Nɛimaya 5 - Krio Fɔs Oli Baybul

Nɛimaya Ɛp Di Wan Dɛn We Po

¹ Sɔm pan di man dɛn ɛn dɛn wɛf dɛn bigin grɔmbul bɔt dɛn kɔmpin Juman dɛn.

² Sɔm se dɛn ɛn dɛn bɔy ɛn gyal pikin dɛn bɔku so dɛn fɔ gi dɛn mɔ it fɔ it fɔ mek dɛn nɔ day.

³ Sɔm ɔda wan dɛn se dɛn dɔn de sɛl dɛn land, dɛn fam ɛn dɛn os dɛn smɔl smɔl so dat dɛn go ebul bay tin fɔ it we aŋri de na di siti so.

⁴ Ɔda sɛt se na lɛnt dɛn lɛnt mɔni fɔ pe taks fɔ dɛn fam dɛn to di kiŋ.

⁵ Dɛn se, pan ɔl we na dɛn flɛsh ɛn blɔd ɛn dɛn kɔmpin kɔntriman dɛn pikin nɔ difrɛn frɔm dɛn yon pikin, dɛn stil tek dɛn yon pikin dɛn, bɔbɔ ɛn titi, fɔ mek dɛn fɔ wok lɛkɛ slev. Dɛn se, sɔm pan dɛn gyal pikin dɔn tɔn to prɔpa slev naw ɛn ɔl dis na bikɔs na ɔda pipul dɛn gɛt dɛn fam dɛn naw.

⁶ Wɛn a yɛri ɔl wetin dɛn de grɔmbul se, a vɛks bad.

⁷ A bigin tink bɔt ɔl wetin dɛn se. Dat mek a go tɔk pan dɛn aristo ɛn dɛn bigman dɛn. A se, “Na tif una de tif una yon yon flɛsh ɛn blɔd so we una de buli dɛn fɔ pe pasmak fɔ it.” Dɔn a kɔl dɛn pan wan big big bare.

⁸ We dɛn ɔl kam, a tɛl dɛn se, “Wi dɔn de du ɔl wetin wi ebul fɔ pul ɔl wi Juman fambul we na bin slev to dɛn pegan kɔmɔt de. Bɔt naw una de put di sem waala pan dɛn we dɛn bin de pan, pan ɔl we dɛn na una yon flɛsh ɛn blɔd, dɔn una de mek dɛn bi slev bak to una.” We i dɔn tɔk dɔn, dɛn nɔ se fiŋ bikɔs dɛn nɔ bin gɛt natin fɔ se.

⁹ A tɛl dɛn igen se, wetin dɛn de du nɔ fayn. A aks dɛn se if i nɔ bɛtɛ fɔ biev lɛkɛ udat gɛt fred fɔ PAPA GƆD ɛn avɔyd fɔ mek dɛn pegan dɛn laf dɛn.

¹⁰ A tɛl dɛn se misɛf, mi brɔda ɛn mi wokman dɛn dɔn de lɛnt di pipul dɛn mɔni ɛn gi dɛn tin fɔ it, bɔt dat a want dɛn fɔ tap wetin dɛn de du we dɛn de tek pasmak mɔni na di pipul dɛn an.

¹¹ A tɛl dɛn fɔ gi di pipul dɛn bak wantɛm wantɛm, ɔl wetin dɛn bin dɔn olɔp na dɛn an: dɛn fam dɛn, dɛn greps ɛn ɔliv fam ɛn dɛn os dɛn. A tɛl dɛn igen se dɛn fɔ gi di pipul dɛn ɔl di pasmak mɔni we dɛn dɔn tek na dɛn an fɔ tin fɔ it, fɔ wayn ɛn fɔ ɔyl.

¹² Dɛn ɔl ansa wit wan vɔys se, “Wi go gi dɛn ɔl wetin wi fɔ gi dɛn bak. Wi nɔ go tek ɛnitin na dɛn an igen Wi go du ɔl wetin yu se.”

¹³ We dɛn tɔk so, a sɛn kɔl ɔl dɛn man we de mek sakrifays fɔ pipul sin ɛn mek ɔl di aristo ɛn bigman dɛn swɛ se dɛn go du ɔl wetin dɛn prɔmis. A ol di ples we fol fol na mi gawn ɛn shek shek am dɔn a tɛl dɛn se if ɛnibɔdi nɔ kip in prɔmis, na so PAPA GƆD go shek insay in os wit ɔl in prɔpati dɛn. We a tɔk so, ɔl di pipul dɛn se, “Emɛn” ɛn prez PAPA GƆD. Dɛn ɔl du wetin dɛn bin prɔmis.

Nɛimaya In fri An Wan

¹⁴ Wan tin igen, fɔ twɛlv ia naw a dɔn bi gɔvna na Juda, dat na frɔm we kiŋ Atazaksis bin dɔn de rul fɔ twɛnti ia, te naw we i dɔn rul fɔ tati-tu ia. Mi ɛn mi brɔda dɛn nɔ wande it di it we wi fɔ it bikɔs mi na gɔvna.

¹⁵ Bɔt di wan dɛn we na bin gɔvna bifo mi bin de pas am pan di pipul dɛn bad bad wan. Apat frɔm di it ɛn di wayn we dɛn bin de tek, dɛn bin de mek dɛn gi dɛn lɛkɛ wan pawn wet silva. Ivin di man dɛn we na bin dɛn asistant bin de tek advantej pan di pipul dɛn. Bɔt, mi, nɔ biev so bikɔs a de fred PAPA GƆD.

¹⁶ Bifo dat, a put ɔl mi at pan di wok we a bin de du fɔ bil dis wɔl. Ɔl mi wokman dɛn nɔ bisin bɔt natin pas di wok; wi nɔn nɔ bay land sɛf.

¹⁷ Dat nɔ dɔn, wan ɔndrɛd ɛn fifti, Ju bigman ɛn dɛn trenja we kin kɔmɔt na ɔda kɔntri kam, kin de it to mi.

¹⁸ Ɛvri de na wan man kaw, siks pan di bɛst ship dɛn wit sɔm chikin, nain wi ɔl de it. Dɔn afta ɛvri tɛn de a kin gi dɛn difrɛn difrɛn kayn wayn. Na so dɛn kin bɔku. Pan ɔl dis, a nɔ wande se dɛn fɔ gi mi di it we dɛn dɔn se gɔvna fɔ gɛt bikɔs tin bin dɔn ɔlrɛdi traŋa fɔ di pipul dɛn.

¹⁹ Nɛimaya pre. I se, “PAPA GƆD duya mek bɛtɛ fala mi fɔ ɔl wetin a dɔn du fɔ dɛn pipul ya.”