Mayka 6 - Krio Fɔs Oli Baybul

Wetin Du PAPA GƆD Vɛks Pan Izrɛl

¹ Lɛ wi yɛri wetindu PAPA GƆD vɛks pan Izrɛl. I se: lɛ di mawnten ɛn il dɛn kam yɛri wetin i de se.

² Na di mawnten dɛn bin dɔn de frɔm di tɛm we i mek di wɔl, so dɛn fɔ lisin gud to wetin i wan se, as i dɔn rɛdi fɔ tɔk ɔl wetin Izrɛl dɔn du we mek i vɛks pan dɛn.

³ Na PAPA GƆD de tɔk so naw. I se, “Izrɛl, mi pikin dɛn, wetin a du una we una de trit mi so? Una ansa mi nɔ!

⁴ A pul una kɔmɔt pan di slev layf we una bin de pan na Ijipt ɛn sɛn Mozis, Erɔn ɛn Miriam fɔ lid una.

⁵ Mi pikin dɛn, una mɛmba wetin Belak, di kiŋ na Moab bin plan fɔ una ɛn aw Belam we na Beɔ in bɔypikin bin ansa am. Una mɛmba wetin bin apin na rod we una kɔmɔt Akesia fɔ go Gilgal. If una ebul mɛmba dɛn tin ya, una go mɛmba wetin PAPA GƆD du fɔ sev una.”

Wetin PAPA GƆD Want

⁶ Una de aks se wetin una fɔ gi PAPA GƆD naw we una de go wɔship am, in we na di PAPA GƆD we de ɔp yanda. Una de aks if na fɔ bɔn animal as sakrifays ɔ na fɔ gi am fayn yɔŋ kaw dɛn.

⁷ Una aks se if PAPA GƆD go gladi if una gi am wan tawzin man got ɔ fɔ gi am bɔku bɔku ɔyl ɔ na una fɔs pikin dɛn fɔ tek pe di dɛt fɔ una sin so dat una go yuz wetin kɔmɔt pan una bɔdi fɔ pe fɔ di sin.

⁸ Bɔt i dɔn sho una wetin gud ɛn wetin i want. Dat na fɔ lɛ una trit una kɔmpin fia wan, ɛn lɛk fɔ du gud, gɛt lɔv we nɔ de ɛva chenj ɛn put unasɛf dɔŋ fɔ du wetin PAPA GƆD want una fɔ du.

⁹ PAPA GƆD in vɔys de ɔlsay we i de tɛl una se udat fɔ gɛt fred ɛn rɛspɛkt fɔ am, gɛt sɛns. I se, “Na una we gɛda na di siti a de tɔk to.

¹⁰ Aw a go fɔgɛt bɔt dɛn bad pipul dɛn we dɛn os ful wit soso gud tin dɛn we dɛn gɛt bay dɛn rikishi gem?

¹¹ A go se pɔsin we na so so rog wet dɛn de nain bag, ɔ di wan we de lay pan di skel nɔ du natin?

¹² Una man dɛn ɔl we jɛntri, bad, ɛn dɛn de lay lɛk wetin. Tru tɔk nɔ de na dɛn mɔt.

¹³ So misɛf dɔn bigin mek dɛn sɔfa fɔ dɛn sin. Na sik go kil dɛn.

¹⁴ Una go it bɔt dat nɔ go min natin to una bikɔs una go stil aŋri, una go kip tin dɛn bɔt i go bi fɔ natin bikɔs ɔl wetin una kip go pwɛl na wa.

¹⁵ We una plant ɛnitin i nɔ go gro, una nɔ go ivin ebul fɔ yuz di ɔyl we una kwis dɔn una nɔ go drink di wayn we una mek.

¹⁶ Ɔl dis go bi bikɔs una fala wetin Omri de du ɛn ɔl di bad we Eab sɛf de du; ɛn bikɔs ɔf dat, a go mek dɛn ɔda pipul dɛn sɔktit we dɛn si una bikɔs una go dɔn alaki.”