Matyu 19 - Krio Fɔs Oli Baybul

Jizɔs Lan Pipul bɔt Mared we Pwɛl

¹ Wɛn Jizɔs dɔn tɔk dɛn tin de, i kɔmɔt Galili go Judia, dɛn i krɔs Riva Jɔdan.

² Plɛnti pipul dɛn fala am go de, ɛn i mɛn ɔl di sik pipul dɛn.

³ Sɔm Faresi dɛn kam fɔ tray Jizɔs, dɛn aks am se, “Di Ju Lɔ se ɛni man kin tɛl in wɛf se in nɔ want am fɔ bi in wɛf igen?”

⁴ Jizɔs ansa di Faresi dɛn, i se, “Una nɔ rid da say na Gɔd in Buk we se, wɛn Gɔd mek di wɔl, i mek tu kayn pipul, man ɛn uman?

⁵ Ɛn Gɔd se, ‘Na dat mek man go lɛf in papa ɛn mama, so dat in ɛn in wɛf go de wan ples, ɛn dɛn tu go de lɛkɛ se dɛn na wan pɔsin.’

⁶ So dɛn nɔto tu pipul igen, dɛn tu dɔn de lɛkɛ wan pɔsin. Mek nɔbɔdi nɔ pat man ɛn uman we Gɔd dɔn jɔyn lɛkɛ wan pɔsin.”

⁷ Di Faresi dɛn aks am se, “Wɛl, wetin mek Mozis bin gi wi lɔ we alaw man fɔ gi in wɛf pepa we i want pat wit am?”

⁸ Jizɔs ansa dɛn se, “Na bikɔs una at traŋa, mek Mozis bin gi una da lɔ de we se man kin pat wit in wɛf, bɔt nɔto so i bin de bi fɔs fɔs tɛm wɛn Gɔd jɛs mek man ɛn uman.

⁹ A de tɛl una se: ɛni wan we pat wit in wɛf fɔ ɛni rizin pas we i nɔ tru to am, dɔn i mared ɔda uman, i dɔn brok di lɔ we tɔk bɔt mared.”

¹⁰ Jizɔs in lanin bɔy dɛn se, “Wɛl, if na so mared tan, i go bɛtɛ nɔ fɔ mared.”

¹¹ Bɔt Jizɔs ansa dɛn se, “Nɔto ɔlman kin du wetin a lan una so, na di wan dɛn nɔmɔ we Gɔd dɔn mak kin du am.

¹² Difrɛn difrɛn rizin de we mek sɔm man nɔ ebul mared: sɔm man bɔn so; ɛn sɔm na dɛn kɔmpin mɔtalman mek dɛn so; ɛn sɔm ɔda man dɛn nɔ want mared bikɔs dɛn want gi Gɔd ɔl dɛn layf fɔ du in wok. So udat ebul tek wetin a jɛs tɔk so, fɔ du am.”

Jizɔs Blɛs dɛn Lili Pikin

¹³ Sɔm pipul kɛr pikin dɛn to Jizɔs, so dat i go put in an pan dɛn ɛn pre fɔ dɛn. Bɔt di lanin bɔy dɛn tɔk pan di pipul dɛn.

¹⁴ Jizɔs se, “Una lɛf di pikin dɛn fɔ kam to mi; una nɔ tap dɛn, na pipul lɛkɛ dɛn pikin ya go kam ɔnda Gɔd in rul.”

¹⁵ Jizɔs put in an pan dɛn ed, i blɛs dɛn, dɔn i lɛf dɛn go.

Wan Jɛntri Yɔŋ Man

¹⁶ Wans ɔf tɛm, wan man kam mit Jizɔs ɛn aks am se, “Ticha, wetin na di gud tin we a go du we go mek a gɛt layf we go de sote go?”

¹⁷ Jizɔs aks am se, “Wetin du yu aks mi bɔt ɛnitin we gud? Na Gɔd wangren gud, nɔbɔdi nɔ de igen we gud. Yu fɔ fala dɛn lɔ we Mozis bin gi, if yu want layf we go de sote go.”

¹⁸ Di man aks Jizɔs se, “Uswan pan di lɔ dɛn a fɔ kip?” Jizɔs se, “Yu nɔ fɔ kil yu kɔmpin mɔtalman; maredman nɔ fɔ lɛf in wɛf go kip ɔda uman ɛn mare du man nɔ fɔ lɛf in man go kip ɔda man; yu nɔ fɔ tif; yu nɔ fɔ lay pan yu kɔmpin;

¹⁹ yu fɔ rɛspɛkt yu papa ɛn mama; yu fɔ lɛk yu kɔmpin lɛkɛ aw yu lɛk yusɛf.”

²⁰ Di yɔŋman ansa Jizɔs se, “A dɔn kip ɔl dɛn lɔ ya. Wetin lɛf we a fɔ du?”

²¹ Jizɔs se, “If yu want bi pɔsin we fit na Gɔd yay fɔ gɛt layf we go de sote go, yu fɔ sɛl ɔl wetin yu gɛt ɛn gi dɛn pipul we nɔ gɛt natin, di mɔni; if yu du so, yu go jɛntri na ɛvin. Wɛn yu dɔn du dat dɔn, kam bak ɛn bi mi lanin bɔy.”

²² Wɛn di yɔŋman yɛri wetin Jizɔs tɔk, in at pwɛl wɛn i lɛf Jizɔs de go, bikɔs i bin jɛntri bad.

²³ Wɛn i dɔn go, Jizɔs bigin tɔk to in lanin bɔy dɛn, i se, “A de tɛl una fɔ tru se, i go traŋa bad fɔ mek dɛn jɛntri pipul kam ɔnda Gɔd in rul.

²⁴ A de tɛl una igen se, i traŋa fɔ mek da big bif we nem kamɛl pas insay nidul yay, bɔt i traŋa pas dat fɔ mek jɛntri pɔsin kam ɔnda Gɔd in rul.”

²⁵ Wɛn di lanin bɔy dɛn yɛri wetin Jizɔs tɔk, dɛn wɔnda bad wan; dɛn aks am se, “If na so i bi, udat go sev?”

²⁶ Jizɔs luk dɛn gud ɛn se, “Mɔtalman nɔ ebul du dat, bɔt Gɔd ebul du ɔltin.”

²⁷ Nain Pita tɔk se, “Luk, wi dɔn lɛf ɔltin fɔ fala yu. Wetin Gɔd go gi wi?”

²⁸ Jizɔs se, “A de tɛl una se, nɛks wɔl wɛn Mɔtalman Pikin go sidɔm nain chia fɔ rul di wɔl wit in wɔndaful pawa na ɛvin, una twɛlv we dɔn de wit mi, go sidɔm pan twɛlv chia fɔ rul di twɛlv neshɔn dɛn we de na Izrɛl.

²⁹ Ɛnibɔdi we lɛf os, ɔ brɔda, ɔ sista, ɔ papa, ɔ mama, ɔ pikin dɛn, ɔ prɔpati fɔ bi mi lanin bɔy, Gɔd go mek i gɛt bɔku pas wetin i lɛf ɛn i go gi am layf we go de sote go.

³⁰ Bɔt plɛnti pipul we de bifo dɛn kɔmpin naw, go de biɛn; ɛn plɛnti pipul we de biɛn naw, go go bifo.