Nɛimaya 12 - Krio Fɔs Oli Baybul

Di Man Dɛn We De Mek Sakrifays Fɔ Pipul Sin Ɛn Di Livayt Dɛn

¹ Dis na di man dɛn we de mek sakrifays fɔ pipul sin ɛn dɛn Livayt we tɔn bak wit Zɛrubabɛl we na Oyialtiɛl in bɔypikin ɛn wit Jɛshwa: Seraya, Jɛrimaya, Ɛzra,

² Amaraya, Malɔk, Atush,

³ Shɛkanaya, Rium, Mɛrimɔth,

⁴ Ido, Ginɛthɔn, Abija,

⁵ Mijamin, Maadaya, Bilga,

⁶ Shɛmaya, Jɔyarib, Jɛdaya,

⁷ Salu, Amɔk, Ilkaya ɛn Jɛdaya. Dɛn na bin di man dɛn we de mek sakrifays fɔ pipul sin dɛn lida dɛn ɛn dɛn wan we bin de wok nia dɛn Jɛshwa, in yon tɛm.

⁸ Di Livayt dɛn na Jɛshwa, Binyui, Kadmiɛl, Shɛrɛbaya, Juda ɛn Matanaya sɛf we in ɛn in yon pipul dɛn we bin de nia am, bin de inchaj ɔf di siŋ dɛn we dɛn de siŋ fɔ tɛl PAPA GƆD tɛnki.

⁹ Bakbukaya ɛn Yuni dɛn wan dɛn we bin de nia dɛn tinap ɔpozit dɛn we dɛn de du dɛn wok.

Jɛshwa Di Bigman Fɔ Dɛn Man Dɛn We De Mek Sakrifays Fɔ Pipul Sin in Jɛnareshɔn.

¹⁰ Jɛshwa na Jɔyakim in papa, Jɔyakim na Ilaɛlashib in papa, Ilaɛlashib na Jɔyada in papa,

¹¹ Jɔyada na Jonɛtan in papa dɔn Jonɛtan in na Jadwa in papa

Di Big Wan Dɛn Pan Dɛn Wan We De Mek Sakrifays Fɔ Pipul Sin

¹² Dyurin Jɔyakim in tɛm, na dɛn pipul ya bin de ɛd dɛn famili ya we na dɛn man we de mek sakrifays fɔ pipul sin dɛn famili dɛn: na Seraya in famili, yu gɛt Mɛraya as ɛd; na Jɛrimaya in famili, yu gɛt Ananaya as ɛd;

¹³ na Ɛzra in famili, yu gɛt Mɛshulam as ɛd; na Amaraya in famili, yu gɛt Jɛoanan as ɛd;

¹⁴ na Malɔk in famili, yu gɛt Jonɛtan as ɛd; na Shɛkanaya in famili, yu gɛt Josɛf as ɛd;

¹⁵ na Arim in famili, yu gɛt Adna as ɛd; na Mɛrimɔth in famili, yu gɛt Ɛlkay as ɛd;

¹⁶ na Ido in famili, yu gɛt Zɛkaraya as ɛd; na Ginɛthɔn in famili, yu gɛt Mɛshulam as ɛd;

¹⁷ na Abija in famili, yu gɛt Zikray as ɛd; na Miniamin ɛn Modaya dɛn famili, yu gɛt Piltay as ɛd;

¹⁸ na Bilga in famili, yu gɛt Shamua as ɛd; na Shɛmaya in famili, yu gɛt Jɛonathan as ɛd;

¹⁹ Jɔyarib nain famili, yu gɛt Matɛnayas as ɛd; na Jɛdaya in famili, yu gɛt Uzi as ɛd;

²⁰ na Salu in famili, yu gɛt Kalay as ɛd; na Amɔk in famili, yu gɛt Eba as ɛd;

²¹ na Ilkaya in famili, yu gɛt Ashabaya as ɛd; na Jɛdaya in famili, yu gɛt Netanɛl as ɛd;

Dɛn Man Dɛn We De Mek Sakrifays Fɔ Pipul Sin Ɛn Dɛn Livayt Dɛn Famili Rɛkɔd Dɛn

²² Di tɛm we Kiŋ Dariɔs we na Pashia de rul, na da tɛm de dɛn rayt di nem dɛn dɔŋ ɔf ɔl dɛn wan we na bin di Livayt dɛn famili ɛd dyurin Ilaɛlashib, Jɔyada, Joanan ɛn Jadwa dɛn yon tɛm. Na da sem tɛm de dɛn rayt dɛn man we de mek sakrifays fɔ pipul sin dɛn nem dɛn dɔŋ.

²³ Dɛn pipul we na famili ɛd na Livay in jɛnareshɔn te rich Joanan we na Ilaɛlashib in bɔypikin in tɛm, dɛn nem rayt dɔŋ insay di ɔfishal istri buk we dɛn de kɔl “di buk ɔf di anals.”

Dɛn Gi Ɔlman Wetin I Fɔ Du Na PAPA GƆD In Os

²⁴ Di Livayt dɛn bigman dɛn na Ashabaya, Sherɛbaya, Jɛshwa we na Kadmiɛl in bɔypikin ɛn di wan dɛn we kin de nia dɛn. Dɛn man dɛn ya kin tinap ɔpozit dɛn fɔ de prez ɛn tɛl PAPA GƆD tɛnki. Wan sɛt kin de ansa di ɔda sɛt, lɛkɛ aw dɛn kin de rid rɛspɔnsorial Sam, jɛs lɛkɛ aw Devid, PAPA GƆD in man bin dɔn se.

²⁵ Matanaya, Bakbukaya, Obadaya, Mɛshulam, Talmɔn ɛn Akɔb na bin di getman dɛn fɔ di sto dɛn get dɛn.

²⁶ Dɛn bin de de Jɔyakim, Nɛimaya di gɔvna ɛn Ɛzra we na Ju Lɔ ticha ɛn na wan pan di man we de mek sakrifays fɔ pipul sin dɛn dɛn yon tɛm Jɔyakim na bin Jɛshwa in bɔypikin dɔn Jɛshwa in na bin Jozadak in bɔypikin.

Nɛimaya Dɛdiket Di Siti Wɔl

²⁷ We di tɛm rich fɔ dɛdiket di wɔl, dɛn go fɛn ɔl di Livayt dɛn, pul dɛn usay dɛn tap ɛn briŋ dɛn kam na Jerusɛlɛm. Dɛn gɛt fɔ sɛlibret ɛn fɔ mek di gladi soba, dɛn gɛt fɔ yuz ɔlkayn tin we de mek myuzik as dɛn go de siŋ dɛn siŋ we na fɔ prez ɛn tɛl PAPA GƆD tɛnki.

²⁸ Dɛn briŋ dɛn wan dɛnsɛf we de siŋ kam insay Jerusɛlɛm. Dɛn bin dɔn bil vilej fɔ dɛnsɛf na di Nɛtofatayt dɛn vilej ɛn

²⁹ Bɛth Gilgal we de rawnd Jerusɛlɛm. Na frɔm dɛn vilej dɛn de ɛn di Giba ɛn Azmavɛth eria dɛn go pul dɛn.

³⁰ We dɛn man dɛn we de mek sakrifays fɔ pipul sin ɛn di Livayt dɛn dɔn mek dɛnsɛf klin bifo PAPA GƆD, dɛn du di sem tin dɛn to di ɔda pipul dɛn, di get dɛn ɛn di wɔl.

³¹ A mek di bigman dɛn na Juda go pantap di wɔl. Dɔn a gɛt tu big kwaya fɔ de tɛl tɛnk. Wan pan dɛn go pantap di wɔl ɛn bigin waka go na di rayt usay di dɔtibɔks de.

³² Oshaya ɛn sɔm pan di Juda bigman dɛn fala dɛn,

³³ Azaraya, Ɛzra, Mɛshulam,

³⁴ Juda, Bɛnjamin, Shɛmaya ɛn Jɛrimaya bin go wit dɛn;

³⁵ sɔm pan dɛn man dɛn we de mek sakrifays fɔ pipul sin sɛf go wit dɛn bɔt dɛn bin ol trɔmpɛt we na myuzikal instrumɛnt; dɔn wit Zɛkaraya we na Jonɛtan in bɔypikin bɔt Jonɛtan na bin Shɛmaya in yon bɔypikin ɛn Matanaya in grampikin dɔn Matanaya na Mikaya in bɔypikin, Mikaya na Zakɔ in bɔypikin ɛn Esaf in grampikin.

³⁶ In ɛn di wan dɛn we de wok nia am, Shɛmaya, Azarɛl, Milalay, Gilalay, Maaya, Netanɛl, Juda ɛn Anani wit dɛn yon myuzikal instrumɛnt dɛn lɛkɛ aw Devid, PAPA GƆD in man se, bin de wit da grup de. Na Ɛzra we na dɛn Ju Lɔ ticha lid di machpas.

³⁷ We dɛn rich di Fawnten Get dɛn go ɔp dayrɛkt to di stɛp dɛn na Devid in siti bay di ɔp pat na di wɔl we pas pantap Devid in os go to di Wata Get we de na di ist.

³⁸ Di sɛkɛn kwaya in waka go na di ɔpozit dayrɛkshɔn, dat na di lɛft. A fala dɛn go pantap di wɔl wit af pan di pipul dɛn. Wi pas di Ovin Dɛn Tawa go to di Brɔd Wɔl

³⁹ oba di Ifrem Get, di Jɛshana Get, di Fish Get, di Ananɛl Tawa ɛn di Tawa ɔf di Ɔndrɛd te rich di Ship Get. We dɛn rich di Sikyɔriti Get nain dɛn tinap.

⁴⁰ Di tu kwaya dɛn we bin de tɛl tɛnki go usay dɛn sɔpoz fɔ de insay PAPA GƆD in os. Misɛf ɛn sɔm pan di bigman dɛnsɛf du so;

⁴¹ Ɛliakim, Maasia, Miniamin, Mikaya, Ɛlioenay, Zɛkaraya ɛn Ananaya we na man dɛn we de mek sakrifays fɔ pipul sin, dɛnsɛf go usay dɛn fɔ de fɔ blo dɛn trɔmpɛt;

⁴² Maasia, Shɛmaya, Ɛlieza, Uzi, Jɛoanan, Malkija, Ilam ɛn Ɛza dɛnsɛf jɔyn dɛn. Di kwaya dɛn siŋ ɛn na Jɛzraaya na bin dɛn kɔndɔktɔ.

⁴³ Da de de, dɛn gladi bad as PAPA GƆD mek dɛn kɔmɔt bush. Dɛn mek bɔku difrɛn difrɛn sakrifays dɛn to PAPA GƆD. Di uman dɛn ɛn dɛn pikin dɛnsɛf jɔyn dɛn fɔ gladi. If yu de fawe frɔm Jerusɛlɛm sɛf, yu go yɛri di nɔys we dɛn de mek we dɛn de gladi.

Dɛn Mek Shɔ Se Tin Dɛn De We Dɛn Go Yuz Fɔ Wɔship PAPA GƆD Na In Os

⁴⁴ Da sem tɛm de, dɛn pik man dɛn we go de inchaj ɔf di sto dɛn we dɛn kip di kɔntribyushɔn dɛn, dɛn fɔs tin dɛn we dɛn avɛst ɛn dɛn tayth dɛn. Dɛn bin sɔpoz fɔ de briŋ di pat we dɛn man we de mek sakrifays fɔ pipul sin ɛn dɛn Livayt dɛn fɔ gɛt. Na so di lɔ se. Juda in fambul dɛn bin gladi wit dɛn man we de mek sakrifays fɔ pipul sin ɛn dɛn Livayt dɛn.

⁴⁵ Dɛn pas ɔl di sɛrimɔni we PAPA GƆD want ɛn di wan we go mek dɛn klin bifo PAPA GƆD we dɛn man dɛn we de siŋ ɛn di getman dɛn bin dɔn du jɛs lɛkɛ aw Devid ɛn in bɔypikin Sɔlɔmɔn bin dɔn ɔda dɛn.

⁴⁶ Frɔm we Devid ɛn Esaf bin de lɔntɛm nain dɛn bin gɛt kɔndɔktɔ dɛn fɔ di kwaya ɛn dɛn wan dɛn we de siŋ as dɛn de siŋ dɛn siŋ we na fɔ prez ɛn tɛl PAPA GƆD tɛnki.

⁴⁷ So, naw, we Zɛrubabɛl ɛn Nɛimaya de, ɔlman na Izrɛl de kɔntribyut fɔ lɛ di wan dɛn we de siŋ ɛn di getman dɛn gɛt wetin dɛn de it ɛvride. Dɛn kin kip sɔm fɔ di Livayt dɛn, na kɔna, dɔn di Livayt dɛn kin kip Erɔn in jɛnareshɔn dɛn yon na kɔna.