Mayka 3 - Krio Fɔs Oli Baybul

Mayka Tɔk Pan Izrɛl In Bigman Dɛn.

¹ Mayka kɔl di bigman dɛn to atɛnshɔn. I aks dɛn se if dɛn na di big wan dɛn na Jekɔb in jɛnareshɔn ɔ dɛn na di wan dɛn we de jɔj na Izrɛl. I tɛl dɛn se bay rayt dɛn fɔ de mek shɔ se pipul dɛn de trit dɛn kɔmpin fayn,

² bɔt bifo dat i tan lɛk se dɛn et wetin gud ɛn lɛk wetin bad. Dɛn de biev lɛk buchaman we de pul ɔl di bif kɔmɔt pan bon we i wan kɔt fɔ put na pɔt

³ ɛn lɛk wayl bif, na so dɛn de nyamanyama di pipul dɛn.

⁴ Dɛn go pre to PAPA GƆD bɔt i nɔ go ansa dɛn. I nɔ go lisin to dɛnsɛf bikɔs dɛn dɔn du bad.

⁵ Na dis PAPA GƆD se bɔt di fɔls prɔfɛt dɛn: I se dɛn de ful di pipul. We dɛn gi dɛn tin fɔ it, dɛn de se ɔltin ɔrayt bɔt we dɛn nɔ gɛt fɔ gi dɛn, na da tɛm de dɛn de tɛl dɛn se dɛn go gɛt trɔbul.

⁶ PAPA GƆD se fɔseka dat, dɛn dɔn rich dɛn Watalo bikɔs dɛn nɔ go si ɛni vishɔn we go mek dɛn lay gi pipul

⁷ ɛn PAPA GƆD nɔ go ansa natin we dɛn aks fɔ.

⁸ Mayka tɛl dɛn se na PAPA GƆD in spirit nɔmɔ we de pan am de gi am pawa. I se i de gi am sɛns ɛn mek i ebul fɔ tɛl Jekɔb in jɛnareshɔn bɔt di bad we dɛn de du ɛn fɔ tɛl Izrɛl bɔt di sin dɛn we dɛn de kɔmit.

⁹ I se ɔl di big wan dɛn na Jekɔb in jɛnareshɔn ɛn di bigman dɛn na Izrɛl fɔ lɛf fɔ de twis di lɔ ɛn gi rayt to udat rɔŋ.

¹⁰ I se na bad, bad tin dɛn de du so we dɛn de mek soso kruk de na Jerusɛlɛm lɛk nain dɛn de bil di siti wit.

¹¹ Di big wan dɛn we de bifo de tek brayb, di man dɛn we de mek sakrifays fɔ pipul sin de tek mɔni fɔs bifo dɛn du dɛn wok dɔn di prɔfɛt dɛn de tek pe bifo dɛn tɛl yu PAPA GƆD in mɛsej. Na ɔl dɛn bad tin ya dɛn de du bɔt dɛn de blɔf se PAPA GƆD de wit dɛn so natin nɔ go du dɛn.

¹² Mayka se ɔl dɛn bad tin ya we dɛn de du go mek pipul nɔ de na Zayɔn, so dɛn go plant ɔlkayn tin de lɛk na fil; ɛn Jerusɛlɛm in go so pwɛl dat na stonston nɔmɔ go de de, dɔn PAPA GƆD in os go tɔn bush.