Mayka 2 - Krio Fɔs Oli Baybul

Wetin Go Apin To Dɛn Wan Dɛn We De Buli Poman

¹ Eya! I go kɔmɔt bad pan dɛn wan we nɔ kin de slip na nɛt, bifo dat dɛn kin jɛs de mɛmba aw fɔ du bad. As do klin so, dɛn kin mekes fɔ go du di bad we dɛn plan wans dɛn gɛt di pawa.

² Dɛn kin kapu pipul dɛn fil ɛn os dɛn ɛn pul dɛn kɔmɔt na dɛn an. Dɛn jɛs de fɔ buli pipul dɛn ɛn pul dɛn os ɛn ɔda prɔpati kɔmɔt na dɛn an.

³ PAPA GƆD se fɔseka dis, i go pɔnish dɛn kayn man dɛn de dɛn famili; i go gi dɛn lod we dɛn nɔ go ebul tot dɔn nɔbɔdi nɔ go ɛp dɛn. Da tɛm de dɛn go lɛf fɔ kak bikɔs tin go bad fɔ dɛn.

⁴ We da tɛm de kam, pipul go yuz dɛn mek ɛgzampul fɔ sho aw pɔsin de pe fɔ di bad we i du to ɔda pipul. Di pipul dɛn go mek siŋ bɔt dɛn lɛkɛ se na bɛrin dɛn gɛt: Ɔltin dɔn dɔn fɔ dɛn! PAPA GƆD dɔn pul dɛn land kɔmɔt na dɛn an I dɔn gi am to di wan dɛn we kapchɔ dɛn.

⁵ So we ɔlman kam bak, dɛn wan we bin de buli poman, nɔ go gɛt land fɔ dɛn fambul we dɛn de sheb.

⁶ We dɛn dɔn yɛri wetin Mayka se PAPA GƆD se, dɛn tɔk pan Mayka ɛn tɛl am se i nɔ fɔ prich so bikɔs PAPA GƆD nɔ tan so.

⁷ Dɛn aks Mayka se if i want tɛl dɛn se PAPA GƆD nɔ de peshɛnt wit Jekɔb in jɛnareshɔn. Dɛn se PAPA GƆD nɔ tan so, i nɔ de vɛks kwik pan pipul dɛn, so i nɔ go du ɔl wetin Mayka se i go du. PAPA GƆD de trit udat de waka tret wit am, fayn.

⁸ Insɛf tɛl dɛn se, dɛn nɔ bɛtɛ pas di wan dɛn we kech dɛn; dɛn de biev lɛk di ɛnimi to di ɔda wan dɛn bikɔs dɛn de trit dɛn lɛk aw tifman de trit pɔsin, dat na we dɛn de tek dɛn klos dɛn na dɛn an.

⁹ Dɛn de drɛb di uman dɛn kɔmɔt na dɛn os dɔn dɛn nɔ de mek di pikin dɛn ɛnjɔy wetin PAPA GƆD gɛt fɔ dɛn.

¹⁰ I se, dɛn fɔ grap go ɔdasay bikɔs ples nɔ de fɔ dɛn de igen; dɛn dɔn dɔti wata wit dɛn sin ɛn so na pwɛl nɔmɔ PAPA GƆD gɛt fɔ pwɛl di ples.

¹¹ Mayka se na pɔsin we de lay gi dɛn, nain dɛn want. I se if di pɔsin kam prich se dɛn go gɛt bɔku wayn ɛn rɔm fɔ drink, na da tɛm de dɛn go gladi fɔ lisin we i de tɔk.

¹² Bɔt i tɛl dɛn se PAPA GƆD prɔmis se i go gɛda ɔl Jekɔb in jɛnareshɔn, i se PAPA GƆD go mek ɔl udat lɛf pan di Izrɛlayt dɛn kam bak na wan ɔndasela ɛn dɛn go bɔku so we go de de.

¹³ I se PAPA GƆD we mek we dɛn kech dɛn kɛr go, nain sem wan go mek we fɔ dɛn fɔ kɔmɔt de. PAPA GƆD, nain go bi dɛn kiŋ ɛn nain go lid dɛn fɔ go na dɛn land bak.