Neum 2 - Krio Fɔs Oli Baybul

Aw Ninivɛ fɔdɔm

¹ Na siriɔs trɔbul Ninivɛ de pan so. Fɔ rɛdi man dɛn fɔ gyad di rod fɔ klem go ɔp di wɔl; wach di rod; rɛdi dɛnsɛf ɛn pik trɛnk. (

² PAPA GƆD bin dɔn rɛdi fɔ mek Izrɛl bi wetin i bin bi bak bifo in ɛnimi dɛn ambɔg am.)

³ Di big shild we dɛn tek kɔba dɛnsɛf fɔ mek dɛn nɔ ebul dɛn, na rɛd. Dɔn dɛn wɛr rɛd yunifɔm. Di ayɛn dɛn pan dɛn chariɔt dɛn rɛd lɛk faya we dɛn dɔn rɛdi fɔ fɛt; di soja man dɛn we de rayd ɔs de pared.

⁴ Di chariɔt dɛn de pas wit spid na di trit dɛn, dɛn de pas ɔp ɛn dɔŋ di siti wit spid; di chariɔt dɛn de shayn lɛk we yu layt tɔchlayt, dɛn kin pas kwik lɛk we laytin flash.

⁵ Dɛn kɔl ɔl di ɔfisa dɛn; na so dɛn ɔl de staga we dɛn de go bifo. Di wan dɛn we de atak dɛn rɔn go to di wɔl usay dɛn go tek stand de wet fɔ rɛdi di tin we dɛn kin tek fɛt.

⁶ Wata bɔs insay di kiŋ in os di wanol ples tɔnoba.

⁷ Dɛn mek di kwin pul ɔl in klos ɛn kɛr am go, in nɔs dɛn ɔl lɛf de kray lɛk pijin ɛn nak nak dɛn chɛst fɔ sho se dɛn sɔri.

⁸ Di pipul dɛn de rɔn kɔmɔt na Ninivɛ lɛk aw wata kin bɔs we payp bɔs. Di ɔfisa dɛn de kɔl di pipul bak bɔt di pipul dɛn nɔ luk dɛnsɛf.

⁹ Dɛn tek ɔl di tin dɛn we gɛt valyu kɔmɔt na di siti.

¹⁰ Ninivɛ pwɛl kpatakpata, ɔlman at kɔmɔt nain atkes dɛn ɔlman bɔdi brok ɛn nɔ no wetin fɔ du; na so fred rayt na dɛn ɔl fes.

¹¹ Usay Layɔn dɛn os de, di kev we yɔŋ layɔn dɛn de usay di layɔn kin kɛr bif we i dɔn kil, usay in pikin dɛn de ɛn nɔ gɛt nɔbɔdi fɔ ambɔg am?

¹² Di layɔn kin chɛr di bif we go du gi in pikin dɛn ɛn gi di uman layɔn insɛf pan am; i de ful in kev wit animal dɛn we i dɔn kil, na so so af af bif kin de nain os.

¹³ PAPA GƆD we na GƆD we pas ɔl se i vɛks pan dɛn. I se in go bɔn ɔl wetin dɛn de yuz na wa ɛn dɛn go day de. I se dɛn nɔ go ebul fɔ de sɛn pipul dɛn go ɔdasay igen