Nɛimaya 11 - Krio Fɔs Oli Baybul

Di Pipul Dɛn We Tap Na Jerusɛlɛm

¹ Di bigman dɛn sɛtul na Jerusɛlɛm dɔn di balans pipul dɛn aks PAPA GƆD fɔ sho dɛn us famili pan ɛvri tɛn famili fɔ tap insay Jerusɛlɛm, di oli siti, wayls di ɔda nayn fɔ go tap na dɛn yon siti dɛn.

² Di pipul dɛn pre fɔ lɛ PAPA GƆD blɛs ɔl di man dɛn we dɛn nɔ fos fɔ tap na Jerusɛlɛm bɔt dɛn disayd fɔ tap na Jerusɛlɛm bay dɛn yon fri wil.

³ Na di pipul dɛn dis we na bin bigman lɛkɛ D.O. na dɛn ɔplayn we dɛn sɛtul na Jerusɛlɛm. Sɔm ɔdinari pipul, sɔm man dɛn we de mek sakrifays fɔ pipul sin, sɔm Livayt, sɔm wokman na PAPA GƆD in os, sɔm pan Sɔlɔmɔn in wokman dɛn jɛnareshɔn we bin tap na di siti dɛn na Juda, ɔlman go nain yon prɔpati na di difrɛn siti dɛn

⁴ we ɔda pipul dɛn we kɔmɔt to Juda ɛn Bɛnjamin fambul dɛn tap insay Jerusɛlɛm. Di wan dɛn we na Juda in jɛnareshɔn: Athaya we na Uzaya in bɔypikin, Uzaya na Zɛkaraya in bɔypikin, Zɛkaraya na Amaraya in bɔypikin, Amaraya na Shefataya in bɔypikin we na Maalalɛl in yon bɔypikin ɛn in na wan pan Pɛrɛz in yon jɛnareshɔn.

⁵ Dɛn Maasia we na Barak in bɔypikin, Barak na Kol Ozɛ in bɔypikin, Kol Ozɛ na Aazaya in bɔypikin, Aazaya na Adaya in bɔypikin, Adaya na Jɔyarib in bɔypikin we na Zɛkaraya, wan pan Shila in jɛnareshɔn in yon bɔypikin.

⁶ Pɛrɛz in jɛnareshɔn we bin tap insay Jerusɛlɛm, ɔl ɛn ɔl na bin fo ɔndrɛd ɛn siksti-et man dɛn we gɛt maynd.

⁷ Di wan dɛn we na Bɛnjamin in jɛnareshɔn: Salu we na Mɛshulam in bɔypikin, Mɛshulam na Joɛd in bɔypikin, Joɛd na Pɛdaya in bɔypikin, Pɛdaya na Kolaya in bɔypikin, Kodaya na Maasia in bɔypikin, Maasia na Ithiɛl in bɔypikin, Ithiɛl na bin Jɛshaya in bɔypikin.

⁸ Salu bin gɛt pipul dɛn we bin de biɛn am. Dɛn na Gabay ɛn Salay ɛn nayn ɔndrɛd ɛn twɛnti-et ɔda man dɛn.

⁹ Joɛl we na Zikray in bɔypikin, nain na bin dɛn agbagba dɛn Juda we Asɛnwa in yon bɔypikin bin de inchaj ɔf di wanol sɛkɛn distrikt na di siti.

¹⁰ Di wan dɛn we na bin sɔm pan dɛn man dɛn we de mek sakrifays fɔ pipul sin: Jɛdaya; Jɔyarib in bɔypikin; Jakin;

¹¹ Seraya we na Ilkaya in bɔypikin ɛn Ilkaya in na bin Mɛshulam in bɔypikin we na bin Zedɔk in yon bɔypikin we in papa na bin Mɛrayɔth, Ayitɔb in bɔypikin. Ayitɔb na bin supavaysɔ na PAPA GƆD in os.

¹² Dɛn ɛn dɛn wan we bin de nia dɛn fɔ wok na PAPA GƆD in os na et ɔndrɛd ɛn twɛnti tu man dɛn, ɔl ɛn ɔl; Adaya we na Jɛroam in bɔypikin ɛn Jɛroam in na bin Pɛlalay in bɔypikin we na bin Amzi in yon bɔypikin we in papa na bin Zɛkaraya, we na Pashɔ in bɔypikin dɛn, Pashɔ in yon papa na bin Malkija,

¹³ ɛn in yon pipul dɛn we bin de nia am. Dɛn pipul de na bin di big wan dɛn na dɛn famili dɛn. Dat na tu ɔndrɛd ɛn foti-tu man dɛn; Amashay we na Azarɛl in bɔypikin, Azarɛl na bin Mɛshilɛmɔth in bɔypikin we na bin Ima in yon bɔypikin,

¹⁴ ɛn in yon man dɛn we bin de nia am. Dɛn na bin man dɛn we gɛt maynd ɛn na bin dɛn wan ɔndrɛd ɛn twɛnti-et. Dɛn yon agbagba na Zabdiɛl we na Agedolim in bɔypikin.

¹⁵ Dɛn wan dɛn we na Livay in jɛnareshɔn: Shɛmaya na Ashɔb in bɔypikin, ɛn Ashɔb na bin Azrikam in bɔypikin we Ashabaya nain papa ɛn Buni nain grampa.

¹⁶ Shabetay ɛn Jozabad, na bin tu pan di Livayt edman dɛn, we bin de inchaj ɔf di wok we dɛn bin de du na do na PAPA GƆD in os;

¹⁷ Matanaya na Mika in bɔypikin ɛn Mika na Zabdi in bɔypikin we Esaf nain papa. Esaf na di dayrɛktɔ we kin lid dɛn tɛm fɔ pre ɛn tɛl PAPA GƆD tɛnki Bakbukaya, di man we de sɛkɛn pan di man dɛn we de nia am; Abda we na Shamua in bɔypikin ɛn Galal in grampikin Galal in papa na Jɛduthɔn,

¹⁸ Di Livayt dɛn we bin di na di oli siti na tu ɔndrɛd ɛn eti-fo, ɔl ɛn ɔl.

¹⁹ Dɛn wan we na getman dɛn na: Akɔb, Talmɔn ɛn di man dɛn we de nia dɛn we bin de wach di get lɛkɛ sikyɔriti na bin dɛn wan ɔndrɛd ɛn sɛvinti-tu.

²⁰ Sɔm pan di man dɛn we de mek sakrifays fɔ pipul sin ɛn sɔm Livayt bin tap na di siti dɛn na Juda wit ɔda Izrɛlayt dɛn, ɛn dɛn ɔl bin go na dɛn yon prɔpati.

²¹ Di wokman dɛn na PAPA GƆD in os dɛn tap na di il na Ofɛl. Na Zia ɛn Gishpa bin de inchaj ɔf dɛn.

²² Di Livayt dɛn agbagba we bin de insay Jerusɛlɛm na Uzi we na Bani in bɔypikin. Bani na bin Ashabaya in bɔypikin ɛn Matanaya in grampikin. Matanaya in na bin Mika in bɔypikin. Uzi na wan pan Esaf in jɛnareshɔn dɛn we fɔ de siŋ ɛn na dɛn rɛspɔnsibul fɔ di myuzik na PAPA GƆD in os.

²³ Di man dɛn we bin de siŋ bin de tek ɔda frɔm di kiŋ we bin de tɛl dɛn wetin fɔ du ɛvride.

²⁴ Pɛtaya we na Mɛshizabɛl in bɔypikin na wan pan Zɛra we na Juda in bɔypikin in jɛnareshɔn. Nain na bin di pɔsin we bin de tɔk fɔ di kiŋ pan ɔltin we gɛt fɔ du wit di pipul dɛn.

Di Pipul Na Di Ɔda Tɔŋ Ɛn Vilej Dɛn

²⁵ We i kam pan di vilej wit dɛn fam dɛn, sɔm pan di pipul dɛn na Juda tap na Kiriath Aba ɛn di eria, na Dibɔn ɛn in eria, na Jɛkabziɛl ɛn in vilej dɛn,

²⁶ na Jɛshwa, na Molada, na Bɛth Pelɛt,

²⁷ na Aza Shual, na Biashiba ɛn in eria,

²⁸ na Ziklag, na Mɛkona ɛn in eria,

²⁹ na Ɛn Rimɔn, na Zora, na Jamɔth,

³⁰ Zanoa, Adulam ɛn dɛn vilej dɛn na Lakish ɛn in fam dɛn, ɛn na Azika ɛn in eria. So dɛn bin tap ɔlsay frɔm Biashiba te rich di Inɔm vali.

³¹ Bɛnjamin in jɛnareshɔn dɛn we kɔmɔt Giba bin tap na Mikmash, Aija, Bɛthɛl ɛn in eria,

³² na Anatɔt, Nɔb, Anania,

³³ na Ezɔ, Rama ɛn Gitaim,

³⁴ na Adid, Zɛboim ɛn Nibalat,

³⁵ na Lɔd ɛn Ono ɛn na di vali usay dɛn at-man dɛn de.

³⁶ Sɔm pan di Livayt dɛn we kɔmɔt Juda bin tap usay Bɛnjamin in fambul dɛn bin de.