Mayka 4 - Krio Fɔs Oli Baybul

Di Tɛm We PAPA GƆD Go Briŋ Kolat Na Wɔl Fɔ Ɔlman

¹ Wande wande di mawnten usay PAPA GƆD in os de go bi di mawnten we ay pas ɔl, ɛn i go ay sɛf pas di il dɛn. Bɔku ɔda neshɔn dɛn go wan fɔ go de,

² dɔn dɛn pipul dɛn go se fɔ go ɔp na PAPA GƆD in mawnten, we na Mawnt Zayɔn usay PAPA GƆD in os de. I go tich wi wetin in want wi fɔ du; ɛn wisɛf go du wetin i want wi fɔ du. Na Jerusɛlɛm wetin PAPA GƆD wan tich de kɔmɔt; dɔn na Zayɔn i de de we i wan tɔk to in pipul dɛn.

³ I go de tɔk kes wɛn dɛn difrɛn neshɔn gɛt plaba, i lɛk dɛn de nia ɔ dɛn de fa; dɛn go nak nak dɛn sɔd fɔ mek tin fɔ yuz na fam, ɛn dɛn spia, dɛn go mek i bi nɛf fɔ kɔt na fam, di neshɔn dɛn nɔ go fɛt dɛnsɛf igen, so nid nɔ go de fɔ tren fɔ fɛt igen;

⁴ Ɔlman go sidɔm nain fam ɔ in gadin, ɛn natin nɔ go mek dɛn de fred; na PAPA GƆD, PAPA GƆD Ɔlmayti insɛf dɔn tɔk.

⁵ Ɔl di neshɔn dɛn go de wɔship dɛn yon gɔd dɛn bɔt di wan dɛn we na PAPA GƆD in yon pipul go wɔship ɛn obe am sote go.

Izrɛl Go Kɔmɔt Ɛgzayl

⁶ PAPA GƆD se da tɛm de, i go gɛda ɔl udat i bin dɔn mek go ɛgzayl bikɔs i bin wan pɔnish dɛn;

⁷ in go briŋ udat lɛf kam bak ɛn mek dɛn bigin layf bak. Dɛn go bi pawaful ɛn na frɔm Mawnt Zayɔn in go rul dɛn sote go.

⁸ I se Jerusɛlɛm na ples we PAPA GƆD de, de luk in pipul dɛn lɛk aw man we de mɛn ship kin sidɔm na kɔna de wach in ship dɛn. I tan lɛk aw sikyɔriti kin de na sɔn ay ples we dɛn bil de wach wetin de apin. I se di ples go bi di kayn big siti we i bin bi bak.

⁹ I se wetin mek di pipul dɛn na Jerusɛlɛm de ala kray so. Dɛn mek nɔys lɛk we bɛlɛ uman wan bɔn. I se dɛn de mek lɛk dɛn bigman dɛn dɔn day.

¹⁰ I se na naw dɛn fɔ kray ɛn rol na grɔn lɛk uman we wan bɔn bikɔs dɛn gɛt fɔ kɔmɔt na di siti go tap na opin ples. I se dɛn go go Babilɔn bɔt PAPA GƆD go pul dɛn na dɛn ɛnimi dɛn an.

¹¹ I se difrɛn neshɔn dɛn dɔn mek gɛŋ pan dɛn. Dɛn de se Jerusɛlɛm mɔs pwɛl, dɛn de abop se dɛn go si in fɔdɔm wan.

¹² Bɔt na bikɔs dɛn neshɔn dɛn de nɔ no wetin de na PAPA GƆD in maynd. Dɛn nɔ ɔndastand aw i de wok se na we i wan pɔnish dɛn mek i lɛ dɛn mek wanwɔd ɛn gɛda na wan ples lɛk aw dɛn kin gɛda sid fɔ gren.

¹³ Di tɛm dɔn kam fɔ mek dɛn grap ɛn dil wit dɛn ɛnimi. PAPA GƆD se i go mek Jerusɛlɛm traŋa lɛk man kaw we in ɔn tan lɛk ayɛn dɔn i tan lɛk na bras de nain fut dɛn. Dɛn go nyamanyama di ɔda neshɔn dɛn, tek ɔl dɛn jɛntri bay fos ɛn gi PAPA GƆD we na PAPA GƆD fɔ di wanol wɔl.