Di Nɔmba Dɛm 16 - Krio Fɔs Oli Baybul

Kora, Detan Ɛn Abiram Dɛn Biev Lɛk Rebɛl

¹ Kora we na Iza in bɔypikin we na bin Koath in grampikin ɛn Livay in gret grampikin wit Detan ɛn Abiram we na Ɛliab in yon bɔypikin dɛn ɛn On we na Pɛlɛt in yon bɔypikin, dɛn ɔl na bin Rubɛnayt.

² Dɛn eŋ ed fɔ mek kuskas pan Mozis. Tu ɔndrɛd ɛn fifti ɔda Izrɛlayt man we ɔlman no se na lida dɛn na di kɔmyuniti we di kansul pik jɔyn gɛŋ wit dɛn.

³ Dɛn ɔl mek wanwɔd ɛn nɔ gri wit wetin Mozis ɛn Erɔn se. Dɛn tɛl Mozis ɛn Erɔn se dɛn dɔn pasmak. Dɛn se ɔlman na Izrɛl oli ɛn PAPA GƆD de wit dɛnsɛf so wetin mek Mozis ɛn Erɔn fɔ de mek lɛk se dɛn bɛtɛ pas di ɔda pipul dɛn na PAPA GƆD in yay.

⁴ We Mozis yɛri wetin dɛn se, i bɛn dɔŋ bifo PAPA GƆD ɛn

⁵ tɛl Kora wit in gɛŋ se bay mɔnin PAPA GƆD go lɛ dɛn no udat na udat, we min se PAPA GƆD go sho dɛn udat nain yon ɛn udat oli. I tɛl dɛn se na da pɔsin de PAPA GƆD go drɔ klos am.

⁶ I tɛl Kora ɛn in gɛŋ se dɛn ɔl fɔ tek dɛn pɔt we dɛn kin bɔn insɛns

⁷ dɔn di nɛks de dɛn fɔ put insɛns ɛn faya insay ɛn briŋ am to PAPA GƆD. I se di man we PAPA GƆD pik nain oli. Mozis insɛf tɛl di Livayt dɛn se, dɛn dɔn pasmak.

⁸ Mozis tɛl Kora se mek dɛn lisin to wetin i de se.

⁹ I se dɛn we na Livayt dɛn fɔ mɛmba se di PAPA GƆD na Izrɛl dɔn pul dɛn kɔmɔt frɔm di ɔda Izrɛlayt dɛn. I se if dat nɔ du fɔ dɛn. I mɛmba dɛn igen se PAPA GƆD put dɛn klos am so dat dɛn go de du PAPA GƆD in wok nain os ɛn tinap frɔnt ɔlman fɔ ɛp dɛn wit wetin dɛn wan du na PAPA GƆD in os.

¹⁰ I tɛl Kora se pan ɔl we PAPA GƆD dɔn drɔ in ɛn di ɔda Livayt dɛn klos am, dat nɔ du fɔ dɛn. Dɛn de tray fɔ bi lɛkɛ di man dɛn we de mek sakrifays fɔ pipul sin.

¹¹ I se na PAPA GƆD, Kora ɛn in gɛŋ de mek kuskas pan ɛn aks am udat na Erɔn we dɛn de grɔmbul pan am.

¹² We Mozis dɔn tɔk to Kora dɔn, i sɛn kɔl Detan ɛn Abiram we na Ɛliab in bɔypikin dɛn. Bɔt dɛn se dɛn nɔ go kam.

¹³ Dɛn se if i nɔ du so, we i pul dɛm na di say we dɛn bin de we fayn fɔ plant ɛn fɔ mɛn animal, ɛn briŋ dɛn fɔ kam day na di ɛmti land we pɔsin nɔ go ebul tap. Dɛn se naw Mozis wan mek lɛk bɔs pan dɛn.

¹⁴ Dɛn se Mozis nɔ gɛt natin fɔ gi dɛn, i nɔ kɛr dɛn go na di land we fayn fɔ plant ɛn fɔ mɛn animal dɛn, i nɔ gɛt fam dɛn fɔ gi dɛn ɔ dɛn big vayn gadin we gɛt bɔku tin fɔ gi dɛn so i jɛs de mek dɛn ful ɛn want fɔ mek dɛn in slev.

¹⁵ Dis mek Mozis in at wam ɛn i tɛl PAPA GƆD se mek i nɔ tek dɛn sakrifays. I se in nɔ tek natin na dɛn an wande ɛn i nɔ du bad to dɛn wande.

¹⁶ Mozis tɛl Kora se in ɛn in gɛŋ fɔ go bifo PAPA GƆD di nɛks de ɛn Erɔn insɛf go de wit dɛn.

¹⁷ I se dɛn ɔl fɔ go wit di pɔt usay dɛn kin de bɔn insɛns, dat na tu ɔndrɛd ɛn fifti pɔt ɛn kɛr dɛn go put dɛn bifo PAPA GƆD. I tɛl Kora se insɛf ɛn Erɔn fɔ go wit dɛnsɛf yon pɔt. Na so ɔlman go wit in pɔt.

¹⁸ Dɛn ɔl put faya insay wit insɛns ɛn tinap wit Mozis ɛn Erɔn na di Tɛnt usay dɛn kin mit PAPA GƆD in domɔt.

¹⁹ Wɛn Kora dɔn gɛda in gɛŋ we de pan di kuskas na di Tɛnt usay dɛn kin mit PAPA GƆD in domɔt, PAPA GƆD in glori jɛs bɔsawt to dɛn ɔl.

²⁰ PAPA GƆD tɛl Mozis ɛn Erɔn se,

²¹ “Una kɔmɔt nia dɛn pipul ya mek a dɔnawe wit dɛn wantɛm.”

²² Bɔt Mozis ɛn Erɔn fɔdɔm bifo PAPA GƆD ɛn beg am. Dɛn se “E PAPA GƆD, di PAPA GƆD we mek mɔtalman, yu go vɛks ɛn pɔnish ɔlman we na waŋren man sin?

²³ So PAPA GƆD tɛl Mozis

²⁴ fɔ tɛl di ɔda Izrɛlayt fɔ kɔmɔt nia di tɛnt dɛn we Kora, Detan ɛn Abiram tap.

²⁵ Mozis grap go to Detan ɛn Abiram ɛn di bigman dɛn na Izrɛl fala am.

²⁶ I tɛl di ɔda Izrɛlayt dɛn se mek dɛn muf kɔmɔt nia di tɛnt we dɛn bad man dɛn de tap. I se mek dɛn nɔ tɔch dɛn natin ɔ nɔ so dɛnsɛf go sɔfa fɔ di man dɛn sin dɛn.

²⁷ So ɔlman muf kɔmɔt nia Kora, Detan ɛn Abiram dɛn tɛnt dɛn. Detan ɛn Abiram kɔmɔt na do wit dɛn wɛf dɛn, dɛn pikin dɛn ɛn ɔl di smɔl, smɔl pikin dɛn we tap wit dɛn. Dɛn ɔl jɛs tinap na di tɛnt dɛn domɔt.

²⁸ Mozis tɛl dɛn se na dis go mek dɛn no se na PAPA GƆD sɛn am fɔ du ɔl wetin i de du ɛn dat nɔto bay insɛf i de du am.

²⁹ I se if Kora, Detan ɛn Abiram day nachɔral wan we na wetin kin bi to mɔtalman nɔmɔ bi to dɛn, dɛn nɔto PAPA GƆD sɛn am.

³⁰ Bɔt if PAPA GƆD du wetin i nɔ wande du ɛn di grɔn opin mek dɛn go insay layv wan ɛn kɔba dɛn ɛn ɔl wetin dɛn gɛt, dɛn ɔlman go no se na PAPA GƆD dɛn pipul dɛn bin de fityay.

³¹ As i tɔk dɔn, di grɔn de opin.

³² Di grɔn swɛla dɛn ɔl udat tap wit dɛn ɛn ɔl wetin dɛn gɛt dɔn Kora in man dɛn ɛn ɔl wetin dɛnsɛf gɛt bin fala am go.

³³ Layf, layf wan na so dɛn go na dɛn yon grev wit ɔl wetin dɛn gɛt, dɛn di grɔn kɔba dɛn. Na so dɛn sɔfa fɔ wetin dɛn du ɛn lɔs na fɔg.

³⁴ We dɛn de ala ɔl di Izrɛlayt dɛn we bin de rawnd de rɔnawe de ala se di grɔn de kam swɛla dɛnsɛf.

³⁵ PAPA GƆD sɛn faya we bɔn di tu ɔndrɛd ɛn fifti man we bin de bɔn insɛns to PAPA GƆD ɛn dɛn day.

Di Pɔt Dɛn We Dɛn Kin Bɔn Insɛns

³⁶ PAPA GƆD tɛl Mozis.

³⁷ I se, “Tɛl Ɛlieza we na Erɔn in bɔypikin we na man we de mek sakrifays fɔ pipul sin se mek i tek di pɔt dɛn fɔ bɔn insɛns kɔmɔt usay di faya bin kech ɛn skata di kol dɛn we bin de insay fawe bikɔs dɛn pɔt dɛn de oli.

³⁸ Dɛn man dɛn we pe wit dɛn layf fɔ di tin we dɛn du, na dɛn bin gɛt dɛn pɔt dɛn de fɔ de bɔn insɛns. Dɛn bin dɔn gi PAPA GƆD dɛn pɔt de so di pɔt dɛn oli. Fɔ panɛl bit di pɔt dɛn ɛn fasin dɛn pan di ɔlta, so dat ɔl di Izrɛlayt dɛn go de si ɛn mɛmba wetin bin apin.

³⁹ So Ɛlieza, we na di man we de mek sakrifays fɔ pipul sin, gɛda ɔl di pɔt dɛn we na bras dɛn tek mek dɛn, we na dɛn, dɛn man dɛn we bɔn bin briŋ ɛn panɛl bit dɛn ɛn fasin dɛn rawnd di ɔlta,

⁴⁰ jɛs lɛkɛ aw PAPA GƆD bin dɔn tɛl Mozis fɔ tɛl am fɔ du. Dis na bin fɔ mɛmba di Izrɛlayt dɛn se nɔbɔdi nɔ gɛt rayt fɔ go bifo PAPA GƆD fɔ bɔn insɛns pas udat kɔmɔt na Erɔn in famili layn, ɔ nɔ so insɛf go tan lɛk Kora ɛn in gɛŋ.

Erɔn Sev Di Pipul Dɛn

⁴¹ Di nɛks de ɔl di Izrɛlayt dɛn bigin grɔmbul pan Mozis ɛn Erɔn bak. Dɛn se Mozis ɛn Erɔn dɔn kil PAPA GƆD in pipul dɛn.

⁴² Di tɛm we dɛn gɛda fɔ mek kɔnfyushɔn pan Mozis ɛn Erɔn dɛn bin tɔn to di Tɛnt usay dɛn kin mit PAPA GƆD nain wantɛm dɛn si klawd kɔba am ɛn PAPA GƆD in glori kam dɔŋ.

⁴³ So Mozis ɛn Erɔn go frɔnt di Tɛnt usay dɛn kin mit PAPA GƆD

⁴⁴ dɛn PAPA GƆD tɛl Mozis

⁴⁵ lɛ dɛn kɔmɔt gi am rod mek i dɔnawe wit di pipul dɛn wantɛm. Dɛn ɔltu jɛs bɛn dɛn ed dɔŋ.

⁴⁶ Dɔn Mozis tɛl Erɔn mek i tek in pɔt fɔ bɔn insɛns, put insɛns insay wit faya we kɔmɔt na di ɔlta ɛn rɔn go to di pipul dɛn go beg PAPA GƆD fɔ padin dɛn sin. I tɛl am se PAPA GƆD dɔn bigin fɔ sho aw i vɛks ɛn bad bad sik dɔn bigin we go kil di pipul dɛn.

⁴⁷ So Erɔn du wetin Mozis se ɛn rɔn go midul di pipul dɛn. Di bad bad sik fɔ kil dɛn bin dɔn bigin bɔt Erɔn gi PAPA GƆD di insɛns ɛn beg am fɔ padin di pipul dɛn sin dɛn.

⁴⁸ I tinap midul di wan dɛn we dɔn day ɛn di wan dɛn we nɔ day ɛn di bad bad sik we de kil dɛn lɔs.

⁴⁹ Bɔt na 14,700 pipul dɛn di bad bad sik kil we ad to di nɔmba we bin dɔn day bikɔs ɔf wetin Kora bin du.

⁵⁰ Erɔn go bak na di Tɛnt in domɔt usay dɛn kin mit PAPA GƆD go mit Mozis as di pipul dɛn bin dɔn lɛf fɔ day bikɔs ɔf di bad bad sik.