Matyu 18 - Krio Fɔs Oli Baybul

Udat Impɔtant Pas Ɔl

¹ I nɔ tu te, di lanin bɔy dɛn kam aks Jizɔs se, “Udat impɔtant pas ɔl in kɔmpin dɛn pan ɔl dɛn wan we Gɔd de rul?”

² So Jizɔs kɔl wan pikin, i mek di pikin tinap bifo dɛn;

³ dɛn Jizɔs se, “A de tɛl una se, pas una chenj una we ɛn tan lɛkɛ lili pikin, Gɔd nɔ go rul una.

⁴ Di pɔsin we go put in yay dɔŋ ɛn tan lɛkɛ dis pikin, na da pɔsin de go bi impɔtant pas ɔl di wan dɛn we Gɔd de rul.

⁵ Ɛnibɔdi we gladi fɔ tek pikin lɛkɛ dis, fɔseka mi, na mi di pɔsin gladi fɔ tek.

Una Nɔ fɔ Mek Ɔda Pɔsin Sin

⁶ “Ɛnibɔdi we mek wan pan dɛn lili pikin lɛkɛ dis we biliv pan mi, sin, i go bɛtɛ fɔ da pɔsin de if dɛn ɛŋ big ston nain nɛk, ɛn ib am na dip wata.

⁷ I bad fɔ ɔlman bikɔs tin dɛn de na di wɔl we de mek pipul dɛn nɔ biliv pan mi. Dɛn tin ya mɔs bi, bɔt i go bad fɔ di pɔsin we mek dɛn bi.

⁸ “If yu an ɔ fut mek yu sin, kɔt am kɔmɔt ɛn trowe am. I go bɛtɛ if yu gɛt wan fut ɔ wan an ɛn gɛt layf we go de sote go na ɛvin, pas if yu gɛt tu fut ɛn tu an ɛn go na ɛl faya we nɔ de ɔt.

⁹ Ɛn if yu yay mek yu sin, pul am kɔmɔt ɛn trowe am. I go bɛtɛ fɔ lɛ yu gɛt wan yay ɛn gɛt layf we go de sote go na ɛvin, pas if yu gɛt tu yay ɛn go na ɛl faya.

Di Ship we Lɔs

¹⁰ “Una fɔ mek shɔ se una nɔ luk se ɛni wan pan dɛn lili wan ya nɔ bɛtɛ. A de tɛl una se, dɛn lili wan ya, dɛn yon enjɛl dɛn we de na ɛvin de luk mi Papa in fes ɔltɛm! [

¹¹ Mɔtalman Pikin kam fɔ sev dɛn pipul we dɔn lɔs dɛn we.]

¹² “Una tɛl mi, if wan man gɛt wan ɔndrɛd ship, ɛn wan pan di ship dɛn lɔs, di man nɔ go lɛf di naynti-nayn ship na di il, ɛn tɔn bak go luk fɔ di wan ship we lɔs?

¹³ We di man fɛn di ship, a de tɛl una se, i go gladi fɔ am pas aw i gladi fɔ di naynti-nayn ship we nɔ lɔs wande.

¹⁴ Semwe so, una Papa we de na ɛvin nɔ want mek ɛni wan pan dɛn lili pikin we biliv pan Jizɔs, lɔs.

Di Kristiɛn we Du In Kɔmpin Bad

¹⁵ “If yu kɔmpin Kristiɛn du yu bad, yu fɔ go mit am mek una tu tɔk di wɔd. If i gri se in du bad, da tɛm de una tu dɔn bi brɔda bak.

¹⁶ Bɔt if i nɔ gri se in du bad, kɛr wan ɔ tu Kristiɛn dɛn go mit am, so dat tu ɔ tri witnɛs go de fɔ no wetin yu tɛl am.

¹⁷ If di pɔsin nɔ tek wetin di tu ɔ tri witnɛs tɛl am, yu fɔ tɔk wetin di pɔsin du yu na di chɔch mek ɔlman yɛri. Bɔt if di pɔsin nɔ gri tek wetin di chɔch pipul dɛn tɛl am, da tɛm de yu fɔ tek am lɛkɛ pɔsin we nɔ biliv pan Gɔd ɛn pɔsin we nɔ gri fɔ lɛf di bad we i de du.

Di Pawa we Jizɔs Gi In Pipul dɛn

¹⁸ “A de tɛl una se, ɛnitin we una nɔ gri fɔ na dis wɔl, Gɔd nɔ go gri fɔ am na ɛvin, bɔt ɛnitin we una gri fɔ na dis wɔl, Gɔd go gri fɔ am na ɛvin.

¹⁹ “A de tɛl una igen se, if tu pan una gri fɔ aks Gɔd fɔ du sɔntin na dis wɔl, mi Papa we de na ɛvin go du di tin fɔ una.

²⁰ Bikɔs ɛni say we tu ɔ tri Kristiɛn gɛda fɔ pre to mi ɛn ɔna mi, a go de wit dɛn.”

Jizɔs Se Wi fɔ Padin Pipul Ɔltɛm

²¹ Afta dat, Pita kam mit Jizɔs ɛn aks am se, “Masta, ɔmɔs tɛm a fɔ padin mi kɔmpin Kristiɛn we de du mi bad ɔltɛm? A fɔ padin am te i rich sɛvin tɛm?”

²² Jizɔs se, “Nɔ, o, nɔto sɛvin tɛm nɔmɔ, yu fɔ padin am pas sɛvinti-sɛvin tɛm sɛf.

²³ Bikɔs Gɔd in rul tan lɛkɛ dis: Wan kiŋ bin de lɔntɛm; i bin gɛt plɛnti ɔfisa dɛn we bin gɛt fɔ pe am. Di kiŋ tɛl dɛn se in wan luk di buk we i bin de rayt ɔmɔs dɛn gɛt fɔ pe am.

²⁴ Wɛn di kiŋ bigin luk di buk, nain, wan in ɔfisa kɛr in kɔmpin ɔfisa we bin gɛt fɔ pe di kiŋ mɔni we rich wan milyɔn, go bifo am.

²⁵ Di ɔfisa nɔ bin gɛt kɔpɔ fɔ pe di dɛt, so di kiŋ se mek dɛn sɛl di ɔfisa wit in wɛf ɛn in pikin dɛn lɛkɛ slev, ɛn sɛl ɔl di prɔpati we i gɛt, fɔ mek i go pe di dɛt.

²⁶ So di ɔfisa nil dɔŋ ɛn beg di kiŋ. I se, ‘Masta, duya, bia wit mi, a go pe yu ɔltin.’

²⁷ Di kiŋ sɔri fɔ am, i lɛf di mɔni gi am ɛn mek i go fri.

²⁸ “Bɔt wɛn di ɔfisa we di kiŋ sɔri fɔ dɔn go, i mit wan in kɔmpin ɔfisa we bin gɛt fɔ pe am kɔpɔ we nɔ plɛnti. I skɔla am nain trot ɛn se, ‘Pe mi ɔl wetin yu gɛt fɔ pe mi!’

²⁹ In kɔmpin ɔfisa nil dɔŋ ɛn beg am, i se, ‘Duya, bia wit mi, a go pe yu.’

³⁰ Bɔt di ɔfisa nɔ gri tek beg, i mek dɛn ol in kɔmpin ɛn put am na jel sote i pe ɔl di dɛt.

³¹ Wɛn in kɔmpin ɔfisa dɛn yɛri wetin bi, dɛn at pwɛl, so dɛn go tɛl di kiŋ ɔl wetin bi.

³² So di kiŋ mek dɛn kɔl di ɔfisa we bin gɛt fɔ pe am, i se, ‘Yu wikɛd ɔfisa! A nɔ bin mek yu pe di mɔni we yu bin gɛt fɔ pe mi, bikɔs yu beg mi.

³³ Yusɛf bin fɔ sɔri fɔ yu kɔmpin we bin gɛt fɔ pe yu, lɛkɛ aw a bin sɔri fɔ yu.’

³⁴ Di kiŋ bin vɛks bad, so i mek dɛn sɛn di ɔfisa go jel sote i pe ɔl di dɛt.”

³⁵ So Jizɔs se, “Na so Gɔd we na mi Papa we de na ɛvin go du ɛni wan pan una, if una nɔ padin una kɔmpin we du una bad, wit ɔl una at.”