Mayka 5 - Krio Fɔs Oli Baybul

¹ I se dɛn dɔn sɔrawnd dɛn na dɛn siti we gɛt wɔl ɛn dɛn dɔn bit dɛn bigman sɛf ɛn gi am dɔti fɔ it.

PAPA GƆD Prɔmis Fɔ Mek Sɔmbɔdi We Kɔmɔt Bɛtliɛm, Bigman

² PAPA GƆD se na Bɛtliɛm Ɛfrata we smɔl pas ɔl di siti dɛn na Juda, i go mek sɔmbɔdi kɔmɔt ɛn bi bigman insay Izrɛl ɛn na pɔsin we ɔlman go no bɔt bikɔs dɛn go no in fambul tik.

³ Bikɔs ɔf wetin dɛn de du, i go lɛf dɛn to dɛnsɛf te di uman we in tɛm dɔn rich fɔ bɔn, bɔn; da tɛm de ɔl udat bin dɔn skata ɔlsay na wɔl go kam to dɛn pipul bak.

⁴ Da pɔsin de go tan lɛk man we de mɛn ship, i go tinap ɛn fid di ship dɛn ɛn na PAPA GƆD go gi am pawa fɔ du dat. Na PAPA GƆD, we nain GƆD, in nem i go tek du am. In pipul dɛn nɔ go gɛt ɛni yagba ɛn ɔlman go no se na man da wande.

⁵ I go mek ɔlman gɛt kolat. Da tɛm de wɛn di Asirian dɛn go atak dɛn, dɛn go sɛn ɔl dɛn bigman dɛn fɔ go fɛt dɛn.

Aw PAPA GƆD Pul Dɛn Pan Trɔbul Ɛn Pɔnish Dɛn.

⁶ Dɛn go win di Asirian dɛn ɛn tek dɛn land ɛn di land usay Nimrɔd, da wɔndaful sojaman de. Dɔn i go pul dɛn na di Asirian dɛn an we di Asirian dɛn go go insay di Izrɛlayt dɛn yon siti go aras dɛn.

⁷ Da tɛm de di wan dɛn we lɛf na Jekɔb in jɛnareshɔn go de midul di ɔda pipul dɛn lɛk aw ren kin fɔdɔm pan plant fɔ mek i gro fayn. Na PAPA GƆD dɛn abop pan, nɔto pan mɔtalman.

⁸ Dɛn go tan lɛk layɔn midul di pipul dɛn lɛk aw layɔn kin de na bush ɔ lɛk we pikin layɔn kin go de wit ship dɛn we i kin so nyamanyama dɛn dat dɛn nɔ kin ebul pul ɛniwan nain an.

⁹ I se dɛn go ebul dɛn ɛnimi ɛn dɛn go dɔnawe wit dɛn.

¹⁰ PAPA GƆD se da tɛm de, dɛn nɔ go gɛt ɔs ɛn karej fɔ go fɛt wit bikɔs i go dɔn pwɛl dɛn ɔl

¹¹ ɛn dɛn ples we dɛn dɔn mek fayn fɔ lɛ dɛn nɔ ambɔg dɛn, ɔl go pwɛl;

¹² ɔl di tin dɛn we dɛn kin yuz fɔ ple wikɛd majik wit ɔl dɛn man we kin de luk grɔn fɔ dɛn, in go pwɛl ɔl;

¹³ in go pwɛl ɔl di tin dɛn we dɛn de mek ɛn tek wɔship dɛn ɔda gɔd dɛn so, dɛn nɔ go gɛt fɔ go wɔship natin we dɛn tek dɛn an mek;

¹⁴ Una Ashɛra dɛn statyu dɛn ɔl go kam dɔŋ ɛn di siti go pwɛl kpatakpata.

¹⁵ Dɔn i go put in vɛksteshɔn pan ɔl dɛn kɔntri we nɔ du wetin i want.