Nɛimaya 3 - Krio Fɔs Oli Baybul

Dɛn Bil Di Wɔl Rawnd Jerusɛlɛm Bak

¹ Ilaɛlashib, di bigman fɔ ɔl di man dɛn we de mek sakrifays fɔ pipul dɛn sin, ɛn di ɔda man dɛn we kin mek sakrifays fɔ pipul sin jɔyn an fɔ wok. Dɛn bil di Ship Get. Dɛn dɛdiket am. Dɛn put di do dɛn usay dɛn fɔ de ɛn dɛdiket am. Dɛn bil ɛn dɛdiket di wɔl te rich Tawa ɔf di Ɔndrɛd ɛn te rich Ananɛl Tawa.

² Di pipul we kɔmɔt Jɛriko bin de bil nɛks to dɛn, dɛn Zakɔ, Imri in bɔypikin bin de nia di wan dɛn we kɔmɔt Jɛriko.

³ Asɛnaa in pikin dɛn, na dɛn bil di Fish Get bak. Dɛn put ɔl di ebi ebi bod dɛn we dɛn go yuz, fiks di do dɛn, di bolt dɛn ɛn di krɔs ba dɛn.

⁴ Nɛks to dɛn na Mɛrimɔth we na Yuraya in bɔypikin ɛn Akɔz na bin in grampa. In bin de wok nain yon sɛkshɔn na di wɔl. Nia am na Mɛshulam, we in papa na Bɛrɛkaya ɛn in grampa na Mɛshɛzabɛl, bin de wok. Nɛks to Mɛshulam na de Zedɔk, Baanain bɔypikin bin de.

⁵ Nɛks to Zedɔk, na di pipul dɛn we kɔmɔt Tɛkoa bin de. Di aristo dɛn we kɔmɔt Tɛkoa nɔ bin gri du natin bikɔs dɛn nɔ bin want fɔ tek ɔda frɔm udat dɛn bin de supavays dɛn.

⁶ Jɔyada, Pasɛa in bɔypikin ɛn Mɛshulam, Bɛsodeaya in bɔypikin mek Jɛshana Get Bak dɛn put di ebi ebi do dɛn, di bolt dɛn ɛn krɔs di ba dɛn usay dɛn fɔ de.

⁷ Nɛks to dɛn nain man dɛn we kɔmɔt Gibiɔn ɛn Mizpa bin de wok. Dɛn na bin man dɛn we na di bigman dɛn na di wɛstɛn say na Riva Yufretis bin de supavays. Mɛlataya kɔmɔt Gibiɔn dɛn Jadɔn in kɔmɔt Mɛrɔnɔth.

⁸ Nɛks to dɛn na Uziɛl. Uziɛl na bin Araya in bɔypikin ɛn na bin goldsmit. Afta am nain Ananaya we bin de mek ɛn sɛl pafyum bin de wok. Dɛn ebul bil di wɔl na Jerusɛlɛm bak te rich Brɔd Wɔl.

⁹ Ɔ in bɔypikin, Refaya, we de rul af pat na Jerusɛlɛm nain bil di nɛks sɛkshɔn, nia Ananaya bak.

¹⁰ Jɛdaya we na bin Arumaf in bɔypikin jɛs wok pan di ajɔni we de ɔpozit in os. Nɛks to am, na de Atush we na Ashabnia in bɔypikin wok.

¹¹ Malkija we na Arim in bɔypikin, ɛn Ashɔb we na Paath-Moab in yon bɔypikin na dɛn mek Tawa ɔf di Ovin dɛn bak, we bin de nia usay Refaya bil plɔs wan ɔda sɛkshɔn pan di wɔl.

¹² Shalɔm, we na Aloɛsh in bɔypikin ɛn de rul di ɔda af pat pan Jerusɛlɛm, bil di nɛks sɛkshɔn. Nain gyal pikin dɛn ɛp am wok.

¹³ Enɔn ɛn di ɔda pipul dɛn we kɔmɔt Zanoa, na dɛn mek di nɛks sɛkshɔn, we na di Vali Get bak. Dɛn bil am bak ɛn put di do dɛn, di bolt dɛn ɛn di krɔs ba dɛn usay dɛn fɔ de. Dɔn dɛn ɛp mek pat pan di wɔl te rich Dɔŋ Get. Na bin wan tawzin fayv ɔndrɛd fut lɔŋ.

¹⁴ Na Malkija, we na Rekab in bɔypikin mek di Dɔŋ Get bak. Malkija nain bin de rul na Bɛth Akerɛm. I put di do dɛn, di bolt dɛn ɛn di krɔs ba dɛn usay dɛn fɔ de.

¹⁵ Shalɔm we na Kolozɛ in bɔypikin we de rul na Mizpa, nain mek di Fawnten Get bak. I bil am bak, put ruf pan am ɛn fiks di do dɛn, di bolt dɛn ɛn di krɔs ba dɛn usay dɛn fɔ de. Nain mek di wɔl we de rawnd di pul na Siloam we bin de nia di kiŋ in gadin te rich usay di stɛp dɛn de we yu de kɔmɔt na Devid in siti.

¹⁶ Nia am, Nɛimaya we na Azbɔk in bɔypikin we bin de rul af pat pan Bɛth Zɔ distrikt, mek te rich wan pɔynt we de ɔpozit Kiŋ Devid in famili grev te rich di ples we dɛn mek lɛkɛ pul fɔ kip wata ɛn di barik we dɛn bin mek fɔ dɛn tɔf sojaman dɛn.

Dɛn Livayt Dɛn We Bil Di Wɔl

¹⁷ Nia Nɛimaya, sɔm Livayt dɛn bil da say de pan di wɔl ɛn na Rium we na Bani in bɔypikin bin de supavays dɛn. Dɛn Ashabaya bin de nia dɛn. In bin de supavays di wok fɔseka di distrikt we i kɔmɔt. Ashabaya bin de rul af pat pan Kiila distrikt.

¹⁸ Sɔm ɔda man dɛn we kɔmɔt na di ɔda af pat na Kiila distrikt, usay Binyui in bin de rul, mek di say we de nia usay Ashabaya bin de.

¹⁹ Ɛza, Jɛshwa in bɔypikin, nain bin de nɛks ɛn in bin de wok pan di sɛkshɔn na di wɔl we de ɔpozit usay dɛn bin de kip dɛn wɛpɔn dɛn te go ɔp to usay mek lɛkɛ aŋul.

²⁰ Afta am, Barak bin de wok. Barak na Zabay in bɔypikin ɛn in bin de wok pan wan ɔda sɛkshɔn we na frɔm di aŋul we Ɛza tap te rich di say na di wɔl we de to Ilaɛlashib in domɔt. Ilaɛlashib na bin bigman fɔ dɛn man we de mek sakrifays fɔ pipul sin.

²¹ Mɛrimɔth, Yuraya in bɔypikin ɛn Akɔz in grampikin, nain bin de nɛks to am. In bin de wok pan di ɔda sɛkshɔn we bigin na Ilaɛlashib in domɔt te i du di wanol ples usay Ilaɛlashib in os de.

Dɛn Man Dɛn We De Mek Sakrifays Fɔ Pipul Sin We Bil Di Wɔl

²² Dɛn man dɛn we de mek sakrifays fɔ pipul sin we de na di eria, na dɛn wok nia Mɛrimɔth.

²³ Afta am, Bɛnjamin, Ashɔbɛn, Azaraya we na Maasia in bɔypikin ɛn Anania in grampikin, wok pan di pat na di wɔl we de ɔpozit dɛn os dɛn.

²⁴ Afta dɛn, Binyui we na Ɛnadad in bɔypikin bil di ɔda sɛkshɔn frɔm Azaraya in os te rich di ɔda aŋul bay di kɔna.

²⁵ Palal, Uzay in bɔypikin in wok pan di say na di wɔl we de na do frɔm di kiŋ in os nia di kɔmpawnd usay di sikyɔriti de. Nɛks to am na Pɛdaya we na Parɔsh in bɔypikin ɛn dɛn man we bin de wok na PAPA GƆD in os wok de.

²⁶ Di wokman dɛn na PAPA GƆD in os bin tap na Ofɛl Il ɛn dɛn wok te rich di pɔynt we de ɔpozit Wata Get we yu de go na di ist ɛn di tawa we kɔmɔt na do.

Ɔda Pipul Dɛn We Bil

²⁷ Di man dɛn we kɔmɔt Tɛkoa, na dɛn mek di nɛks sɛkshɔn. Da wande na frɔm di wɔndaful tawa we kɔmɔt na do te rich di wɔl na Ofɛl.

²⁸ Di man we de mek sakrifays fɔ pipul sin wok frɔm di Ɔs Get te de go ɔp. Dɛn ɔl bin de bil na di sɛkshɔn na di wɔl we de ɔpozit dɛn os dɛn.

²⁹ Zedɔk, Ima in bɔypikin insɛf bil nɛks to dɛn, na di say we de ɔpozit in os. Shɛmaya, we na Shɛkanaya in bɔypikin ɛn sikyɔriti na di Ist Get insɛf wok pan di wɔl.

³⁰ Dɔn Ananaya bin de nɛks to am. Ananaya na Shelɛmaya in bɔypikin. In ɛn Anɔn we na Zalaf in nɔmba siks bɔypikin wok na da ɔda sɛkshɔn de. Mɛshulam bin de nɛks ɛn in wok na di say we de ɔpozit usay i bin tap. Mɛshulam na Bɛrɛkaya in bɔypikin.

³¹ Nia am na Malkija, wan pan di goldsmit dɛn wok de. In bil di pat pan di wɔl te rich usay di wokman dɛn na PAPA GƆD in os ɛn treda dɛn os we de ɔpozit di Inspɛkshɔn Get te rich di rum we de bay di kɔna.

³² Di ɔda goldsmit dɛn ɛn treda dɛn wok frɔm da kɔna de te rich usay dɛn kɔl Ship Get.