Matyu 26 - Krio Fɔs Oli Baybul

Dɛn Tay Bagin pan Jizɔs

¹ Wɛn Jizɔs dɔn tɔk ɔl dɛn wɔd ya, i tɔk to in lanin bɔy dɛn, i se,

² “Una no se i lɛf tu de fɔ mek di Pasova ɔlide kam, ɛn dɛn go an ova Mɔtalman Pikin gi pipul we go nel am pan di krɔs.”

³ Di bigman dɛn we de mek sakrifays fɔ pipul sin ɛn di ɔda Ju bigman dɛn mek mitin na Kaye fas in os; Kaye fas na bin edman fɔ dɛn man we de mek sakrifays fɔ pipul sin.

⁴ Dɛn bagin fɔ ol Jizɔs ɛn kil am, mek plɛnti pipul nɔ no.

⁵ Bɔt dɛn gri se dɛn nɔ go du am wɛn dɛn de pan di Pasova ɔlide, fɔ mek di pipul dɛn nɔ go fɛt.

Wan Uman Tɔn Dia Sɛnt na Jizɔs In Ed

⁶ Jizɔs bin de Bɛtani na Saymɔn in os; tɛm bin de we Saymɔn bin gɛt bad sik nain skin.

⁷ As Jizɔs de it, nain wan uman kam. Di uman bin gɛt dia sɛnt na wan ston bɔtul we dɛn tek ala ba sta mek; i tɔn di sɛnt na Jizɔs in ed.

⁸ Di lanin bɔy dɛn vɛks wɛn dɛn si wetin bi, dɛn se, “Wetin mek di uman wes di sɛnt?

⁹ I bin fɔ gɛt plɛnti kɔpɔ if i bin sɛl di sɛnt, ɛn sheb di kɔpɔ gi dɛn pipul we nɔ gɛt natin.”

¹⁰ Jizɔs bin no wetin dɛn de tɔk, so i aks dɛn se, “Wetin du una de ambɔg di uman? I dɔn du fayn ɛn big wok fɔ mi.

¹¹ Dɛn pipul we nɔ gɛt natin go de wit una ɔltɛm, bɔt mi nɔ go de wit una ɔltɛm.

¹² Dis uman tɔn dis dia sɛnt pan mi, so dat i go rɛdi mi bɔdi fɔ di tɛm we dɛn go bɛr mi.

¹³ A de tɛl una se, ɔlɔbɔt na wɔl we dɛn go tɛl pipul dis gud nyuz, dɛn mɔs mɛmba dis uman fɔ dis wok ya we i dɔn du.”

Judas Gri fɔ Sɛl Jizɔs

¹⁴ Wan pan Jizɔs in lanin bɔy dɛn we nem Judas Iskariɔt go mit di bigman dɛn we de mek sakrifays fɔ pipul sin.

¹⁵ I aks dɛn se, “Ɔmɔs una go pe mi if a mek una ol Jizɔs?” Dɛn pe am tati silva kɔpɔ.

¹⁶ Frɔm da tɛm de, Judas bigin de fɛn gud chans fɔ sɛl Jizɔs gi dɛn.

Jizɔs It di Pasova It wit In Lanin Bɔy dɛn

¹⁷ Di fɔs de pan di ɔlide we di Ju dɛn kin it bred we nɔ gɛt yist, di lanin bɔy dɛn go aks Jizɔs usay i want dɛn fɔ go rɛdi di Pasova it.

¹⁸ Jizɔs se, “Wan man de na dis tɔŋ we una fɔ go to, una go to am ɛn tɛl am se, ‘Wi Ticha se, di tɛm dɔn kam klos we dɛn go kil mi. Mi ɛn mi lanin bɔy dɛn go it di Pasova it na yu os.’”

¹⁹ Di lanin bɔy dɛn go du wetin Jizɔs tɛl dɛn ɛn rɛdi di it fɔ mɛmba di Pasova.

²⁰ Wɛn i rich ivintɛm, Jizɔs ɛn in lanin bɔy dɛn sidɔm de it.

²¹ Wɛn dɛn de it, Jizɔs se, “A de tɛl una se, wan pan una go sɛl mi.”

²² Di lanin bɔy dɛn sɔri bad, dɛn bigin aks Jizɔs wan bay wan se, “Masta, na mi?”

²³ Jizɔs se, “Na wan pan una we de put an insay di sem dish wit mi go sɛl mi.

²⁴ Mɔtalman Pikin go day lɛkɛ aw dɛn rayt bɔt am na Gɔd in Buk, bɔt i go bad fɔ di pɔsin we go sɛl Mɔtalman Pikin! I bin fɔ bɛtɛ if da pɔsin de nɔ bin bɔn!”

²⁵ Judas we sɛl Jizɔs se, “Masta, na mi go sɛl yu?” Jizɔs se, “Na so yu se.”

Di It we Wi de It fɔ Mɛmba di Masta

²⁶ We dɛn de it, Jizɔs tek bred, i pre ɛn tɛl Gɔd tɛnki. I kɔt kɔt am ɛn gi in lanin bɔy dɛn ɛn se, “Una tek am ɛn it am, dis na mi bɔdi.”

²⁷ Dɔn i tek di kɔp ɛn pre ɛn tɛl Gɔd tɛnki. I gi in lanin bɔy dɛn ɛn se, “Una ɔl drink di wayn we de na dis kɔp;

²⁸ dis na mi blɔd we a tek mek di agrimɛnt we Gɔd mek wit in pipul dɛn, a dɔn sakrifays am fɔ padin plɛnti plɛnti pipul dɛn sin.

²⁹ A de tɛl una se, a nɔ go drink wayn igen sote di tɛm we a go drink di nyu wayn wit una na di ples we mi Papa de rul.”

³⁰ Dɛn siŋ wan Gɔd siŋ, dɔn dɛn go na Mawnt Ɔliv.

Jizɔs Tɛl Pita Se I Go Dinay Am

³¹ Dɛn Jizɔs tɛl dɛn se, “Dis nɛt una ɔl go lɛf mi, lɛkɛ aw dɛn rayt na Gɔd in Buk se, ‘Gɔd go strayk di shɛpad, mek i day, ɛn ɔl di ship dɛn go skata!’

³² Bɔt wɛn a rayz frɔm di grev, a go go na Galili, una go mit mi de.”

³³ Pita se, “If ɔlman lɛf yu sɛf, mi nɔ go go lɛf yu.”

³⁴ Jizɔs se, “A de tɛl yu se, dis nɛt bifo fɔl kro, yu go dɔn tɔk tri tɛm se yu nɔ no mi.”

³⁵ Pita se, “A nɔ go tɔk dat, if na fɔ day sɛf a go day na di ples we yu go day.” Ɔl di ɔda lanin bɔy dɛn tɔk di sem tin.

Jizɔs Go Pre na Gɛtsemani

³⁶ Dɛn Jizɔs go na wan ples we dɛn kɔl Gɛtsemani wit in lanin bɔy dɛn. I se, “Una sidɔm na ya, a de go pre oba yanda.”

³⁷ Wɛn i de go, i kɛr Pita ɛn Zɛbidi in tu pikin dɛn go wit am. I bigin fil sɔri ɛn in at ebi.

³⁸ Nain i se, “Mi at so ebi dat a fil fɔ day. Una wet na ya, una wek ɛn pre wit mi.”

³⁹ I lɛf dɛn ɛn go bifo say lili bit, i ledɔm flat wit in fes na grɔn, ɛn pre se, “Mi Papa, if we de, pul dis sɔfa we a fɔ sɔfa kɔmɔt, ɛniwe, nɔto wetin mi want, na wetin yu want.”

⁴⁰ I tɔn bak go mit in lanin bɔy dɛn, bɔt i mit dɛn de slip; i aks Pita se, “Aw una de slip, una nɔ ebul de wan awa we una go wek ɛn pre wit mi?

⁴¹ Una nɔ slip, una pre, so dat Setan nɔ go tray una fɔ mek una sin. Una want du di rayt tin bɔt una nɔ gɛt di pawa fɔ du am.”

⁴² Jizɔs go pre bak, i se, “Mi Papa, if we nɔ de fɔ pul dis sɔfa we a gɛt fɔ sɔfa kɔmɔt, mek wetin yu want bi.”

⁴³ I tɔn bak go to in lanin bɔy dɛn, i mit dɛn de slip, dɛn nɔ ebul opin dɛn yay sɛf.

⁴⁴ Jizɔs lɛf dɛn igen, i go pre di sem pre we i bin dɔn pre; dat mek tri tɛm.

⁴⁵ I tɔn bak go mit in lanin bɔy dɛn ɛn aks dɛn se, “Una nɔ blo dɔn te nɔ? Una de slip te nɔ? Di tɛm dɔn rich we dɛn go sɛl Mɔtalman Pikin gi dɛn bad pipul.

⁴⁶ Una grap, lɛ wi go. Una luk di pɔsin we go sɛl mi, de kam naw!”

Dɛn Ol Jizɔs

⁴⁷ Jizɔs bin de tɔk wɛn Judas we na wan pan in twɛlv lanin bɔy dɛn, kam. I kam wit plɛnti pipul we ol sɔd ɛn tin dɛn fɔ tek fɛt. Na di bigman dɛn we de mek sakrifays fɔ pipul sin ɛn di ɔda Ju bigman dɛn bin sɛn dɛn pipul ya.

⁴⁸ Judas we sɛl Jizɔs gi dɛn pipul ya, bin dɔn tɛl dɛn se, “Di pɔsin we a go kis, na di man dat we una want, una ol am.”

⁴⁹ Wɛn dɛn rich, Judas go tret to Jizɔs ɛn se, “Masta, gud ivin,” dɔn i kis am.

⁵⁰ Jizɔs se, “Padi, du wetin yu want du kwik!” So dɛn kam ol Jizɔs.

⁵¹ Wan pan Jizɔs in lanin bɔy dɛn we bin de wit am pul in sɔd ɛn kɔt di edman fɔ dɛn man we de mek sakrifays fɔ pipul sin in bɔy in yes, kɔmɔt.

⁵² Jizɔs tɔn to di lanin bɔy, i se, “Put yu sɔd bak nain ples, ɛnibɔdi we fɛt wit sɔd, na sɔd dɛn go tek kil am.

⁵³ Yu nɔ no se if a aks mi Papa fɔ ɛp mi, i go sɛn twɛlv bataliɔn enjɛl dɛn fɔ kam ɛp mi wantɛm?

⁵⁴ Bɔt if a du dat, aw wetin rayt na Gɔd in Buk go bi, we dɛn se na so Gɔd want wetin de bi naw fɔ bi?”

⁵⁵ Jizɔs aks di krawd se, “Wetin mek una ol sɔd ɛn tin dɛn fɔ tek fɛt fɔ kam ol mi lɛkɛ na tifman una de kam ol? A bin de wit una ɔl di tɛm de lan una na Gɔd in Os, bɔt una nɔ ol mi.

⁵⁶ Ɔl dis bi so dat wetin di Prɔfɛt dɛn bin rayt na Gɔd in Buk go bi.” Wɛn i dɔn tɔk dɔn, nain ɔl di lanin bɔy dɛn lɛf am ɛn rɔnawe.

Dɛn Jɔj Jizɔs na di Ju Gran Kot

⁵⁷ Di pipul dɛn we ol Jizɔs kɛr am go na Kaye fas in os. Kaye fas na di edman fɔ dɛn man we de mek sakrifays fɔ pipul sin. Di Ju Lɔ ticha ɛn di ɔda Ju bigman dɛn bin dɔn gɛda de.

⁵⁸ Pita fala Jizɔs sote dɛn rich na di edman fɔ dɛn man we de mek sakrifays fɔ pipul sin, in yad, bɔt i nɔ bin de klos dɛn wɛn dɛn de go. Wɛn Pita dɛn rich insay di edman fɔ dɛn man we de mek sakrifays fɔ pipul sin in yad, i go sidɔm wit di gyad dɛn fɔ si wetin go bi.

⁵⁹ Di bigman dɛn we de mek sakrifays fɔ pipul sin ɛn ɔl di bigman dɛn we de jɔj na di Ju gran kot fɛn witnɛs fɔ lay pan Jizɔs, fɔ mek dɛn go kil am;

⁶⁰ bɔt dɛn nɔ gɛt pɔsin we tɔk bad tin we fɔ mek dɛn kil Jizɔs pan ɔl we plɛnti pipul go lay pan am. Nain tu pipul dɛn grap,

⁶¹ dɛn tɔk se, “Dis man se in ebul brok Gɔd in Os, dɔn i go tek tri de fɔ bil am bak.”

⁶² Di edman fɔ dɛn man we de mek sakrifays fɔ pipul sin, tinap ɛn aks Jizɔs se, “Yu dɔn yɛri wetin dɛn tu pipul ya se, yu gɛt ɛni ansa?”

⁶³ Bɔt Jizɔs nɔ tɔk natin. Nain di edman fɔ dɛn man we de mek sakrifays fɔ pipul sin tɔk igen se, “A de tek Gɔd we gɛt layf sote go, tɛl yu fɔ tɛl wi if yu na di Mɛsaya we na Gɔd in Pikin, fɔ tru.”

⁶⁴ Jizɔs se, “Na so yu se. Bɔt a de tɛl una se frɔm naw sote go, una go si Mɔtalman Pikin sidɔm na Gɔd we gɛt pawa pas ɔl, in raytan, ɛn i go rayd pan di klawd wɛn i de kam!”

⁶⁵ Wɛn di edman fɔ dɛn man we de mek sakrifays fɔ pipul sin yɛri wetin Jizɔs tɔk, i vɛks ɛn chɛr in klos, i se, “Dis man dɔn tɔk bad bɔt Gɔd. Wi nɔ want mɔ witnɛs fɔ tɔk wetin i du! Una ɔl jɛs yɛri we i tɔk bad bɔt Gɔd!

⁶⁶ Wetin una se?” Di mɛmba dɛn na di Ju gran kot se, “Dis man dɔn du bad, dɛn fɔ kil am.”

⁶⁷ Sɔm pan dɛn pit pan Jizɔs in fes, sɔm bit am ɛn sɔm slap am.

⁶⁸ Dɛn se, “Mɛsaya, if yu na prɔfɛt, tɛl wi udat nak yu!”

Pita Tɔk Tri Tɛm Se In Nɔ No Jizɔs

⁶⁹ Pita bin sidɔm na di edman fɔ dɛn man we de mek sakrifays fɔ pipul sin, in yad, na de wan pan di savant-gyal dɛn we de wok fɔ di edman fɔ dɛn man we de mek sakrifays fɔ pipul sin kam mit Pita ɛn se, “Yusɛf bin de wit Jizɔs we kɔmɔt Galili.”

⁷⁰ Bɔt Pita dinay bifo ɔlman. I se, “A nɔ no sɛf wetin yu de tɔk bɔt.”

⁷¹ Nain Pita kɔmɔt de, i go tinap klos di get na di yad. Wan ɔda gyal we de wok na di ples mit am de, i tɛl di man dɛn we bin tinap klos de se, “Dis man bin de wit Jizɔs we kɔmɔt Nazarɛt.”

⁷² Bɔt Pita dinay igen. I se, “A swɛ, a nɔ no da man de!”

⁷³ I nɔ tu te igen, nain sɔm man dɛn we bin tinap de kam mit Pita ɛn se, “Fɔ tru, yu na wan pan dɛn man we bin de wit Jizɔs, aw yu de tɔk sɛf dɔn sho wi se yu bin de wit am.”

⁷⁴ Nain Pita bigin swɛ. I se, “Na tru a de tɔk! Mek Gɔd pɔnish mi if a nɔ tɔk tru! A nɔ no da man de sɛf!” Da sem tɛm de, nain fɔl kro.

⁷⁵ Pita mɛmba wantɛm wetin Jizɔs bin tɛl am: I bin se, “Bifo fɔl kro, yu go dɔn tɔk tri tɛm se yu nɔ no mi.” Pita kɔmɔt na do, i bɔs kray bita wan.