Matyu 3 - Krio Fɔs Oli Baybul

Wetin Jɔn we de Baptayz Tɛl Pipul

¹ Wɛn sɔm ia dɔn pas nain Jɔn we de baptayz kam na di dɛzat na Judia. I bigin tɛl pipul se,

² “Una chenj una we ɛn lɛf fɔ du di bad tin dɛn we una de du, bikɔs Gɔd in rul dɔn kam klos!”

³ Jɔn na di man we da prɔfɛt we nem Ayzaya tɔk bɔt wɛn i se, “Sɔmbɔdi de tɔk lawd na di dɛzat se, ‘Una klia di rod we di Masta go pas; una mek di rod tret fɔ am fɔ waka!’”

⁴ Na kamɛl ia dɛn bin tek mek Jɔn in klos, i bin tay lɛda bɛlt rawnd in midul, ɛn i bin de it lokɔs ɛn ɔni.

⁵ Pipul dɛn ɔlɔbɔt na Jerusɛlɛm, Judia, ɛn ɔl dɛn kɔntri we de klos Riva Jɔdan bin de kam lisin to am.

⁶ Dɛn kin tɛl Gɔd ɔl di bad tin dɛn we dɛn dɔn du, dɛn Jɔn kin baptayz dɛn na Riva Jɔdan.

⁷ Jɔn si se plɛnti Faresi ɛn Sadyusi dɛn bin de kam to am fɔ mek i baptayz dɛn, so i bigin tɔk pan dɛn. I se, “Una dɛn snek ya, una min se we dɛn baptayz una dat go mek Gɔd nɔ pɔnish una fɔ di sin we una dɔn sin?

⁸ Una fɔ du di tin dɛn we sho se una dɔn lɛf fɔ du bad.

⁹ Una nɔ fɔ fil se, we Ebraam na una grampapa papa dat go mek Gɔd nɔ pɔnish una. A de tɛl una se Gɔd kin tek dɛn ston ya sɛf tɔn dɛn to Ebraam in grampikin pikin dɛm!

¹⁰ Di aks we fɔ tek kɔt di tik dɛn rut dɔn rɛdi naw; ɔl dɛn tik we nɔ de bia gud tin fɔ it, dɛn go kɔt dɛn ɛn trowe dɛn na faya.

¹¹ A de baptayz una wit wata fɔ sho se una dɔn lɛf fɔ du bad, bɔt di wan we de kam afta a dɔn du mi wok, in go baptayz una wit Gɔd in Spirit ɛn wit faya. I gɛt pawa pas mi, ɛn a nɔ fit sɛf fɔ lus in sus.

¹² I ol tin lɛkɛ lɔŋ fɔk fɔ tek pul di chaf chaf kɔmɔt pan di wit. I go gɛda in wit put am na sto ɛn i go bɔn di chaf chaf na faya we nɔ de tap fɔ bɔn.”

Jɔn Baptayz Jizɔs

¹³ I nɔ tu te igen, Jizɔs kɔmɔt Galili go mit Jɔn na Riva Jɔdan fɔ mek Jɔn baptayz am.

¹⁴ Jɔn nɔ bin want gri baptayz Jizɔs lɛkɛ aw Jizɔs se i fɔ du, so Jɔn se, “Yu nɔ fɔ kam to mi fɔ mek a baptayz yu, na yu fɔ baptayz mi. Wetin mek yu kam to mi fɔ mek a baptayz yu?”

¹⁵ Jizɔs se, “Du wetin a tɛl yu fɔ du dis tɛm ya. If yu du dat, wi go dɔn du ɔl wetin Gɔd want wi fɔ du fɔ mek pipul sev.” So Jɔn du wetin Jizɔs se.

¹⁶ Jɛs Jɔn baptayz Jizɔs so, Jizɔs kɔmɔt insay di wata. Gɔd opin di klawd mek i si, ɛn i si Gɔd in Spirit de kɔmɔt ɔp kam pan am lɛkɛ aw dɔv kin kam dɔŋ.

¹⁷ Dɔn dɛn yɛri vɔys we kɔmɔt ɔp na ɛvin we se, “Dis na mi Pikin we a lɛk, a gladi fɔ am.”