Matyu 20 - Krio Fɔs Oli Baybul

Parebul bɔt di Lebra dɛn na Wan Fam

¹ “Gɔd in rul tan lɛkɛ we wan man we gɛt fam go wan ali mɔnin fɔ tek lebra dɛn we go wok nain fam.

² Di man gri fɔ gi dɛn lebra pe fɔ di de, dɛn i sɛn dɛn go wok nain fam.

³ Bay nayn oklɔk, di man go bak na di ples we ɔlman de gɛda, i si sɔm man dɛn we nɔ de du natin tinap de.

⁴ So i kɔl dɛn, i se, ‘Unasɛf kam go wok na mi fam, a go pe una wetin una fɔ gɛt.’

⁵ So di man dɛn go wok. Bay twɛlv oklɔk santɛm ɛn tri oklɔk i go bak go fɛn ɔda lebra dɛn.

⁶ Bay fayv oklɔk, wɛn di man go na di ples we ɔlman de gɛda, i si sɔm ɔda man dɛn stil tinap de. I aks dɛn se, ‘Wetin mek una tinap ya ol de, una nɔ de du natin?’

⁷ Dɛn ansa se, ‘Nɔbɔdi nɔ tek wi fɔ wok.’ Di man se, ‘Wɛl, unasɛf kam go wok na mi fam.’

⁸ “Wɛn ivintɛm rich, di man we gɛt di fam tɛl in edman fɔ di lebra dɛn fɔ kɔl di lebra dɛn fɔ kam tek dɛn pe. I bigin pe di lebra dɛn we i tek las sote i rich to di wan dɛn we i tek fɔs.

⁹ I gi di wan dɛn we i tek bay fayv oklɔk di sem pe lɛkɛ di wan dɛn we i tek ali mɔnin.

¹⁰ Wɛn di lebra dɛn we i tek ali mɔnin rich to di man we gɛt di fam, dɛn min se i go pe dɛn pas aw i pe di ɔda lebra dɛn, bɔt i gi dɛn ɔl di sem pe.

¹¹ Di lebra dɛn we i tek ali mɔnin tek dɛn mɔni ɛn bigin grɔmbul pan di man we gɛt di fam.

¹² Dɛn se, ‘Di lebra dɛn we yu tek las, na wan awa nɔmɔ dɛn wok, bɔt wi wok ol de ɛn di san bit wi, dɔn yu kam gi wi di sem pe.’

¹³ “Di man tɛl wan pan dɛn se, ‘Padi, lisin mi, a nɔ du yu bad, bikɔs yu bin gri fɔ tek lebra pe fɔ de.

¹⁴ Tek yu pe ɛn go na yu os. Na mi fil fɔ pe dɛn lebra we a tek las di sem pe we a gi yu.

¹⁵ A nɔ gɛt rayt fɔ du wetin a want wit mi mɔni? Na jɛlɔs una de jɛlɔs dɛn fɔ wetin a pe dɛn?’”

¹⁶ Nain Jizɔs tɔk se, “Dɛn wan we de las go de fɔs, ɛn dɛn wan we de fɔs go de las.”

Jizɔs Tɔk di Tɔd Tɛm bɔt In Day

¹⁷ Wɛn Jizɔs bin de go na Jerusɛlɛm, i kɛr in twɛlv lanin bɔy dɛn go. Wɛn dɛn de go, i kɔl dɛn na kɔna ɛn tɔk to dɛn.

¹⁸ I se, “Wi de go na Jerusɛlɛm, na de pipul dɛn go ol Mɔtalman Pikin ɛn an am ova gi dɛn bigman we de mek sakrifays fɔ pipul sin, ɛn di Ju Lɔ ticha dɛn, dɔn dɛn go jɔj am ɛn kɔndɛm am.

¹⁹ Afta dat, dɛn go an am ova gi di Roman bigman dɛn we de na Jerusɛlɛm. Di pipul dɛn we lib de go laf am, bit am ɛn nel am pan krɔs; bɔt i go rayz frɔm di grev di de we mek tri.”

Jems ɛn Jɔn dɛn Mama Aks Jizɔs fɔ Du Sɔntin

²⁰ Wɛn dat dɔn, Zɛbidi in wɛf ɛn in pikin dɛn kam mit Jizɔs; di uman nil dɔŋ bifo Jizɔs ɛn beg Jizɔs fɔ du sɔntin fɔ am.

²¹ Jizɔs aks am se, “Wetin yu want?” I ansa se, “A want mek yu prɔmis mi se, mi tu pikin dɛn go sidɔm klos yu wɛn yu de rul, wan fɔ sidɔm na yu raytan ɛn di ɔda wan na yu lɛfan.”

²² Jizɔs aks di pikin dɛn se, “Una nɔ no wetin una de aks fɔ. Una go ebul sɔfa lɛkɛ aw a go sɔfa?” Dɛn ansa se, “Wi go ebul, sa.”

²³ Jizɔs se, “Una go sɔfa lɛkɛ aw a go sɔfa, bɔt a nɔ gɛt di pawa fɔ mek una sidɔm na mi raytan ɔ lɛfan, mi Papa dɔn kip dɛn ples de fɔ dɛn pipul we i dɔn mak fɔ lib de.”

²⁴ Wɛn di ɔda lanin bɔy dɛn yɛri dat, dɛn vɛks pan di tu brɔda dɛn.

²⁵ So Jizɔs kɔl dɛn ɔl ɛn se, “Una no se, dɛn pipul we de rul dɛn wan we nɔ biliv Gɔd, gɛt pawa oba dɛn ɛn dɛn de tɛl dɛn wetin dɛn fɔ du ɔltɛm.

²⁶ Bɔt nɔto so i go bi fɔ una. If ɛni wan pan una want fɔ bi bigman, i fɔ wok fɔ una ɔl lɛkɛ se in na una bɔy.

²⁷ Ɛn ɛni wan pan una we want de bifo, fɔ bi slev fɔ una ɔl;

²⁸ una fɔ tan lɛkɛ Mɔtalman Pikin, we nɔ kam fɔ mek mɔtalman bi in savant, bɔt i kam fɔ bi dɛn savant ɛn fɔ gi in layf fɔ sev plɛnti plɛnti pipul.”

Jizɔs Mɛn Tu Blɛnyay Man

²⁹ Wɛn Jizɔs de kɔmɔt Jɛriko, plɛnti pipul bin de fala am.

³⁰ Tu blɛnyay man bin sidɔm klos di rod; wɛn dɛn yɛri se Jizɔs de pas, dɛn bigin ala se, “Yu we na Devid in pikin, sɔri fɔ wi, sa.

³¹ Di pipul dɛn tɔk pan dɛn mek dɛn sɛt mɔt; bɔt na di mɔ dɛn bin de ala se, “Yu we na Devid in pikin, sɔri fɔ wi, sa!”

³² Jizɔs tinap ɛn kɔl dɛn, i aks dɛn se, “Wetin una want mek a du fɔ una?”

³³ Dɛn ansa se, “Mɛn wi yay fɔ wi, sa, so dat wi go ebul si!”

³⁴ Jizɔs sɔri fɔ dɛn, i tɔch dɛn yay; dɛn si wantɛm, ɛn dɛn fala am.