Nɛimaya 4 - Krio Fɔs Oli Baybul

Nɛimaya Ebul Dɛn Wan Dɛn We Bin De Ɔpoz In Wok

¹ We Sanbalat yɛri se wi de bil di wɔl bak, i vɛks bad te in fukfuk ɔl grap dɔn i bigin provok di Ju man dɛn.

² Usay ɔl in kɔmpin ɛn di sojaman dɛn we kɔmɔt Sameria de, nain i se “Wetin dɛn daydo Ju man tink se dɛn de du? Dɛn go ebul bil di wɔl bak? Dɛn go ebul mek sakrifays? Dɛn go tek wangren de fɔ dɔn di wok? Dɛn ston de we dɔn bɔn ɛn nyamanyama, wetin dɛn go ebul du wit dɛn?”

³ Tobaya, da Amonayt man bin de nia am, so in se, “If fɔks sɛf vɛks i go ib di wɔl dɔŋ.”

⁴ A pre se, “PAPA GƆD, duya yɛri we dɛn de provok wi. Mek ɔl wetin dɛn se, tɔn bak pan dɛn ɛn mek dɛn kech dɛn ɛn kɛr dɛn go na ɔda kɔntri bay fos.

⁵ Mek dɛn nɔ go skɔchfri, pɔnish dɛn fɔ di sin we dɛn kɔmit bay aw dɛn de provok yu we dɛn de provok dɛn wan dɛn we de bil.”

⁶ So wi bil di wɔl bak te i rich af di ayt we i bin gɛt bikɔs di pipul dɛn bin de wok wit ɔl dɛn at.

⁷ Bɔt we Sanbalat, Tobaya, dɛn Arab man dɛn ɛn Amonayt dɛn wit di man dɛn we kɔmɔt Ashdɔd dɛn yɛri se wi kɔntinyu fɔ bil di wɔl bak ɛn lɔk lɔk ɔl usay bin opin, dɛn vɛks bad, bad wan.

⁸ Dɛn bigin mek plan fɔ kam togɛda kam atak Jerusɛlɛm, fɛt ɛn kɔz trɔbul.

⁹ So wisɛf pre to PAPA GƆD ɛn put sikyɔriti fɔ de de, de ɛn nɛt fɔ brakɛt dɛn.

¹⁰ Da sem tɛm de, di pipul dɛn we kɔmɔt Juda bigin kɔmplen se dɛn nɔ go ebul du di wok bikɔs di dɔti tu bɔku ɛn dɛn dɔn de taya.

¹¹ Wi ɛnimi dɛnsɛf se, bifo wi de mekɔp, dɛn go dɔn dil wit wi dɔn kil wi ɛn tap di wok

¹² Di Juman dɛn we bin de nia di ɛnimi dɛn kam tɛl wi bɔt sɔm tɛn tɛm se ɛnisay wi tɔn, di ɛnimi dɛn go atak wi.

¹³ Dat mek a taytin di sikyɔriti. A put sɔm pipul fɔ de to di say dɛn we lo na di wɔl usay ɛnibɔdi kin si. A put dɛn bay famili ɛn ɔlman bin gɛt in sɔd, spia ɛn bo rɛdi fɔ fɛt.

¹⁴ A sidɔm luk pin nain a tɛl dɛn se, “Una nɔ fred nɔbɔdi. Una mɛmba se PAPA GƆD big ɛn wɔndaful. I gɛt pawa ɛn du fɔ fred so una fɛt fɔ una brɔda, pikin, wɛf ɛn ɔlman na una os dɛn.”

¹⁵ Wɛn wi ɛnimi dɛn no se wi dɔn fent pan dɛn plan ɛn PAPA GƆD dɔn kɔmɔt biɛn dɛn, wi ɔl jɛs go bak ɛn kɔntinyu di wok we wi bin de du na di wɔl.

¹⁶ Frɔm da de de, af mi man dɛn de wok, dɔn di ɔda af dɛn ol sɔd, spia ɛn bo fɔ fɛt ɛn big shild ɛn fɛt klos we sɔd nɔ de pas. Di ɔfisa dɛn bin de biɛn di pipul dɛn we kɔmɔt Juda as dɛn

¹⁷ bin de bil di wɔl. Di man dɛn we bin de tot di difrɛn matirial dɛn bin de wok wit wan an, dɔn dɛn ol dɛn wɛpɔn na di ɔda an.

¹⁸ Dɔn di wan dɛn we bin de bil, wɛr dɛn sɔd pan dɛnsɛf na dɛn sayd dɛn as dɛn de wok. Di man we bin de fɔ blo di trɔmpɛt in kes ɔf eniɔla, in lɛf wit mi.

¹⁹ So a tɛl di aristo dɛn, di ɔfisa dɛn ɛn ɔl di balans pipul se, “Di wok de muv fast, wi de wok ɔlsay na di wɔl na difrɛn difrɛn say we nɔ de nia,

²⁰ so ɛnitɛm una yɛri di trɔmpɛt, una fɔ go usay di sawnd kɔmɔt. Na PAPA GƆD go fɛt fɔ wi.”

²¹ Wi kɔntinyu fɔ wok wit wan af pan di man dɛn wit dɛn spia fɔ fɛt. Dɛn kin ol dɛn spia frɔm do klin na mɔnin te do dak.

²² Da sem tɛm de a tɛl di wokman dɛn se ɔlman, wɛda yu na bɔs ɔ na ɛp yu de ɛp, fɔ lɛf insay Jerusɛlɛm we nɛt kam so dat dɛn go bi nayt sikyɔriti ɛn du dɛn wok dɛn santɛm.

²³ Misɛf, mi brɔda dɛn ɛn mi yon wokman dɛn ɛn di sikyɔriti dɛn we bin de wit mi nɔ pul klos sɛf da tɛm de. Ivin we dɛn kin go gɛt wata, dɛn de ol dɛn wɛpɔn na dɛn an.