Nɛimaya 8 - Krio Fɔs Oli Baybul

Ɛzra Rid Di Lɔ To Di Pipul Dɛn

¹ Bay di tɛm we di mɔnt we mek sɛvin de kam ɔl di Izrɛlayt dɔn sɛtul na dɛn difrɛn siti dɛn, ɔl di pipul dɛn gɛda wan ples, lɛkɛ wan pɔsin, na di bare we de bifo di Wata Get. Dɛn tɛl Ɛzra, di Ju Lɔ ticha fɔ pul di buk we dɛn rayt di lɔ we PAPA GƆD gi Mɔzis fɔ Izrɛl kɔmɔt na do.

² So Ɛzra briŋ di buk we di lɔ rayt kam na do to di pipul dɛn, di fɔs de na di mɔnt we mek sɛvin. Man dɛn, uman dɛn ɛn ɔl udat we ebul fɔ ɔndastand wetin Ɛzra de rid bin de de.

³ I rid lawd lawd wan na di bare frɔm do klin te santɛm bifo di Wata Get usay di man dɛn, di uman dɛn ɛn ɔl udat kin ɔndastand de. Na so ɔlman we de de, de pe atɛnshɔn to wetin rayt insay di buk we di lɔ rayt.

⁴ Ɛzra, bin tinap na wan ay stej we dɛn bil spɛshali fɔ da biznɛs de. Matitaya, Shema, Anaya, Yuraya, Ilkaya, ɛn Maasia bin tinap nia am nain raytan; dɔn Pɛdaya, Mishaɛl, Milkaja, Ashɔm, Ashbanada, Zɛkaraya ɛn Mɛshulam dɛn tinap nia am nain lɛfan.

⁵ Ɛzra opin di buk. Ɔlman yay bin de pan am bikɔs di stej bin ay, so as i opin am, dɛn ɔl tinap.

⁶ Ɛzra prez PAPA GƆD, di big big PAPA GƆD; dɔn ɔl di pipul dɛn es dɛn an ɔp ɛn ansa ‘Emɛn! Emɛn!’ Dɛn ɔl butu ɛn wɔship PAPA GƆD wit dɛn fes na grɔn.

⁷ Jɛshwa, Bani, Sherɛbaya, Jamin, Akɔb, Shabetay, Odaya, Maasia, Kɛlita, Azaraya, Jozabad, Anan ɛn Pɛlalay we na Livayt dɛn, bin de go rawnd fɔ ɛksplen di lɔ to di pipul dɛn we bin tinap de.

⁸ Dɛn bin de rid frɔm di buk we PAPA GƆD in lɔ rayt ɛn ɛksplen di minin so dat di pipul dɛn go ɔndastand wetin dɛn de rid.

⁹ Di gɔvna, Nɛimaya ɛn Ɛzra, we na di Ju Lɔ ticha ɛn na wan pan di man dɛn we kin mek sakrifays fɔ pipul sin ɛn di Livayt dɛn bin de ɛksplen tɛl di pipul mek dɛn nɔ fil bad. Dɛn bin wan kray we dɛn yɛri wetin di lɔ se. Dɛn tɛl di pipul dɛn se, “Tide na de we Oli to PAPA GƆD, wi GƆD. Una nɔ fɔ fil bad ɛn kray.”

¹⁰ Nɛimaya tɛl dɛn fɔ go om ɛn it fayn tin. I se dɛn fɔ ɛnjɔy spɛshal it ɛn swit drink. I se fɔ sɛn sɔm pan di it go gi ɔda pɔsin we nɔ gɛt natin. I tɛl dɛn se da de de na de we dɛn nɔ fɔ sɔri. Na de we oli to PAPA GƆD ɛn na PAPA GƆD de mek dɛn gladi ɛn gi dɛn trɛnk.

¹¹ Di Livayt dɛnsɛf ɛp fɔ koks di pipul dɛn. Dɛn tɛl di pipul se dɛn nɔ fɔ wɔri ɔ sɔri bikɔs da de de na Oli de to PAPA GƆD.

¹² So di pipul dɛn skata go fɛn gud it fɔ it ɛn drink ɛn ivin sɛn sɔm go gi udat nɔ gɛt. Dɛn ɔl gladi ɛn sɛlibret bikɔs bay da tɛm de dɛn bin dɔn ebul fɔ ɔndastand ɔl wetin dɛn bin de tɛl dɛn.

Di Fɛstival Fɔ Mek Dɛn Go Tap Na Kamp

¹³ Di nɛks de, dat na di sɛkɛn de, na da sem mɔnt de, ɔl di big wan dɛn na di famili dɛn wit dɛn man we de mek sakrifays fɔ pipul sin ɛn dɛn Livayt dɛn gɛda to Ɛzra fɔ stɔdi wetin rayt na di lɔ, gud gud wan.

¹⁴ Dɛn fɛnɔt se, dɛn rayt na di lɔ we PAPA GƆD gi Mozis se, di tɛm fɔ da fɛstival we dɛn kin de mek na di mɔnt we mek sɛvin, ɔl di Izrɛlayt dɛn fɔ go tap na kamp,

¹⁵ ɛn dɛn sɛn wɔd go rawnd na ɔl di siti dɛn ɛn na Jerusɛlɛm se ɔlman fɔ go ɔp di il na bush go kɔt tik. Dɛn se dɛn fɔ briŋ am kam so dat dɛn go mek kamp, lɛkɛ aw i rayt na di lɔ. Dɛn se di pipul dɛn fɔ kɔt difrɛn kayn tik dɛn lɛkɛ ɔliv tik, wayl ɔliv tik, matul tik we gɛt chukchuk, pam tik ɛn dɛn tik dɛn we dɛn kin yuz fɔ shed.

¹⁶ So di pipul dɛn go fɛn di tik dɛn, briŋ dɛn kam ɛn mek kamp pantap dɛn ruf, na dɛn os in kɔmpawnd, na di kɔmpawnd na PAPA GƆD in os ɛn na di bare we de nia di Wata Get. Dɔn dɛn bil wan bay di Ifrem Get.

¹⁷ Di wanol grup we bin kam bak mek kamp ɛn tap de. Frɔm we Jɔshwa, Nɔn in bɔypikin day. Di Izrɛlayt dɛn nɔ bin ebul fɔ sɛlibret dis fɛstival lɛkɛ so. Dɛn ɛnjɔy am bad bad wan ɛn na so dɛn gladi.

¹⁸ Dɛn sɛlibret di fɛstival fɔ sɛvin de ɛn frɔm de wan te de sɛvin, Ɛzra bin de rid wetin rayt insay di buk we PAPA GƆD in lɔ rayt. Dɔn, dɛn ɔl gɛda wan ples, di de we mek et, fɔ go wit wetin di lɔ se.