Di Nɔmba Dɛm 10 - Krio Fɔs Oli Baybul

Di Silva Trɔmpɛt Dɛn

¹ PAPA GƆD tɔk to Mozis.

² I se, “Mek tu trɔmpɛt we dɛn go kɔba wit silva we dɛn ama. Yuz dɛn we yu want di Izrɛlayt dɛn fɔ gɛda ɛn we dɛn fɔ waka.

³ Wɛn dɛn blo dɛn ɔltu togɛda, ɔlman fɔ tinap bifo di Tɛnt we a kin mit una.

⁴ If na wan nɔmɔ dɛn blo, di lida dɛn we na di big wan dɛn fɔ di difrɛn famili dɛn na Izrɛl fɔ kam tinap bifo yu, usay yu de.

⁵ If dɛn blo am wan tɛm nɔmɔ dɛn fambul dɛn we kamp na di istɛn fɔ rɛdi fɔ muf.

⁶ We dɛn blo am tu tɛm, di wan dɛn na di sawtɛn pat fɔ rɛdi fɔ muf. We dɛn blo dɛn ɛnitɛm, na sayn fɔ sho se na fɔ go.

⁷ We na fɔ kɔl dɛn togɛda, na fɔ blo di trɔmpɛt dɛn difrɛn we.

⁸ Na Erɔn in bɔypikin dɛn, we na man dɛn we de mek sakrifays fɔ di pipul dɛn sin, fɔ de blo di trɔmpɛt dɛn. Wetin a de tɛl yu so nɔ fɔ chenj. Na so ɔlman fɔ du na yu jɛnareshɔn.

⁹ Wɛn una de fɛt na una land ɛn una ɛnimi wan siz advantej pan una, na fɔ blo di trɔmpɛt dɛn. Dat tɛm de, PAPA GƆD we na una PAPA GƆD, go mɛmba una ɛn i go pul una kɔmɔt na una ɛnimi dɛn an.

¹⁰ Dɛn igen, ɛnitɛm we una gɛt gladi-gladi, dɛn tɛm we una kin gɛt ɔlide ɛn we una kin mek smɔl tin fɔ sɛlibret di Nyu Mun, una blo di trɔmpɛt dɛn we una de bɔn animal as sakrifays ɛn mek pis sakrifays, so dat a go de mɛmba una. Na mi na PAPA GƆD we na una GƆD.

Di Izrɛlayt Dɛn Muf Dɛn Kamp

¹¹ Afta i dɔn tu ia we dɛn lɛf Ijipt, na di de we mek twɛnti, na di sɛkɛn mɔnt, di klawd we bin kɔba di Tɛnt grap,

¹² so di Izrɛlayt dɛn muf dɛn kamp we dɛn bin dɔn de na di ɛmti land we pɔsin nɔ go ebul tap na Saynay ɛn waka go bɔku say te di klawd tap na di ɛmti land we pɔsin nɔ go ebul tap na Paran.

¹³ Na di fɔs tɛm dis we PAPA GƆD lɛ dɛn muf as i bin dɔn tɛl Mozis.

¹⁴ Di grup we de na Juda Kamp, na dɛn go fɔs wit dɛn bana lɛkɛ aw i fɔ bi. Nashɔn we na Aminadab in bɔypikin na bin dɛn lida.

¹⁵ Netanɛl we na Zua in bɔypikin na bin di lida fɔ Isaka in fambul layn,

¹⁶ dɔn Ɛliab we na Ɛlɔn in yon bɔypikin na bin di lida fɔ Zɛbyulɔn in fambul layn.

¹⁷ Dɛn skata di Tɛnt ɛn di Gashɔnayt ɛn Mɛrarayt dɛn tot am ɛn de biɛn dɛn.

¹⁸ Na Rubɛn Kamp in bin de biɛn dɛn wit dɛnsɛf yon bana. Ɛlayzɔ we na Shɛdiɔ in bɔypikin bin de lid dɛn.

¹⁹ Shɛlumiɛl we na Zurishaday in bɔypikin nain bin de lid Simiɔn in fambul layn,

²⁰ ɛn Ɛlayasaf we na Duɛl in bɔypikin bin de lid di Gad fambul layn.

²¹ Afta dɛn di Koathayt dɛn bin de. Dɛn bin tot di oli tin dɛn we bin fɔ de na di Tɛnt. Dɛn fɔ dɔn fiks di Tɛnt bifo dɛn rich de.

²² Di wan dɛn we de na Ifrem Kamp bin go afta wit dɛnsɛf yon bana lɛk aw dɛn bin fɔ de. Na Ilayshama we na Amiɔd in bɔypikin bin de lid dɛn.

²³ Gamelial we na Pɛdazɔ in bɔypikin bin de lid di wan dɛn we de na Manasɛ fambul layn,

²⁴ ɛn Abidan we na Gidiɔni in bɔypikin in bin de lid di Bɛnjamin fambul layn.

²⁵ Di wan dɛn na Dan Kamp, na dɛn las go wit dɛnsɛf yon bana bay aw dɛn bin de. Na dɛn na bin di sikyɔriti we lɛf biɛn ɛn na Eayiza we na Amishaday in bɔypikin bin de lid dɛn.

²⁶ Pegiɛl we na Okran in bɔypikin bin de lid Asha fambul layn,

²⁷ ɛn Aira we na Enan in bɔypikin bin de lid Naftali fambul layn.

²⁸ Na so di Izrɛlayt dɛn bin de wɛn dɛn de mach as dɛn de go.

²⁹ Mozis tɛl Obab, in fadɛnlɔ Ruɛl in bɔypikin we na Midianayt se dɛn de go na di ples we PAPA GƆD bin dɔn tɛl dɛn se in go gi dɛn. I tɛl am se lɛ i go wit dɛn. I se dɛn go trit am fayn bikɔs PAPA GƆD dɔn prɔmis fɔ gi di Izrɛlayt dɛn gud tin.

³⁰ Obab ansa am se in nɔ go go. I se in de tɔn bak go usay i kɔmɔt, to in yon pipul dɛn.

³¹ Mozis beg am mek i nɔ lɛf dɛn as nain no bɔt usay dɛn de de na di ɛmti land we pɔsin nɔ go ebul tap so nain go bi dɛn yay.

³² Mozis tɛl Obab se if i go wit dɛn, insɛf go gɛt pan ɛni pan di gud tin dɛn we PAPA GƆD go gi dɛn.

Di Pipul Dɛn Lɛf Fɔ Go

³³ So dɛn lɛf di mawnten usay PAPA GƆD de ɛn waka fɔ tri de. Di Kɔvinant Bɔks bin de bifo dɛn fɔ di tri de fɔ fɛn ples fɔ dɛn fɔ tap.

³⁴ PAPA GƆD in klawd bin de de wit dɛn ɛvride frɔm we di kamp muf.

³⁵ Ɛnitɛm we di Kɔvinant Bɔks kin de muf, Mozis kin se “PAPA GƆD grap, mek yu ɛnimi dɛn rɔnawe. Lɛ ɔl udat nɔ lɛk yu, rɔnawe.

³⁶ Dɔn ɛnitɛm we i tap fɔ muf, Mozis kin se, “PAPA GƆD, kam bak to di tawzin tawzin Izrɛlayt dɛn.