Nɛimaya 6 - Krio Fɔs Oli Baybul

Dɛn Plan Fɔ Kil Nɛimaya

¹ Sanbalat, Tobaya, Gishɛm da Arabman ɛn ɔl wi ɛnimi dɛn yɛri se a dɔn bil di wɔl dɔn. Dɛn yɛri bak se nɔn ol nɔ lɛf we dɛn nɔ mek na di wɔl bɔt wi nɔ bin ebul fɔ put di do dɛn pan di get yet.

² Sanbalat ɛn Gishɛm sɛn kɔl mi. Dɛn se mi fɔ mit dɛn na wan vilej we de na wan pat we flat. Dɛn kɔl am Ono. Bɔt dɛn bin de mek plan bɔt aw fɔ du mi bad.

³ So a sɛn pipul dɛn fɔ tɛl dɛn se a gɛt wan impɔtant projɛkt we a de du so a nɔ go lɛf am go dɔŋ go mit dɛn. A aks dɛn se, “Wetin du a fɔ lɛf di wok we a de du fɔ go dɔŋ go mit una?”

⁴ Fɔ fo difrɛn tɛm, dɛn bin de sɛn di sem sem mɛsej to mi ɛn ɛnitɛm di mɛsej kam, na di sem ansa misɛf de sɛn bak.

⁵ Di nɔmba fayv tɛm we Sanbalat sɛn in asistant wit di sem mɛsej i bin ol wan lɛta we nɔ stamp nain an.

⁶ Dɛn rayt na dis lɛta se: “Gishɛm se di tɔk we dɛn de tɔk ɔlɔbɔt na tru se yu ɛn dɛn Juman dɛn de plan fɔ mek ku na dat mek una de bil di wɔl. Fɔ ad to dis, dɛn se yu want bi kiŋ ɛn

⁷ dɔn pik sɔm pan dɛn man we de tɔk to PAPA GƆD fɔ di pipul dɛn fɔ wirɔn wit yu ɛn ala se yu na kiŋ ɔl rawnd Jerusɛlɛm. Dɛn go se Juda gɛt kiŋ. So if yu nɔ kam mek wi ɛŋ ed fɔ sɛtul dis tin ya di kiŋ go yɛri bɔt dat.”

⁸ Misɛf sɛn go tɛl am se na mek i de mek ɔp stori, natin lɛkɛ dat nɔ de apin.

⁹ Dɛn bin de tray fɔ skyad wi. Dɛn bin tink se dɛn go ebul fɔ mek wi fɛdɔp ɛn nɔ dɔn di wok we wi bin de du. So a pre mek PAPA GƆD gi mi kɔrej ɛn mɔ trɛnk.

¹⁰ Wande a go to Shɛmaya nain os. Shɛmaya na Dɛlaya in bɔypikin ɛn na Mɛitabɛl in grampikin. We a go mit am as in bin lɔk insay in os, i tɛl mi se mek wi go ayd insay PAPA GƆD in os ɛn lɔk wisɛf insay de bikɔs dɛn de kam fɔ kil mi. I se na nɛt dɛn go kam fɔ kil mi.

¹¹ Nain a aks am se if man lɛkɛ mi fɔ rɔnawe ɔ rɔn go lɔk misɛf insay PAPA GƆD in os mek a nɔ day. A tɛl am se, “A nɔ go go.”

¹² A bin dɔn kechɔp se nɔto PAPA GƆD sɛn am. I tɔk so bikɔs Tobaya ɛn Sanbalat aya am.

¹³ Dɛn bin aya am fɔ skyad mi so dat a go gɛt bad nem fɔ we a sin, dɔn pipul nɔ go tek mi siriɔs igen ɛn a go lɛf wit shem.

¹⁴ Nɛimaya pre. I se, “Mek PAPA GƆD pe Tobaya ɛn Sanbalat fɔ wetin dɛn du. Mek PAPA GƆD pe Noadaya di uman we de tɔk to PAPA GƆD fɔ di pipul dɛn, fɔ we i de tray fɔ skyad mi.”

Di Pipul Dɛn Dɔn Di Wok

¹⁵ So wi tek fifti-tu de fɔ dɔn di wɔl. Wi dɔn di wok di twɛnti-fayv de na Ɛlul.

¹⁶ We ɔl wi ɛnimi dɛn yɛri dis, ɔl udat tap na di kɔntri dɛn rawnd Jerusɛlɛm fred. Dɛn giv ɔp bikɔs dɛn kechɔp se na bay PAPA GƆD in pawa mek wi ebul du di wok.

¹⁷ Dɔn igen, da tɛm de di aristo dɛn na Juda bin de sɛn bɔku lɛta to Tobaya ɛn insɛf bin de riplay.

¹⁸ Bɔku pan di pipul dɛn na Juda bin dɔn swɛ se dɛn go de fɔ am sins in na bin Shɛkanaya we na Ara in bɔypikin in sɔnɛnlɔ, ɛn in yon bɔypikin Jɛoanan bin mared Mɛshulam we na Bɛrɛkaya in bɔypikin, in gyal pikin.

¹⁹ Dɛn bin jɛs de tɛl mi bɔt aw i gud, dɔn dɛn kin go tɛl am wetin a se, insɛf bin jɛs de sɛn lɛta pan lɛta to mi fɔ skyad mi.