Matyu 21 - Krio Fɔs Oli Baybul

Jizɔs Go insay Jerusɛlɛm

¹ Wɛn Jizɔs ɛn in lanin bɔy dɛn de klos Jerusɛlɛm, dɛn rich Bɛtfej we de na Mawnt Ɔliv; wɛn dɛn rich de, Jizɔs sɛn tu pan in lanin bɔy dɛn go bifo dɛn.

² I tɔk to dɛn, i se, “Una go na di vilej we de bifo una so; wɛn una rich de, una go mit dɛn tay wan dɔnki, in pikin de klos am. Una lus dɛn ɛn briŋ dɛn kam to mi.

³ If ɛnibɔdi aks una ɛnitin, una se, ‘Di Masta want dɛn bad bad’; di man go sɛn dɛn wantɛm.”

⁴ Dis tin bi, so dat wetin di prɔfɛt bin tɔk go bi, we i bin se,

⁵ “Tɛl di pipul dɛn na Zayɔn se, Luk, una kiŋ de kam to una! I put in yay dɔŋ, i de rayd wan dɔnki, ɛn di dɔnki in pikin.”

⁶ So di tu lanin bɔy dɛn go du wetin Jizɔs tɛl dɛn fɔ du.

⁷ Dɛn briŋ di dɔnki ɛn in pikin, dɔn dɛn prɛd dɛn klos pantap di dɔnki, nain Jizɔs sidɔm pan dɛn.

⁸ Plɛnti pipul we bin lib de prɛd dɛn klos na di rod, ɔda pipul dɛn brok di an pan sɔm tik ɛn le dɛn na di rod.

⁹ Di pipul dɛn we bin de bifo am ɛn di wan dɛn we bin de fala am bin de ala se, “Mek ɔlman prez Devid in pikin! Mek Gɔd blɛs di wan we i dɔn sɛn fɔ kam tinap fɔ am! Mek ɔlman prez Gɔd!”

¹⁰ Wɛn Jizɔs rich insay Jerusɛlɛm, di tɔŋ tɔn ɔpsay dɔŋ. Di pipul dɛn se, “Udat dis?”

¹¹ Di wan dɛn we go fɔ di Pasova ɔlide tɛl dɛn se, “Dis na prɔfɛt Jizɔs we kɔmɔt Nazarɛt we de na Galili.”

Jizɔs Go insay Gɔd In Os

¹² Jizɔs go insay Gɔd in Os, ɛn drɛb ɔl dɛn pipul we bin de bay ɛn sɛl de. I kapsay di tebul dɛn we di pipul dɛn bin de chenj mɔni pan, ɛn di bɛnch dɛn we dɛn wan we bin de sɛl pijin kin sidɔm pan.

¹³ I tɛl dɛn se, “Dɛn rayt na Gɔd in Buk se, Gɔd se, ‘Pipul fɔ kɔl mi Os ples fɔ pre,’ bɔt una dɔn tɔn am to ples we tifman de ayd.”

¹⁴ Dɛn blɛnyay pipul ɛn dɛn wan we dɛn an ɔ fut day kam mit Jizɔs, ɛn i mɛn dɛn.

¹⁵ Di bigman dɛn we de mek sakrifays fɔ pipul sin ɛn di Ju Lɔ ticha dɛn vɛks we dɛn si di wɔndaful wok dɛn we Jizɔs de du, ɛn di pikin dɛn we de ala insay Gɔd in Os se, “Mek ɔlman prez Devid in pikin!”

¹⁶ So di bigman dɛn we de mek sakrifays fɔ pipul sin ɛn di Ju Lɔ ticha dɛn aks Jizɔs se, “Yu nɔ de yɛri wetin dɛn de tɔk?” Jizɔs se, “Yɛs, a de yɛri dɛn. Una nɔ dɔn rid wetin rayt na Gɔd in Buk we se, ‘Gɔd dɔn lan yɔŋ pikin dɛn fɔ mek dɛn prez am gud gud?’”

¹⁷ Jizɔs lɛf dɛn, i go slip na Bɛtani.

Jizɔs Swɛ Wan Fig Tik

¹⁸ Da mɔnin de wɛn Jizɔs de tɔn bak go Jerusɛlɛm, i bin aŋri.

¹⁹ I si wan fig tik, klos di rod, so i go to di tik, bɔt i nɔ mit natin pan am pas lif. Nain i tɛl di tik se, “Yu nɔ go bia natin igen!” Nain di fig tik day wantɛm.

²⁰ Wɛn di lanin bɔy dɛn si wetin bi, dɛn wɔnda. Dɛn se, “Wetin mek dis tik ya day wantɛm?”

²¹ Jizɔs ansa dɛn se, “If una biliv Gɔd gud fashin, ɛn una nɔ dawt, una go ebul du wetin a dɔn du to dis fig tik ya; ɛn nɔto dat nɔmɔ, una go ebul tɛl dis mawnten se, ‘Kɔmɔt ya, go na di si’ ɛn i go go.

²² Wɛn una de pre to Gɔd fɔ du sɔntin, i go du am if una biliv se i go du am.”

Dɛn Aks Jizɔs Us Rayt I Gɛt

²³ Jizɔs go bak insay Gɔd in Os. Wɛn i bin de lan di pipul dɛn we bin lib de, nain di bigman dɛn we de mek sakrifays fɔ pipul sin ɛn di ɔda Ju bigman dɛn go aks am se, “Us rayt yu gɛt fɔ du dɛn tin ya, ɛn udat gi yu di rayt?”

²⁴ Jizɔs ansa dɛn se, “Mek misɛf aks una wan kwɛshɔn; if una gi mi di rayt ansa, a go tɛl una wetin mek a gɛt di rayt fɔ du dɛn tin ya.

²⁵ Us rayt Jɔn bin gɛt fɔ baptayz pipul, na Gɔd gi am di rayt ɔ na mɔtalman?” Dɛn tɔk to dɛn kɔmpin se, “If wi se na Gɔd gi am di rayt fɔ baptayz pipul, i go aks wi se, ‘Wetin du una nɔ bin biliv am?’

²⁶ Ɛn if wi se ‘Na mɔtalman’ wi de fred di pipul dɛn bikɔs dɛn ɔl biliv se Jɔn na bin prɔfɛt.”

²⁷ So dɛn tɔn to Jizɔs ɛn se, “Wi nɔ no udat gi Jɔn di rayt fɔ baptayz pipul.” So Jizɔs se, “Misɛf nɔ go tɛl una wetin mek a gɛt di rayt fɔ du dɛn tin ya.

Jizɔs Pul Parebul bɔt Tu Bɔy Pikin

²⁸ “Aw una luk dis wɔd? Wan man gɛt tu bɔy pikin, i tɛl di big pikin se, ‘Mi pikin, kam go wok fɔ mi na mi fam tide.’

²⁹ Di pikin se, ‘A nɔ go du am,’ bɔt afta dat, i sɔri fɔ wetin i tɔk ɛn go du di wok.

³⁰ Afta dat, di papa go tɛl di smɔl brɔda insɛf fɔ go wok nain fam da de de, di smɔl brɔda se, ‘A go go du am, sa,’ bɔt i nɔ mas de.

³¹ Uswan pan dɛn tu pikin ya du wetin in papa want?” Dɛn se, “Na di big brɔda, sa.” Jizɔs se, “Dɛn pipul we de gɛda gɔvmɛnt taks ɛn dɛn uman we de pan fri layf, go kam ɔnda Gɔd in rul bifo una.

³² Jɔn we bin de baptayz bin kam sho una di rayt rod we una fɔ waka, una nɔ biliv am; bɔt dɛn pipul we de gɛda gɔvmɛnt taks ɛn dɛn uman we de pan fri layf, biliv am. Pan ɔl we una si wetin dɛn uman we de pan fri layf ɛn dɛn pipul we de gɛda gɔvmɛnt taks du, una stil nɔ gri chenj ɛn biliv pan am.

Di Parebul bɔt Pipul we Rɛnt Wan Gadin

³³ “Una yɛri dis ɔda parebul. Wan man bin de we gɛt grɔn, i plant wan kayn tin we nem grepvayn, i mek ston wɔl rawnd am ɛn dig dip ol fɔ mek wayn wit di greps, dɔn i bil wan ples ɔp di wɔl we pɔsin go sidɔm fɔ wach di gadin. I rɛnt di gadin gi sɔm pipul, dɔn i go patrol na ɔda kɔntri.

³⁴ Wɛn di tɛm rich fɔ gɛda di greps na di gadin, i sɛn in bɔy dɛn to di pipul dɛn we rɛnt di gadin, fɔ gi am in yon pan di greps we dɛn gɛda.

³⁵ Di pipul dɛn we rɛnt di gadin ol di bɔy dɛn, dɛn kil wan, bit wan, ɛn ston wan.

³⁶ Di man sɛn plɛnti ɔda bɔy dɛn pas di fɔs wan dɛn we i bin sɛn. Di pipul dɛn we rɛnt di gadin du di bɔy dɛn di sem tin dɛn we dɛn bin du di fɔs wan dɛn.

³⁷ Wɛn dat pas, di man sɛn in bɔy pikin to dɛn. I se, ‘Dɛn go rɛspɛkt mi pikin.’

³⁸ Bɔt wɛn di pipul dɛn we rɛnt di gadin si di man in pikin, dɛn se, ‘Na dis pikin, dis prɔpati ya go lɛf to, lɛ wi kil am so dat di prɔpati go kam na wi an.’

³⁹ So dɛn ol am ɛn pul am kɔmɔt na di gadin, dɔn dɛn kil am.

⁴⁰ “Wɛn di man we gɛt di gadin kam, wetin i go du di pipul dɛn we rɛnt di gadin?”

⁴¹ Dɛn ansa se, “I go kil dɛn bad pipul de, dɔn i go rɛnt di gadin gi ɔda pipul we go gi am in yon pan wetin dɛn gɛda, wɛn di tɛm rich.”

⁴² Jizɔs aks dɛn se, “Una nɔ rid yet wetin rayt na Gɔd in Buk we se, ‘Da ston we dɛn pipul we de bil nɔ tek mek natin, nain dɔn bi di wan we impɔtant pas ɔl di ɔda wan dɛn. Na di Masta mek dat bi, ɛn di tin we di Masta du, so wɔndaful!’

⁴³ “So a de tɛl una se, ‘Di rayt we una gɛt fɔ mek Gɔd rul una nɔ go bi una yon igen, na dɛn pipul we go du wetin Gɔd want go gɛt am.’ [

⁴⁴ Di pɔsin we go fɔdɔm pan dis ston ya go brok in bon dɛn, ɛn if di ston fɔdɔm pan ɛnibɔdi, i go gren am.]”

⁴⁵ Wɛn di bigman dɛn we de mek sakrifays fɔ pipul sin ɛn di Ju Lɔ ticha dɛn yɛri di parebul we Jizɔs pul, dɛn no se na bɔt dɛn Jizɔs tɔk,

⁴⁶ so dɛn tray fɔ ol am, bɔt dɛn fred di krawd bikɔs di krawd bin biliv se Jizɔs na prɔfɛt.