Nɛimaya 2 - Krio Fɔs Oli Baybul

Di Kiŋ Sɛn Nɛimaya Go Na Jerusɛlɛm

¹ Twɛnti ia afta Kiŋ Atazaksis bin dɔn bigin rul, insay di mɔnt we dɛn kɔl Nisan, da sem ia de a go fɔ sav di kiŋ wayn wande. A nɔ dɔn yus fɔ sawa mi fes bifo di kiŋ. Bɔt i kam bi se, a sawa mi fes da de de.

² So di kiŋ aks mi wetin mek a mek mi fes so we a nɔ sik. I se, “I mɔs bi se yu at nɔ swit.” A skyad,

³ bɔt a tɛl di kiŋ se, “Pa, mek yu gɛt lɔŋ layf! Aw mi at go swit we di siti we dɛn bɛr mi pipul dɛn dɔn pwɛl kpatakpata ɛn faya sɛf dɔn bɔn di get dɛn?”

⁴ Di kiŋ aks mi wetin a want. Dɛn a jɛs pre kwik wan to PAPA GƆD na ɛvin ɛn

⁵ ansa di Kiŋ se, “If yu gladi wit wetin a de du ɛn want fɔ ɛp mi, gi mi pamishɔn fɔ go Juda usay di grev dɛn we dɛn bɛr mi pipul dɛn de. Mek a go si if a kin go bil di siti bak.”

⁶ Di kiŋ in wɛf bin sidɔm nia am. So di kiŋ aks mi aw lɔŋ a de go fɔ ɛn ustɛm a plan fɔ kam bak. A tɛl am. Di kiŋ gladi fɔ mek a go ɛn a fiks tɛm we a go lɛf.

⁷ A tɛl di kiŋ se, if i gladi fɔ ɛp mi, mek i gi mi lɛta dɛn we a go sho di edman dɛn na di wɛstɛn say na Riva Yufretis so dat dɛn nɔ go ambɔg mi we a de pas insay dɛn siti dɛn we a de go Juda.

⁸ A aks bak fɔ ɔda lɛta fɔ gi Esaf, di man we de luk afta di kiŋ in fɔrɛst, so dat i go gi mi bod fɔ di get dɛn na PAPA GƆD in os, bod fɔ di wɔl na di siti ɛn bod fɔ tek bil di os we a fɔ tap. Di kiŋ gri fɔ du ɔl wetin a aks am bikɔs PAPA GƆD bin de wit mi.

⁹ I ivin mek a go wit sɔm ami ɔfisa dɛn ɛn sɔm man dɛn we bin de rayd ɔs. We a rich di wɛstɛn say na Riva Yufretis, a gi di edman dɛn di lɛta dɛn we di kiŋ bin gi mi.

¹⁰ We Sanbalat, di man we kɔmɔt na Orɔn ɛn Tobaya we na ɔfisa na Amɔn eria, yɛri se a dɔn kam, dɛn vɛks bad fɔ no se sɔmbɔdi dɔn kam fɔ ɛp di Izrɛlayt dɛn.

¹¹ A go Jerusɛlɛm ɛn we a dɔn de de fɔ tri de,

¹² a kɔmɔt midul nɛt wit sɔm man dɛn. Da tɛm de a nɔ bin tɛl nɔbɔdi yet bɔt wetin PAPA GƆD bin dɔn put na mi at fɔ du fɔ Jerusɛlɛm. Nɔn ɔda animal nɔ bin de pas di wan nɔmɔ we a bin de rayd pan.

¹³ Na nɛt a go inspɛkt di wɔl we fɔdɔm na Jerusɛlɛm ɛn di get dɛn we faya bɔn. A pas na di Vali Get bay Jakal Wɛl nia di Dɔŋ Get.

¹⁴ Dɛn a go to di Fawnten Get ɛn di ples we dɛn kɔl Kiŋ's Pul bɔt di rod bin so bad dat mi dɔŋki nɔ bin ebul fɔ waka de. So na nɛt, a pas bay di vali fɔ go inspɛkt di wɔl,

¹⁵ dɔn a yuz di Vali Get fɔ tɔn bak.

¹⁶ Di bigman dɛn nɔ bin no usay ɛn usay a dɔn go ɛn wetin a bin de du, bikɔs, da tɛm de, a nɔ bin tɛl di Ju man dɛn, dɛn man we de mek sakrifays fɔ pipul sin, dɛn aristo dɛn ɔ ɛni bigman ɛn ɛnibɔdi sɛf we gɛt fɔ ɛp du di wok.

¹⁷ We a dɔn dɔn di inspɛkshɔn, a tɛl dɛn se, “Una si di kayn waala we wi de pan: Jerusɛlɛm dɔn pwɛl, kpatakpata, faya dɔn bɔn in get dɛn. Una kam mek wi jɔyn an fɔ bil di wɔl rawnd Jerusɛlɛm bak, mek pipul dɛn lɛf fɔ laf wi.”

¹⁸ A tɛl dɛn bak aw PAPA GƆD dɔn de ɛp mi ɛn wetin ɛn wetin mi ɛn di kiŋ tɔk. Dɛn ansa se, “Mek wi bigin di wok wantɛm.” So dɛn pik zil ɛn bigin du di gud wok.

¹⁹ Bɔt as Sanbalat, Tobaya ɛn Gishɛm we na Arab man, yɛri so bɔt dat dɛn bigin provok dɛn ɛn aks se, “Na wetin una de bil? Na ku una want mek pan di kiŋ ɛ?”

²⁰ Nain a tɛl dɛn se, “Di GƆD we de ɔp na ɛvin go gi wi viktri. Wi, we nain pikin dɛn go bigin bil bak, una nɔ gɛt biznɛs de bikɔs i nɔ gɛt fɔ bɛnifit una as una nɔ gɛt natin fɔ du wit wetin bi na Jerusɛlɛm.”