu ɛn yu bɔypikin dɛn as una yon te go. Una fɔ tek sɔm pan di oli tin dɛn we nɔ de go na faya.

⁹ Na yu ɛn yu bɔypikin dɛn fɔ gɛt sɔm pan ɔl wetin di pipul dɛn de gi mi as oli sakrifays wɛda dɛn de gi mi bikɔs dɛn gladi ɔ bikɔs dɛn want fɔ mek a mek dɛn klin ɔ fɔ sho se dɛn dɔn du wetin dɛn nɔ fɔ du.

¹⁰ It dɛn lɛkɛ tin we oli. Ɔl di man dɛn fɔ it de bɔt una fɔ mɛmba se i oli.

¹¹ Ɛnitin we dɛn put wansay fɔ wev as sakrifays fɔ di Izrɛlayt dɛn, na una yon. A gi yu, yu bɔy ɛn gyal pikin dɛn as una yon te go. Ɛnibɔdi we tap na yu os, wans i klin na PAPA GƆD in yay, fɔ it pan am.

¹² “Ɔl di ɔliv ɔyl we fayn pas ɔl, di wayn we fayn pas ɔl pan di fɔs wayn we dɛn pul, dɛn sid dɛn we dɛn kin gi PAPA GƆD as di fɔs tin we dɛn avɛst na dɛn a de gi una.

¹³ Na una gɛt ɔl wetin dɛn de avɛst na di land we dɛn de briŋ to PAPA GƆD. Ɛnibɔdi we tap na yu os, wans i klin na PAPA GƆD in yay fɔ it de.

¹⁴ “Ɔltin na Izrɛl we dɛn dɔn gi PAPA GƆD fɔ bi in yon, na unasɛf yon.

¹⁵ “Di fɔs pikin wɛda na mɔtalman bɔn am ɔ na animal bɔn am, we dɛn gi PAPA GƆD na una yon. Bɔt di pipul dɛn fɔ gi sɔntin fɔ bay bak di fɔs pikin we na man we ɛni mɔtalman ɔ animal we nɔ klin na PAPA GƆD in yay bɔn.

¹⁶ Wɛn ɛniwan pan dɛn ol wan mɔnt, una fɔ tek tu awns silva fɔ bay dɛn bak dɛn. Da tu awns de fɔ bi lɛkɛ di wet we dɛn de yuz na di Tɛnt.

¹⁷ Una nɔ fɔ bay di fɔs kaw pikin, di fɔs ship pikin ɔ di fɔs got pikin dɛn bak, bikɔs dɛn oli. Una fɔ sprinkul dɛn blɔd na di ɔlta ɛn bɔn dɛn fat na faya so dat i go pul sɛnt we go mek PAPA GƆD gladi.

¹⁸ Dɛn bif dɛn na una yon jɛs lɛk aw di chɛst we dɛn wev to mi ɛn dɛn rayt lɛg dɛn na una yon.

¹⁹ “Ɛnitin we dɛn put wansay pan wetin di Izrɛlayt dɛn de gi as sakrifays we oli to PAPA GƆD na yu, yu bɔy ɛn gyal pikin dɛn yon te go. Dis na Kɔvinant we a de mek wit yu ɛn yu fɔ kip am sote go lɛkɛ aw sɔl di kip tin dɛn nɔ fɔ pwɛl to ivin yu pikin dɛn we nɔ bɔn yet.

²⁰ PAPA GƆD tɛl Erɔn se “Yu nɔ go gɛt pan di land we dɛn de sheb ɛn yu nɔ go gɛt pan ɛnitin. Pan ɔl di Izrɛlayt dɛn, na mi na yu yon, mi na yu prɔpati.

Wetin Di Livayt Dɛn Fɔ Gɛt

²¹ PAPA GƆD se, “A go gi di Livayt dɛn ɔl di tayth dɛn na Izrɛl as dɛn yon prɔpati fɔ di wok we dɛn de du na di Tɛnt usay wi kin mit.

²² Frɔm naw te go di Izrɛlayt dɛn nɔ fɔ go nia di Tɛnt usay wi kin mit ɔ nɔ so dɛn go pe fɔ dɛn sin ɛn dɛn go day.

²³ Na di Livayt dɛn fɔ wok na di Tɛnt usay dɛn kin mit ɛn so na dɛn rɛspɔnsibul fɔ ɛnitin we go rɔŋ de. Dis na tin we fɔ bi to ɔl jɛnareshɔn. Dɛnsɛf nɔ go gɛt fɔ gɛt pan ɛni prɔpati we di Izrɛlayt dɛn sheb.

²⁴ Bifo dat a go gi di Livayt dɛn, di tayth we di Izrɛlayt dɛn de gi to PAPA GƆD as dɛn yon prɔpati. Na dat mek a se fɔ dɛn, dɛn nɔ go gɛt pan di prɔpati we di Izrɛlayt dɛn de sheb.

Di Livayt Dɛn Yon Tayth

²⁵ PAPA GƆD tɛl Mozis se, fɔ tɛl di Livayt dɛn se,

²⁶ “Wɛn dɛn gɛt di Izrɛlayt dɛn tayth we a gi dɛn as dɛn prɔpati, dɛnsɛf fɔ gi wan pat pan tɛn pat as dɛn yon tayth to PAPA GƆD.

²⁷ Wetin dɛn de gi go tan lɛkɛ tin we dɛn gren ɔ jus to PAPA GƆD frɔm di tayth we di Izrɛlayt dɛn de gi.

²⁸ Na so dɛn go tek gi dɛnsɛf yon sakrifays to PAPA GƆD frɔm ɔl di tayth we di Izrɛlayt dɛn de gi. Frɔm di tayth dɛn, dɛn fɔ gi PAPA GƆD in yon pat to Erɔn, di man we de mek sakrifays fɔ pipul sin.

²⁹ Dɛn fɔ mek shɔ se dɛn gi PAPA GƆD di bɛst pat ɛn di pat we oli pas ɔl pan ɔltin we di Izrɛlayt dɛn gi.

³⁰ Tɛl di Livayt dɛn se, we dɛn de gi di bɛst pat pan wetin dɛn gi dɛn a go tek am lɛk se na dɛnsɛf yon tin we dɛn mil ɔ dɛn wayn.

³¹ Dɛn ɛn ɔl udat tap na dɛn os kin it di balans ɛnisay we dɛn want, as na dɛn pe fɔ di wok we dɛn de du na di Tɛnt usay wi kin mit.

³² We dɛn gi mi di bɛst pat pan wetin dɛn gɛt, dɛn nɔ go gɛt ɛni blem as dɛn nɔ go bamfa di Izrɛlayt dɛn sakrifays we oli ɛn dɛn nɔ go day.