Matyu 8 - Krio Fɔs Oli Baybul

Jizɔs Mɛn Wan Man

¹ We Jizɔs kɔmɔt na di il kam dɔŋ, plɛnti plɛnti pipul bin fala am kam dɔŋ.

² Wan man we bin gɛt bad sik nain skin, kam nil dɔŋ bifo Jizɔs ɛn se, “Masta, if yu gri fɔ mɛn mi, yu ebul mɛn mi ɛn mek a klin.”

³ Jizɔs tret in an ɛn tɔch di man ɛn se, “A gri fɔ mɛn yu. Wɛl naw!” Di man wɛl wantɛm.

⁴ Jizɔs se, “Lisin, nɔ tɛl ɛnibɔdi wetin bi so, go mek di man we de mek sakrifays fɔ pipul sin luk yu; dɛn, mek di sakrifays we Mozis bin tɛl pipul fɔ mek. Dat go mek ɔlman no se yu dɔn wɛl.”

Jizɔs Mɛn di Roman Ɔfisa in Bɔy

⁵ Wɛn Jizɔs rich Kepanyɔm, wan Roman ɔfisa go mit am ɛn beg am. I se,

⁶ “Duya, Masta, mi bɔy nɔ wɛl, i ledɔm na os, i paralayz ɛn i de sɔfa pen bad.”

⁷ Jizɔs ansa di ɔfisa. I se, “A go go mɛn am na yu os.”

⁸ Bɔt di Roman ɔfisa se, “Masta, a nɔ fit fɔ mek yu go na mi os, sa. Yu jɛs tɔk wetin yu want tɔk, mi bɔy go wɛl.

⁹ Misɛf na pɔsin we gɛt bigman dɛn we gɛt pawa oba mi ɛn a gɛt soja man dɛn we dɛn de ɔnda mi. A kin tɛl wan se, ‘Go,’ ɛn i kin go; a kin tɛl ɔda wan se, ‘Kam!’ Ɛn i kin kam; ɛn a kin tɛl mi bɔy se, ‘Du dis wok!’ Ɛn i kin du am.”

¹⁰ Jizɔs wɔnda we i yɛri wetin di Roman ɔfisa se, i tɔk to di pipul dɛn we bin de fala am. I se, “A de tɛl una se, wande a nɔ si pɔsin we biliv Gɔd lɛkɛ dis na Izrɛl.

¹¹ A de tɛl una se, plɛnti pipul go kɔmɔt ɔlɔbɔt na wɔl ɛn sidɔm wit Ebraam, Ayzak ɛn Jekɔb na di ples we Gɔd de rul na ɛvin.

¹² Bɔt Gɔd go sɛn dɛn wan we bin fɔ de na di ples we i de rul, go ɛl, ɛn dɛn go kray bita wan ɛn bɛt dɛn tɔŋ.”

¹³ Dɛn Jizɔs tɔk to di Roman ɔfisa, i se, “Go na yu os, wetin yu biliv, nain go bi.” Di Roman ɔfisa in bɔy wɛl di sem tɛm we Jizɔs tɛl am fɔ go nain os.

Jizɔs Mɛn Plɛnti Pipul

¹⁴ Jizɔs go na Pita in os, i mit Pita in mɔdɛnlɔ sik ledɔm, i bin gɛt fiva.

¹⁵ Jizɔs tɔch di uman in an, di uman wɛl wantɛm, i grap go fɛn sɔntin fɔ Jizɔs fɔ it.

¹⁶ Da ivintɛm de, plɛnti pipul briŋ dɛn wan we bin gɛt dɛbul insay dɛn kam to Jizɔs. Jizɔs drɛb di dɛbul dɛn wit di wɔd we i tɔk, ɛn i mɛn ɔl di wan dɛn we bin sik.

¹⁷ Ɔl dɛn tin ya we i du, na fɔ mek wetin di prɔfɛt we nem Ayzaya bin tɔk, kam bi tru. Prɔfɛt Ayzaya bin rayt se, “Nainsɛf tek ɔl wi sik dɛn ɛn mek wi fri.”

Tu Man Givɔp Dɛnsɛf fɔ Bi Jizɔs In Lanin Bɔy dɛn

¹⁸ Wɛn Jizɔs si ɔl di krawd rawnd am, i tɛl in lanin bɔy dɛn se mek dɛn ɔl krɔs Lek Galili, go na di ɔda say.

¹⁹ Wan Ju Lɔ ticha kam mit am ɛn se, “Ticha, a dɔn rɛdi fɔ fala yu go ɛni say we yu de go.”

²⁰ Jizɔs ansa am, i se, “Dɛn bush kyat gɛt ples fɔ tap, ɛn dɛn bɔd gɛt say fɔ tap; bɔt Mɔtalman Pikin nɔ gɛt ples fɔ le in ed sɛf.”

²¹ Wan ɔda man, we bin biliv pan Jizɔs, tɔk to Jizɔs, i se, “Masta, a go fala yu, bɔt wet mek a go na os ɛn bɛr mi papa fɔs.”

²² Bɔt Jizɔs tɛl am se, “Yu fala mi, lɛf dɛn pipul we nɔ gɛt di layf we Gɔd de gi fɔ bɛr dɛn fambul we dɔn day.”

Jizɔs Tɛl di Swɛlin fɔ Stɛdi

²³ Jizɔs go insay di bot, in lanin bɔy dɛn fala am go insay.

²⁴ Wantɛm, big big briz jɛs bigin blo pan dɛn na di wata, ɛn di bot bin want sink, bɔt Jizɔs bin de slip.

²⁵ Di lanin bɔy dɛn go wek am ɛn se, “Masta, sev wi, na day wi de day so!”

²⁶ Jizɔs se, “Wetin du una de fred? Una nɔ biliv mi gud!” I grap ɛn tɛl di briz ɛn di swɛlin fɔ stɛdi, nain ɔltin stɛdi.

²⁷ Ɔl di lanin bɔy dɛn wɔnda, dɛn se, “Uskayn man dis? Di wata ɛn di briz sɛf de du wetin i tɛl dɛn fɔ du!”

Jizɔs Mɛn dɛn Man we Gɛt Dɛbul Insay dɛn

²⁸ Wɛn Jizɔs krɔs Lek Galili go na di kɔntri we di Gadara pipul dɛn de, tu man dɛn go mit am, dɛn bin kɔmɔt na bɛriŋrɔn. Dɛbul dɛn bin de insay di man dɛn; dɛn bin so wayl, dat nɔbɔdi nɔ bin de pas na di rod we dɛn de.

²⁹ Dɛn ala se, “Wetin yu kam fɔ du wi, yu we na Gɔd in Pikin? Yu kam ya fɔ mek wi sɔfa bifo di tɛm we Gɔd fɔ pɔnish wi?”

³⁰ Plɛnti ɔg dɛn bin de it na wan ples we nɔ bin de fawe.

³¹ So di dɛbul dɛn beg Jizɔs ɛn se, “Wi no se yu go drɛb wi kɔmɔt insay dɛn man ya, duya, sɛn wi go insay di ɔg dɛn.”

³² Jizɔs se, “Una kɔmɔt insay dɛn man ya!” So di dɛbul dɛn kɔmɔt insay di tu man dɛn ɛn go insay di ɔg dɛn. Ɔl di ɔg dɛn rɔn go dɔŋ di il ɛn go fɔdɔm na di lek, ɛn drawn.

³³ Di man dɛn we bin de mɛn di ɔg dɛn rɔn go na di tɔŋ, ɛn tɛl di pipul dɛn ɔl wetin bi to di tu man dɛn we dɛbul bin de insay.

³⁴ So ɔlman na di tɔŋ go mit Jizɔs. Wɛn dɛn si am, dɛn beg am fɔ kɔmɔt na dɛn kɔntri.