Di Nɔmba Dɛm 1 - Krio Fɔs Oli Baybul

Di Fɔs kɔnt We Mozis Kɔnt Dɛn Na Izrɛl

¹ Na di fɔs de pan di sɛkɛn mɔnt na di ia we di Izrɛlayt dɛn kɔmɔt insay Ijipt, nain PAPA GƆD tɔk to Mozis. Da tɛm de Mozis bin de insay di Tɛnt usay dɛn kin mit PAPA GƆD na di ɛmti land we pɔsin nɔ go ebul tap na Saynay. I tɛl am se,

² i fɔ kɔnt ɔl di Izrɛlayt dɛn na di kɔmyuniti bay aw dɛn de na dɛn famili ɛn ɔl di fambul dɛn. I se, Mozis fɔ rayt ɔl di man dɛn nem dɔŋ wan bay wan.

³ I tɛl Mozis se, in di Mozis ɛn Erɔn fɔ kɔnt ɛn rayt dɔŋ ɔl di man dɛn pan di Izrɛlayt dɛn we dɔn ol twɛnti ia ɛn pas twɛnti ia. I se dɛn fɔ bi man dɛn we ebul fɔ jɔyn di ami ɛn dɛn fɔ du am bay grup.

⁴ So ich fambul fɔ gi am wan man we nain na di big wan na di fambul fɔ ɛp am.

⁵ Na di man dɛn dis we PAPA GƆD se fɔ ɛp am, pan Rubɛn in fambul dɛn, yu gɛt, Ɛlayzɔ we na Shɛdiɔ in bɔypikin;

⁶ pan Simiɔn in fambul dɛn, yu gɛt, Shɛlumiɛl we na Zurishaday in bɔypikin;

⁷ pan Juda in fambul dɛn, yu gɛt, Nashɔn we na Aminadab in bɔypikin;

⁸ pan Isaka in fambul dɛn, yu gɛt, Netanɛl we na Zua in bɔypikin;

⁹ pan Zɛbyulɔn in fambul dɛn, yu gɛt, Ɛliab we na Ɛlɔn in bɔypikin;

¹⁰ pan Josɛf in pikin dɛn: yu gɛt Ilayshama, Amiɔd in bɔypikin, we kɔmɔt pan Ifrem in fambul dɛn; dɔn Gamelial, Pɛdazɔ in bɔypikin in kɔmɔt pan Manasɛ in yon fambul dɛn;

¹¹ pan Bɛnjamin in fambul dɛn, yu gɛt, Abidan we na Gidiɔni in bɔypikin;

¹² pan Dan in fambul dɛn, yu gɛt, Eayiza we na Amishaday in bɔypikin;

¹³ pan Asha in fambul dɛn, yu gɛt, Pegiɛl we na na Okran in bɔypikin;

¹⁴ pan Gad in fambul dɛn, yu gɛt Ɛlayasaf we na Duɛl in bɔypikin;

¹⁵ pan Naftali in fambul dɛn, yu gɛt, Aira we na Ɛnan in bɔypikin;

¹⁶ Na dɛn man dɛn ya dɛn bin pik pan di Izrɛlayt dɛn. Na dɛn bin de lid dɛn fambul dɛn ɛn dɛn na bin di big wan dɛn pan di fambul dɛn na Izrɛl.

¹⁷ Mozis ɛn Erɔn dɛnsɛf tek di man dɛn we dɛn nem bin de dɔŋ,

¹⁸ ɛn kɔl di wanol kɔmyuniti fɔ kam togɛda. Di fɔs de na di sɛkɛn mɔnt ɔlman tɔk us fambul i kɔmɔt dɔn dɛn rayt ɔl di man dɛn we bin dɔn twɛnti ia, wan bay wan,

¹⁹ jɛs lɛk aw PAPA GƆD bin tɛl Mozis. Na so Mozis tek kɔnt dɛn ɔlman we bin de na di ɛmti land we pɔsin nɔ go ebul tap na Saynay. Di nɔmba we i kɔnt na:

²⁰ Rubɛn na bin di fɔs-bɔy-pikin we Izrɛl bɔn. Dɛn rayt ɔl di man dɛn we bin dɔn ol twɛnti ia ɛn we ebul fɔ jɔyn di ami, dɛn nem dɔŋ, wan bay wan, lɛk aw nɔmɔ i bin de na di rɛkɔd we di fambul bin gɛt.

²¹ Na 46,500 pipul kɔmɔt na Rubɛn in jɛnareshɔn dɛn.

²² Pan Simiɔn in yon fambul dɛn, dɛn kɔnt ɛn rayt dɔŋ, ɔl di man dɛn we dɔn ol twɛnti ia ɛn we ebul fɔ jɔyn di ami, dɛn nem wan bay wan, lɛk aw nɔmɔ i bin de na di rɛkɔd we di fambul bin gɛt.

²³ Na fifti nayn tawzin tri ɔndrɛd pipul kɔmɔt na Simiɔn in jɛnareshɔn dɛn.

²⁴ Pan Gad in yon fambul dɛn, dɛn rayt ɔl di man dɛn we bin dɔn ol twɛnti ia ɛn we ebul fɔ jɔyn di ami, dɛn nem dɔŋ, lɛkɛ aw nɔmɔ i bin de na di rɛkɔd we di fambul bin gɛt.

²⁵ Na 45,650 pipul kɔmɔt na Gad in jɛnareshɔn.

²⁶ Pan Juda in yon fambul dɛn, dɛn rayt ɔl di man dɛn we bin dɔn ol twɛnti ia ɛn we ebul fɔ jɔyn di ami dɛn nem dɔŋ, lɛk aw nɔmɔ i bin de na di rɛkɔd we di fambul bin gɛt.

²⁷ Na 74,600 pipul kɔmɔt na Juda in jɛnareshɔn.

²⁸ Pan Isaka in yon fambul dɛn, dɛn rayt ɔl di man dɛn we dɔn ol twɛnti ia ɛn we ebul fɔ jɔyn di ami dɛn nem dɔŋ, lɛk aw nɔmɔ i bin de na di rɛkɔd we di fambul bin gɛt.

²⁹ Na 54,400 pipul kɔmɔt na Isaka in jɛnareshɔn.

³⁰ Pan Zɛbyulɔn in yon fambul dɛn, dɛn rayt ɔl di man dɛn we bin dɔn ol twɛnti ia ɛn we ebul fɔ jɔyn di ami dɛn nem dɔŋ, lɛk aw nɔmɔ i bin de na di rɛkɔd we di fambul bin gɛt.

³¹ Na 57,400 pipul kɔmɔt na Zɛbyulɔn in jɛnareshɔn.

³² Pan Josɛf in pikin dɛn, dɛn rayt ɔl di man dɛn we dɔn ol twɛnti ia ɛn we ebul fɔ jɔyn di ami dɛn nem dɔŋ, na Ifrem in jɛnareshɔn, lɛk aw nɔmɔ i bin de na di rɛkɔd we di fambul bin gɛt.

³³ Na 40,500 pipul bin kɔmɔt na Ifrem in jɛnareshɔn.

³⁴ Pan Manasɛ in yon fambul dɛn, dɛn rayt ɔl di man dɛn we bin dɔn ol twɛnti ia ɛn we ebul fɔ jɔyn di ami dɛn nem dɔŋ, lɛk aw nɔmɔ i bin de na di rɛkɔd we di fambul bin gɛt.

³⁵ Na 32,200 pipul bin kɔmɔt na Manasɛ in yon jɛnareshɔn dɛn.

³⁶ Pan Bɛnjamin in yon fambul dɛn, dɛn bin rayt ɔl di man dɛn we bin dɔn ol twɛnti ia ɛn we ebul fɔ jɔyn di ami dɛn nem dɔŋ, lɛk aw nɔmɔ i bin de na di rɛkɔd we di fambul bin gɛt.

³⁷ Na 35,400 pipul kɔmɔt na Bɛnjamin in jɛnareshɔn.

³⁸ Pan Dan in fambul dɛn, dɛn bin rayt ɔl di man dɛn we bin dɔn ol twɛnti ia ɛn we ebul fɔ jɔyn di ami dɛn nem dɔŋ, lɛk aw nɔmɔ i bin de na di rɛkɔd we di fambul bin gɛt.

³⁹ Na 62,700 pipul kɔmɔt na Dan in jɛnareshɔn.

⁴⁰ Pan Asha in fambul dɛn, dɛn bin rayt ɔl di man dɛn we bin dɔn ol twɛnti ia ɛn we ebul fɔ jɔyn di ami dɛn nem dɔŋ, lɛk aw nɔmɔ i bin de na di rɛkɔd we di fambul bin gɛt.

⁴¹ Na 41,500 pipul kɔmɔt na Asha in jɛnareshɔn.

⁴² Pan Naftali in fambul dɛn, dɛn bin rayt ɔl di man dɛn we bin dɔn ol twɛnti ia ɛn we ebul fɔ jɔyn di ami dɛn nem dɔŋ, lɛk aw nɔmɔ i bin de na di rɛkɔd we di fambul bin gɛt.

⁴³ Na 53,400 pipul kɔmɔt na Naftali in jɛnareshɔn.

⁴⁴ Na di pipul dɛn ɔl dis we Mozis ɛn Erɔn bin kɔnt ɛn di twɛlv man we na di big wan dɛn na ɔl di fambul dɛn na Izrɛl, bin ɛp dɛn. Ich wan bin de rɛprizɛnt in yon fambul.

⁴⁵ Dɛn bin kɔnt ɔl di man dɛn we bin dɔn ol twɛnti ia ɛn we ebul fɔ jɔyn di ami bay us fambul dɛn kɔmɔt.

⁴⁶ Ɔl ɛn ɔl na bin dɛn 603,550.

⁴⁷ Dɛn nɔ bin kɔnt di pipul dɛn we kɔmɔt na Livay in fambul layn wit di ɔda wan dɛn.

⁴⁸ PAPA GƆD bin dɔn tɛl Mozis se;

⁴⁹ nɔ fɔ kɔnt di pipul dɛn we kɔmɔt na Livay in fambul layn ɔ miks dɛnsɛf pan di kɔnt. PAPA GƆD tɛl Mozis se

⁵⁰ bifo dat, i fɔ pik sɔm pan dɛn we go de inchaj ɔf di tɛnt we PAPA GƆD fɔ de, fɔ mek dɛn tek kia ɔf ɔltin we de insay de. Dɛn sɔpoz fɔ tot di tɛnt, wit ɔl wetin de insay am; tek gud kia ɔf am ɛn bil dɛn tɛnt dɛn rawnd am.

⁵¹ PAPA GƆD se ɛnitɛm we di tɛnt fɔ muf, na di Livayt dɛn fɔ skata am ɛn ɛnitɛm we fɔ bil am bak, na di Livayt dɛn fɔ du am. I se if ɛni ɔda pɔsin we nɔto Livayt go nia am, i fɔ day.

⁵² PAPA GƆD bin tɛl Mozis se ɔl di ɔda Izrɛlayt dɛn fɔ bil dɛn tɛnt aw dɛn ebul ɛn dɛn fɔ de bay grup

⁵³ bɔt di Livayt dɛn fɔ mek shɔ se dɛn bil dɛn tɛnt dɛn rawnd di tɛnt we PAPA GƆD fɔ de so dat waala nɔ go mit ɔlman na di Izrɛlayt kɔmyuniti. Na di Livayt dɛn dyuti fɔ tek kia ɔf di tɛnt we PAPA GƆD fɔ de. Na so PAPA GƆD se.

⁵⁴ Di Izrɛlayt dɛn du ɔltin jɛs lɛkɛ aw PAPA GƆD bin dɔn tɛl Mozis