Nɛimaya 13 - Krio Fɔs Oli Baybul

Dɛn Tɛl Di Fɔrina Dɛn Fɔ Go

¹ Da de de dɛn rid wetin rayt na di Buk ɔf Mozis lawd wan fɔ ɔlman fɔ yɛri. Nain dɛn fɛnɔt se, dɛn rayt de se, dɛn nɔ fɔ mek ɛni Amonayt ɔ Moabayt kam usay PAPA GƆD in pipul dɛn de,

² bikɔs dɛn nɔ bin gi dɛn Izrɛlayt tin fɔ it ɔ wata fɔ drink, bifo dat dɛn aya Belam fɔ swɛ dɛn. Bɔt PAPA GƆD tɔn di swɛ to blɛsin.

³ Wɛn di pipul dɛn yɛri dis, dɛnsɛf tɛl di fɔrina dɛn fɔ kɔmɔt de.

Di Chenj Dɛn We Nɛimaya Mek

⁴ Bifo ɔl dis, Ilaɛlashib, wan pan dɛn man we de mek sakrifays fɔ pipul sin, bin de inchaj ɔf di sto dɛn na PAPA GƆD in os. In ɛn Tobaya bin tayt

⁵ so i bin dɔn gi am wan pan di big rum dɛn we dɛn bin de kip gren we pipul kin gi as ɔfrin ɛn insɛns ɛn dɛn tin dɛn we dɛn de yuz na PAPA GƆD in os ɛn dɛn gren, nyu wayn ɛn ɔyl we dɛn tayth lɛkɛ aw dɛn fɔ du fɔ dɛn Livayt, dɛn wan dɛn we de siŋ ɛn di gɛt man dɛn, plɔs di kɔntribyushɔn dɛn fɔ dɛn man we de mek sakrifays fɔ pipul sin.

⁶ Bɔt wɛn ɔl dis de go ɔn, a nɔ bin de na Jerusɛlɛm bikɔs di ia we mek Kiŋ Atazaksis, di kiŋ na Babilɔn, tati-tu ia as kiŋ, a bin dɔn go bak to am. Afta sɔm tɛm, a tek pamishɔn

⁷ ɛn kam bak na Jerusɛlɛm. We a kam bak, na da tɛm de a no bɔt di bad bad tin we Ilaɛlashib du we i gi wan rum na di kɔmpawnd na PAPA GƆD in os to Tobaya.

⁸ A nɔ bin lɛk dat atɔl so a ib ɔl Tobaya in tiŋs dɛn na do.

⁹ Dɛn a gi ɔda to pipul dɛn fɔ mek di rum klin bifo PAPA GƆD, dɔn a put ɔl wetin fɔ de na PAPA GƆD in os, di gren ɔfrin ɛn insɛns dɛn de bak.

¹⁰ A yɛri igen se, dɛn nɔ gi di tin dɛn we dɛn bin fɔ de gi to di Livayt dɛn ɛn dat ɔl mek di Livayt ɛn dɛn wan we de siŋ na PAPA GƆD in os, dɛn go bak na dɛn fam dɛn.

¹¹ So a tɔk pan di bigman dɛn ɛn aks dɛn wetindu dɛn fɔ fɔgɛt fɔ tek kia ɔf PAPA GƆD in os. Dɔn a sɛn kɔl ɔl di Livayt ɛn dɛn wan we de siŋ fɔ kam bak ɛn a mek sho se dɛn ɔl go na di pɔynt dɛn we dɛn fɔ de.

¹² Ɔlman na Juda briŋ in tayth kam fɔ kip na di sto dɛn. Sɔm na gren, sɔm na nyu wayn dɔn sɔm na ɔyl.

¹³ A put Shelɛmaya, wan pan dɛn man we de mek sakrifays fɔ pipul sin, Zedɔk wan ɔda Ju Lɔ ticha, ɛn Pɛdaya, wan Livayt fɔ de inchaj ɔf di sto. Dɔn a mek Anan, Zakɔ in bɔypikin ɛn Matanaya in grampikin fɔ ɛp dɛn bikɔs dɛn ɔl na man dɛn we ɛnibɔdi kin trɔst. Na dɛn bin rɛspɔnsibul fɔ sheb di sɔplay dɛn to dɛn brɔda dɛn.

¹⁴ PAPA GƆD, duya nɔ fɔgɛt ɔl wetin a de du fethful wan fɔ yu os ɛn in wok.

¹⁵ Da sem tɛm de, nain a si di man dɛn na Juda de mas greps fɔ mek wayn de di de we mek sɛvin we fɔ blo. Dɛn bin ivin de briŋ gren, wayn, greps, fig ɛn ɔda tin dɛn we dɛn lod na dɛn dɔŋki kam de. Dɛn bin de briŋ ɔl dis kam insay Jerusɛlɛm, di de we mek sɛvin we fɔ blo. Dat mek a wɔn dɛn nɔ fɔ sɛl tin fɔ it da de de.

¹⁶ Di man dɛn we kɔmɔt Taya, we tap na Jerusɛlɛm sɛf bin de briŋ fish ɛn ɔlkayn tin fɔ sɛl gi dɛn pipul we kɔmɔt Juda insay Jerusɛlɛm, da de de.

¹⁷ A tɔk pan di aristo dɛn we kɔmɔt Juda ɛn aks dɛn wetindu dɛn de tɔlaret dis kayn wikɛdnɛs.

¹⁸ A se “Una go se una nɔ no se na pwɛl una de pwɛl di de? Noto dis sem kayn we una fɔstɛm pipul dɛn biev we mek PAPA GƆD mek wi de pan prɔblɛm naw? Wi ɛn wi siti? Naw unasɛf want PAPA GƆD fɔ vɛks pan wi we una de pwɛl di de we mek sɛvin we fɔ blo.”

¹⁹ We di ples kin dɔn de dak, di de bifo di de we mek sɛvin we fɔ blo, a kin gi ɔda fɔ mek dɛn lɔk ɔl di get dɛn ɛn tɛl dɛn se, dɛn nɔ fɔ opin dɛn te di de we mek sɛvin we fɔ blo dɔn. A mek shɔ se a put sɔm pan mi yon man dɛn fɔ tan gyad oba di get dɛn so dat dɛn nɔ go briŋ nɔn lod kam insay Jerusɛlɛm, da de de.

²⁰ Wan ɔ tu tɛm, dɛn treda ɛn dɛn ɔda wan dɛn we de sɛl ɔlkayn tin kin slip na do na Jerusɛlɛm.

²¹ Bɔt a wɔn dɛn ɛn tɛl dɛn se if a kech dɛn de slip nia di wɔl igen dɛn go no. Frɔm da tɛm de, dɛn nɔ kam de igen we na di de we mek sɛvin we fɔ blo.

²² Afta ɔltin a tɛl di Livayt dɛn fɔ mek dɛnsɛf klin bifo PAPA GƆD, go ɛn tan gyad oba di get dɛn fɔ kip di fɔ pre ɛn blo oli. PAPA GƆD, duya nɔ fɔgɛt mi bak fɔ dis. Sho mi yu masi we bɔku lɛkɛ aw di lɛk we yu lɛk wi bɔku.

²³ Pan ɔl dis, da tɛm de, a si man dɛn we kɔmɔt Juda we dɔn mared uman dɛn we kɔmɔt Ashdɔd, Amɔn ɛn Moab.

²⁴ Bɔku pan dɛn pikin dɛn bin de tɔk di laŋwej na Ashdɔd ɔ dɛn ɔda laŋwej bɔt dɛn nɔ bin sabi tɔk di laŋwej na Juda.

²⁵ A tɔk pan dɛn ɛn swɛ dɛn. A bit sɔm pan di man dɛn ɛn rut dɛn ia. A mek dɛn fɔ swɛ na PAPA GƆD in nem se, dɛn nɔ go mek dɛn gyal pikin dɛn mared fɔrina ɛn dɛnsɛf ɔ dɛn bɔypikin dɛn, nɔ go mared fɔrina. A aks dɛn se,

²⁶ “Noto dat mek Kiŋ Sɔlɔmɔn we na bin kiŋ na Izrɛl sin?” A se, “Pan ɔl dɛn kiŋ dɛn we bin de, nɔn nɔ bin tan lɛkɛ am. PAPA GƆD bin lɛk am ɛn mek am Kiŋ na Izrɛl bɔt na uman dɛn we na fɔrina dɛn mek i sin.

²⁷ Wi nɔ fɔ yɛri se una de du dis sem tin we de mek una ɔnfetful to PAPA GƆD we una de go mared uman dɛn we na fɔrina.”

²⁸ Wan pan Jɔyada in bɔypikin ɛn Ilaɛlashib we na di bigman fɔ ɔl dɛn man we de mek sakrifays fɔ pipul sin, na bin Sanbalat, da Oronayt in sɔnɛnlɔ, so a drɛb am kɔmɔt nia mi.

²⁹ PAPA GƆD, duya, mɔs mɛmba se na dɛn man ya we de mek sakrifays fɔ pipul sin pwɛl wetin dɛn bin dɔn swɛ se dɛn go du, dɛn wok ɛn dɛn Livayt dɛn.

³⁰ So a mek shɔ se di man dɛn we de mek sakrifays fɔ pipul sin ɛn di Livayt dɛn nɔ gɛt natin we fɔrin, a mek dɛn klin bifo PAPA GƆD ɛn put ɔlman usay dɛn fɔ de ɛn gi ɔlman wetin i fɔ du. Ɔlman bin gɛt in yon wok.

³¹ A igen mek shɔ bak se di wan dɛn we fɔ kɔntribyut wud dɛn du am di tɛm we dɛn fɔ du am ɛn di wan dɛn we fɔ gi di fɔs frut dɛn we dɛn avɛst de du am. PAPA GƆD, duya, gi mi fevɔ.