Di Nɔmba Dɛm 12 - Krio Fɔs Oli Baybul

Miriam Ɛn Erɔn Grɔmbul Pan Mozis

¹ Miriam ɛn Erɔn bigin tɔk bɔt Mozis fɔseka di uman we i bin mared. Di uman na Kushayt.

² Dɛn aks se if na Mozis nɔmɔ PAPA GƆD de tɔk to. Dɛn se if i nɔ ebul tɔk to dɛnsɛf. PAPA GƆD sɛf yɛri wetin dɛn de tɔk.

³ Mozis na bin man we nɔ gɛt prɔblɛm. Na bin pɔsin we put insɛf dɔŋ pas ɔlman we liv na di wɔl.

⁴ Wantɛm, wantɛm nain PAPA GƆD tɛl Mozis, Erɔn ɛn Miriam fɔ go na di Tɛnt go mit am. So dɛn ɔl tri go de.

⁵ PAPA GƆD apia insay klawd na di Tɛnt in domɔt ɛn kɔl Erɔn ɛn Miriam. We dɛn ɔltu go tinap bifo,

⁶ i se, “Una lisin to mi gud. Na bay vishɔn a de sho misɛf to ɛni PAPA GƆD in prɔfɛt dɛn, dɔn a de tɔk to dɛn pan drim.

⁷ Bɔt nɔto so a de dil wit mi savant, Mozis. Pan ɔl mi pipul dɛn, nain nɔmɔ nɔ de kɔmɔt biɛn mi.

⁸ A de tɔk to am fes to fes, a nɔ de miks mi tɔk we a de tɔk to am. A de tɔk tret tɔk; i kin si aw a tan. Una nɔ de fred fɔ tɔk bɔt mi savant, Mozis?

⁹ PAPA GƆD vɛks ɛn lɛf dɛn we i dɔn tɔk pan dɛn dɔn.

¹⁰ Wɛn di klawd kɔmɔt pan di Tɛnt, Miriam bin lɛf tinap wit bad sik nain bɔdi. Na so i wayt lɛk shatin. We Erɔn tɔn luk am ɛn si se bad sik dɔn kɔba Miriam in bɔdi,

¹¹ i beg Mozis mek i sɔri fɔ dɛn as dɛn dɔn biev fulish wan.

¹² I tɛl Mozis se lɛ Mozis nɔ mek Miriam fiba dɛn pikin we kin day insay dɛn mama in bɛlɛ so wɛn di mami kin manej bɔn am, af ɔf in bɔdi kin dɔn wes.

¹³ So Mozis insɛf beg PAPA GƆD lɛ i mek Miriam wɛl.

¹⁴ PAPA GƆD se, “If nain papa bin pit nain fes, i nɔ bin fɔ liv wit di shem ɛn disgres fɔ sɛvin de? So mek i go tap na do ɛn nɔ miks na di kamp fɔ sɛvin de, afta dat i kin kam jɔyn una igen

¹⁵ So dɛn drɛb Miriam fɔ go tap na do na di kamp fɔ sɛvin de bɔt di pipul dɛn nɔ muf go nɔ we te i kam bak.

¹⁶ We i kam bak, dɛn muf kɔmɔt na Azarɔth ɛn kamp na di ɛmti land we pɔsin nɔ go ebul tap na Paran.