Di Nɔmba Dɛm 13 - Krio Fɔs Oli Baybul

Di Pipul Dɛn We Go Wach Aw Kenan Tan

¹ PAPA GƆD tɔk to Mozis.

² I se, “Sɛn sɔm man dɛn fɔ go wach aw Kenan tan, we a de gi to di Izrɛlayt dɛn. Twɛlv man fɔ kɔmɔt pan di lida dɛn na ɔl di twɛlv Izrɛlayt fambul dɛn fɔ go.

³ So Mozis du jɛs lɛkɛ aw PAPA GƆD tɛl am, ɛn sɛn dɛn go frɔm di ɛmti land we pɔsin nɔ go ebul tap na Paran.

⁴ Na di pipul dɛn dis we i sɛn. Frɔm Rubɛn in fambul, na Shamua we na Zakɔ in bɔypikin go;

⁵ frɔm Simiɔn in fambul, na Shafat we na Ɔri in bɔypikin go;

⁶ frɔm Juda in fambul, na Kelɛb we na Jɛfunɛ in bɔypikin go;

⁷ frɔm Isaka in fambul, na Igal we na Josɛf in bɔypikin go;

⁸ frɔm Ifrem in fambul, na Oshia we na Nɔn in bɔypikin go;

⁹ frɔm Bɛnjamin in fambul, na Palti we na Refu in bɔypikin go;

¹⁰ frɔm Zɛbyulɔn in fambul, na Gadiɛl we na Sodi in bɔypikin go;

¹¹ frɔm Manasɛ in fambul we na wan pan Josɛf in pikin dɛn, na Gadi we na Susi in bɔypikin go;

¹² frɔm Dan in fambul, na Amiɛl we na Gɛmali in bɔypikin go;

¹³ frɔm Asha in fambul, na Sɛthɔ we na Maykɛl in bɔypikin go;

¹⁴ frɔm Naftali in fambul, na Nabi we na Vofsi in bɔypikin go;

¹⁵ frɔm Gad in fambul, na Guɛl we na Maki in bɔypikin go;

¹⁶ Di man dɛn we Mozis sɛn go fɔ wach aw Kenan tan, na dɛn nem dɛn dɛn wan ya. Mozis gi Oshia we na Nɔn in bɔypikin nem Jɔshwa.

¹⁷ Wɛn Mozis bin de sɛn dɛn, i tɛl dɛn se dɛn fɔ go ɔp insay Nɛgɛv fɔ pas go ɔp di il na di kɔntri.

¹⁸ I se dɛn fɔ wach aw di ples tan, if di pipul dɛn we tap de gɛt trɛnk ɔ if dɛn na daydo ɛn if dɛn plɛnti ɔ nɔ plɛnti.

¹⁹ I se dɛn fɔ wach aw di grɔn tan usay dɛn tap, if i fayn ɔ i nɔ fayn, aw dɛn siti dɛn tan, if dɛn mek wɔl rawnd di siti ɔ if i nɔ gɛt wɔl.

²⁰ I se dɛn fɔ luk aw di grɔn we dɛn de plant tan, if i fayn fɔ plant ɔ if i nɔ gud, if tik dɛn de de ɔ if dɛn nɔ de. I se dɛn fɔ tray fɔ tek sɔm pan di frut dɛn we de gro na di land we dɛn de tɔn bak. Di tɛm we dɛn bin de go na di sizin fɔ avɛst di fɔs greps dɛn we rɛp.

²¹ So dɛn go ɔp go wach di land frɔm di ɛmti land we pɔsin nɔ go ebul tap na Zin te rich Riɔb bay Libo Amath.

²² Dɛn pas insay di Nɛgɛv ɛn kam to Ɛbrɔn usay Aiman, Shishay ɛn Talmay we na Anak in jɛnareshɔn dɛn tap. Ɛbrɔn na ples we dɛn bil sɛvin ia bifo Zoan na Ijipt.

²³ Wɛn dɛn rich na Ɛshkɔl Vali, dɛn kɔt wan an pan wan greps tik we na waŋren sɛt greps i gɛt pan am. Tu pan dɛn put am na wan pol ɛn tot am wit sɔm ɔda frut dɛn.

²⁴ Dɛn kɔl da ples de Ɛshkɔl Vali bikɔs ɔf di bɔnch greps we di Izrɛlayt dɛn kɔt de.

²⁵ Afta dɛn dɔn wach aw di ples tan fɔ foti de, dɛn tɔn bak.

²⁶ Dɛn go bak to Mozis ɛn Erɔn ɛn di wanol Izrɛlayt kɔmyuniti we bin de nia Kedɛsh na di ɛmti land we pɔsin nɔ go ebul tap na Paran. Dɛn ripɔt to ɔlman ɛn sho dɛn di frut dɛn we dɛn briŋ kam.

²⁷ Na dis dɛn tɛl Mozis: Dɛn se, “Wi go na di land we yu sɛn wi ɛn na tru se na land we gud ɛn i de bia bɔku tin. Infakt luk sɔm di frut we wi kam wit.

²⁸ Bɔt nɔ fɔ jok wit di pipul dɛn we tap de o! Ɛn dɛn bil wɔl dɛn rawnd dɛn big siti dɛn we big tumɔs. Wi ivin si sɔm pan Anak in jɛnareshɔn dɛn.

²⁹ Di Amalɛkayt dɛn tap na di Nɛgɛv; di Ivayt dɛn, di Jɛbyusayt dɛn, di Amɔrayt dɛn tap na di kɔntri ɔp di il; ɛn di Kenanayt dɛn tap nia di si bay di Jɔdan Riva.

³⁰ We dɛn bin de tɔk, Kelɛb jɛs kɔt di wɔd na dɛn mɔt. I se, “Wi fɔ go mek wi go tek di land na dɛn an, bikɔs wi ebul fɔ du am.

³¹ Bɔt di man dɛn we go ɔp wit am fɔ go wach di land se, “Wi nɔ go ebul fɛt dɛn pipul de, dɛn gɛt trɛnk pas wi.

³² Na so dɛn tek tɔk bad bad tin dɛn bɔt di land to ɔl di Izrɛlayt dɛn. Dɛn se, “Di land we wi go wach sɛf de pwɛl di wan dɛn we de de. Ɔl di pipul dɛn we wi si tan lɛk jayant.

³³ Wi si Anak in jɛnareshɔn dɛn de ɛn wi bin jɛs fiba yɔni to dɛn ɛn to wisɛf.