Mayka 1 - Krio Fɔs Oli Baybul

¹ Dis na wetin PAPA GƆD tɛl Mayka we kɔmɔt Mɔrɛsheth bɔt Sameria ɛn Jerusɛlɛm di tɛm we Jotham, Eaz ɛn Ɛzikaya dɛn na bin kiŋ na Juda.

Dɛn Kray Fɔ Sameria Ɛn Jerusɛlɛm

² Una ɔl fɔ yɛri dis; Di wɔl, una lisin. Ɔl udat tap na dis wɔl fɔ yɛri dis! Lɛ PAPA GƆD we na GƆD, bi witnɛs as i de nain oli tɛmpul.

³ Una lisin, PAPA GƆD de kɔmɔt usay i de; ɛn i go kam dɔŋ, kam waka na ɔl wi ay ay ples dɛn.

⁴ We i pas, di grɔn ɛn di mawnten dɛn we de ɔnda in fut go mɛlt dɔn di vali dɛn go plit tu. Di mawnten dɛn go mɛlt lɛk kyandul bifo faya, lɛk we wata de rɔn dɔŋ il.

⁵ Ɔl dis go bi bikɔs Jekɔb in jɛnareshɔn dɛn dɔn sin bad bad wan ɛn na Sameria ɛn Jerusɛlɛm fɔ blem.

⁶ Fɔseka dat PAPA GƆD se i go pwɛl Sameria ɛn mek i bi lɛkɛ aw dɔti de payl na grɔn na di opin fil. Nɔn bɛtɛ tin dɛn nɔ go plant de pas i bi ples fɔ plant greps gadin. Dɛn nɔ go ebul gɛda in stonston sɛf fɔ du ɛni ɔda tin.

⁷ Dɛn go nyamanyama ɔl di smɔl gɔd dɛn we dɛn mek dɔn dɛn go bɔn di tin dɛn we dɛn de yuz fɔ rare na di os we dɛn de wɔship. Na di sem tin we dɛn bin de du wit di tin dɛn we dɛn bin de rare wit, nain dɛn ɛnimi dɛn go du dɛn.

⁸ Mayka se na dat go mek in kray. Fɔ sho aw i de fil am, i go de nekɛd ɛn waka bia fut. I se in go kray lɛk aw dɛn Jakal ɛn da bɔd we dɛn kɔl Ɔstrich, de kray.

⁹ I kɔl dɛn pɔnishmɛnt, wund we nɔ go wɛl, bikɔs natin nɔ gɛt fɔ tap dɛn fɔ gɛt PAPA GƆD in pɔnishmɛnt. I se Juda go pwɛl lɛk Sameria ɛn Jerusɛlɛm, usay PAPA GƆD in pipul dɛn tap.

Jerusɛlɛm In Ɛnimi Dɛn De Kam

¹⁰ Nɔ mek wi ɛnimi dɛn, dat na di pipul na Gath, si wi we wi de kray atɔl. Di wan dɛn na Bɛth Liafra, fɔ rol na dɔti fɔ sho se dɛn sɔri;

¹¹ Di wan dɛn we tap na Shafir, go pas wit dɛn shem ɛn nekɛdnɛs go dɛn we; di wan dɛn we tap na Zaanan nɔ go mistek kɔmɔt na do; wɛn dɛn go yɛri we di pipul dɛn na Bɛthɛzɛl de kray, dɛn no wantɛm se nɔto ples dat fɔ go ayd.

¹² Di pipul na Marɔth de wet fɔ si wetin de apin bikɔs PAPA GƆD dɔn pwɛl di siti dɛn nia dɛn ɛn i dɔn rich Jerusɛlɛm.

¹³ Di pipul dɛn na Lakish fɔ mek di ɔs ɛn karej fɔ rɔnawe bikɔs na dɛn ɔl mek Jerusɛlɛm sin. Dɛn falamakata di bad tin dɛn we Izrɛl bin de du.

¹⁴ I se di pipul na Juda fɔ gi sɔntin we dɛn de pat kɔmpin wit Morɛshɛth Gath. Di kiŋ dɛn na Izrɛl nɔ fɔ abop se di pipul dɛn na Akzib go sɛn man dɛn fɔ ɛp dɛn fɛt.

¹⁵ I se PAPA GƆD go mek dɛn kech di pipul na Marisha ɛn kɛr dɛn go di tɛm we dɛn go kapchɔ di siti. Di bigman dɛn na Izrɛl go go ayd na di kev na Adulam.

¹⁶ I se di pipul dɛn na Juda fɔ krep dɛn ed fɔ sho aw dɛn fil am we dɛn tek dɛn pikin dɛn na dɛn an kɛr dɛn go. Dɛn fɔ fiba yuba we nɔ gɛt ia.