Di Nɔmba Dɛm 17 - Krio Fɔs Oli Baybul

Erɔn In Tik Pul Flawa

¹ PAPA GƆD tɛl Mozis se

² “Tɛl di Izrɛlayt dɛn fɔ gi yu dɛn wɔkinstik. Ɔl di lida dɛn fɔ gi wan we go tinap fɔ ich wan pan di twɛlv fambul dɛn we de na Izrɛl. Rayt ɛvri lida in nem pan in yon wɔkinstik.

³ Pan di wɔkinstik we di Livay lida gi, rayt Erɔn in nem bikɔs na wan wɔkinstik nɔmɔ fɔ tinap fɔ di bigman we nain nem na di fambul nem.

⁴ Put di wɔkinstik dɛn insay di Tɛnt usay dɛn kin mit PAPA GƆD, frɔnt usay di Kɔvinant Bɔks de usay wi tu kin mit.

⁵ Di man we a pik in wɔkinstik go pul flawa ɛn da tɛm de ɔl dis grɔmbul we dɛn de grɔmbul pan una go dɔn.

⁶ So Mozis tɛl di Izrɛlayt dɛn lida dɛn. Dɛn gi am twɛlv wɔkinstik, wan fɔ ɛvri fambul na Izrɛl. So Erɔn in sɛf yon wɔkinstik bin de de.

⁷ Mozis go put dɛn bifo PAPA GƆD na di Tɛnt lɛkɛ aw i se.

⁸ Di nɛks de we Mozis go insay di Tɛnt, i si se Erɔn in wɔkinstik we tinap fɔ Livay fambul, nɔ jɛs pul flawa bɔt bia wetman baŋa.

⁹ Dɛn Mozis pul ɔl di wɔkinstik dɛn usay PAPA GƆD de ɛn briŋ dɛn na do to di Izrɛlayt dɛn. Dɛn luk di wɔkinstik dɛn ɛn ɔlman tek in yon.

¹⁰ PAPA GƆD tɛl Mozis fɔ put Erɔn in wɔkinstik bak na di tɛnt usay i bin de. I se, “Dis go lɛ di pipul dɛn blo fɔ grɔmbul pan mi mek dɛn nɔ day.

¹¹ Mozis insɛf du jɛs lɛkɛ aw PAPA GƆD bin dɔn tɛl am.

¹² Di Izrɛlayt dɛn tɛl Mozis se dɛn ɔl go day. Dɛn se dɛn dɔn fɔdɔm.

¹³ Dɛn se ɛniwan pan dɛn we go nia PAPA GƆD in os go day. Dɛn aks Mozis if na dɛn ɔl go day.