Neum 3 - Krio Fɔs Oli Baybul

¹ Di siti dɔn alaki, na tin dɛn fɔ siz nɔmɔ de de- dɛn nɔ de tap fɔ tek pipul tin bay fos.

² Yu kin yɛri we di wip we dɛn de yuz pan di ɔs dɛn de mek sway sway ɔlɔbɔt, di chariɔt dɛn de pas wit ay spid, di ɔs dɛn ɔl de mek nɔys we dɛn de pas pas.

³ Di man dɛn we de rayd di ɔs dɛn de pas ɛn dɛn de swiŋ swiŋ dɛn sɔd ɛn dɛn spia dɛn, pipul dɛn jɛs de day gbay di dedebɔdi dɛn ful trit yu nɔ go waka yu nɔ mas dedebɔdi.

⁴ Na ɔl di rare layf we Ninivɛ bin de pan dɛn de pe fɔ so, i kin tek kɔni kɔni drɔ pipul atɛnshɔn, dɔn i lɛf dɛn na spes wit di sem kayn layf.

⁵ PAPA GƆD we pas ɔl ɔda gɔd vɛks pan dɛn. I se in go mɔs pɔnish dɛn. I se in go trip dɛn nekɛd frɔnt di ɔda neshɔn dɛn, dɔn ɔlman go si dɛn disgres wan.

⁶ I se in go trowe dɔti pan dɛn ɛn mek se i nɔ no dɛn dɔn i go mek ɔlman de pas luk dɛn ɛn laf.

⁷ Da tɛm de ɔl udat de luk dɛn go shumɔ ɛn tɔk se, Ninivɛ dɔn dɔn; udat go sɔri fɔ am? Usay a go fɛn pipul dɛm we go koks am?

⁸ I se Ninivɛ tink se in bɛtɛ pas Thibis, da big siti na Ijipt? I gɛt Riva Nayl rawnd am fɔ protɛkt am. Na di wata nain wɔl.

⁹ Di pipul dɛn na Thibis bin de sho se dɛn gɛt pawa bay aw dɛn bin de rul Ithiopia ɛn Ijipt insɛf pan ɔl wetin dɛn de du. Na Libia bin de ɛp dɛn.

¹⁰ Pan ɔl dat, dɛn bin kech insɛf kɛr am go ɛgzayl. Na trit dɛn dil wit in pikin dɛn. Dɛn ivin gyambul fɔ no aw fɔ sheb di bigman dɛn we dɛn kech.

¹¹ I se na so Ninivɛ insɛf go drɔnk wit pawa ɛn nɔ no wetin i de du. I go tray fɔ ayd pan in ɛnimi dɛn.

¹² Ɔl di tin dɛn we i mek fɔ protɛkt insɛf tan lɛk fig tik we gɛt fig dɛn we rɛp, as yu shek am so di fig dɛn de fɔdɔm go insay di pɔsin we wan it dɛn in mɔt.

¹³ I se dɛn sojaman dɛn de biev lɛk uman dɛn. Dɛn nɔ ebul fɛt igen ɛn so dɛn nɔ ebul pul di kɔntri na dɛn ɛnimi dɛn an. Na faya go pwɛl di krɔsba dɛn na dɛn get.

¹⁴ Neum se dɛn fɔ mek shɔ se dɛn kip wata we dɛn sojaman dɛn go drink di tɛm we dɛn de fɛt ɛn dɛn fɔ tray fɔ mek usay wik. Dɛn fɔ mas mas di kle we dɛn wan yuz fɔ mek blɔk lɛ i saf.

¹⁵ Na de faya go bɔn bɔn dɛn ɛn dɛn go day na wa. Dɛn go so nyamanyama dɛn dat dɛn go fiba plant we lokɔs kin dɔn it.

¹⁶ Bɔku biznɛsman go de lɛk aw di sta dɛn kin de na di klawd bɔt we dɛn dɔn gɛt wetin dɛn want, dɛn go kɔmɔt de go lɛk aw lokɔs kin flay go we i dɔn it ɔl dɛn grin plant dɔn.

¹⁷ Di bigman dɛn tan lɛk lokɔs ɛn dɛn sikyɔriti na lɛk we lokɔs kin ayd we di ples kol dɔn we san kɔmɔt dɛn kin skata ɛn go usay dɛn wan go we pɔsin nɔ go no.

¹⁸ Ɔl dɛn wan we kin de ɛp di bɔsman fɔ di kiŋ dɛn wok, dɛn ɔl lidɔm day wan; dɛn de slip, slip we go mek dɛn opin yay oba yanda. Di pipul dɛn skata na di mawnten lɛk ship we nɔ gɛt ona ɛn nɔbɔdi nɔ de fɔ briŋ dɛn kam bak.

¹⁹ Natin nɔ de fɔ pul dɛn kɔmɔt pan di kayn trɔbul we dɛn fɛn fɔ dɛnsɛf. Ɔl udat yɛri bɔt wetin mit dɛn go dans wit gladi bikɔs nɔbɔdi nɔ de we nɔ tes dɛn bad wan.