Matyu 17 - Krio Fɔs Oli Baybul

Jizɔs Chenj Na Dɛn Yay

¹ Afta siks de pas, Jizɔs tek Pita, Jems ɛn in brɔda Jɔn go na wan ay il, na dɛn nɔmɔ bin lib de.

² Aw dɛn de luk, nain Jizɔs chenj na dɛn yay, in fes bigin shayn lɛkɛ di san, ɛn in klos bin wayt lɛkɛ brayt layt.

³ Di tri lanin bɔy dɛn si Mozis ɛn Ilayja de tɔk wit Jizɔs.

⁴ So Pita bigin tɔk to Jizɔs, i se, “Masta, i gud we wi de na ya! If yu lɛk, a go bil tri bafa na ya, wan fɔ yu, wan fɔ Mozis ɛn wan fɔ Ilayja.”

⁵ Wɛn Pita dɔn tɔk dɔn, wan klawd we bin de shayn, kɔba dɛn, dɔn dɛn yɛri wan vɔys de tɔk na di klawd se, “Dis na mi Pikin we a lɛk bad, a gladi fɔ am, una lisin wetin i de tɛl una.”

⁶ Wɛn di lanin bɔy dɛn yɛri di vɔys, dɛn fred sote dɛn fɔdɔm wit dɛn fes na grɔn.

⁷ Jizɔs kam tɔch dɛn, ɛn se, “Una grap, una nɔ fred!”

⁸ So dɛn luk ɔp, bɔt dɛn nɔ si nɔbɔdi igen, pas Jizɔs.

⁹ Wɛn dɛn de kam dɔŋ di il, Jizɔs se, “Una nɔ tɛl ɛnibɔdi bɔt wetin una si jisnɔ, una wet sote di tɛm we Mɔtalman Pikin go rayz frɔm di grev.”

¹⁰ Di lanin bɔy dɛn aks Jizɔs se, “Wetin mek di Ju Lɔ ticha dɛn se Ilayja gɛt fɔ tɔn bak kam na wɔl bifo dɛn tin ya go bi?”

¹¹ Jizɔs ansa se, “Dɛn rayt na Gɔd in Buk se Ilayja go kam bak fɔ rɛdi ɔltin.

¹² Bɔt a de tɛl una fɔ tru se, Ilayja bin dɔn kam, bɔt pipul dɛn nɔ bin no am, dɛn bin du am wetin dɛn lɛk. Semwe so dɛn go mek Mɔtalman Pikin sɔfa.”

¹³ Na da tɛm de di lanin bɔy dɛn no se Jizɔs bin de tɔk bɔt Jɔn we bin de baptayz pipul.

Jizɔs Mɛn Wan Bɔbɔ we Dɛbul de Tɔmɛnt

¹⁴ Wɛn Jizɔs ɛn in lanin bɔy dɛn kam mit di pipul dɛn wan man kam nil dɔŋ bifo Jizɔs ɛn se,

¹⁵ “Masta, duya, sɔri fɔ mi pikin we gɛt fiks, i so bad pan am dat i kin de fɔdɔm na faya ɛn wata.

¹⁶ A briŋ di pikin kam to yu lanin bɔy dɛn, bɔt dɛn nɔ ebul mɛn am.”

¹⁷ Jizɔs se, “Una dɛn tide pipul ya nɔ biliv mi ɛn una traŋayes. Aw lɔŋ a go de wit una? Aw lɔŋ a fɔ bia wit una? Briŋ di pikin kam to mi.”

¹⁸ Jizɔs tɔk pan di dɛbul we bin de tɔmɛnt di bɔbɔ, so di dɛbul lɛf di bɔbɔ. Da sem tɛm de di bɔbɔ wɛl.

¹⁹ Afta dat, di lanin bɔy dɛn go to Jizɔs na kɔna ɛn aks am se, “Wetin du wi nɔ ebul drɛb di dɛbul?”

²⁰ Jizɔs ansa dɛn se, “Na we una nɔ biliv Gɔd gud wan. A de tɛl una se, if una biliv, ilɛk di biliv we una biliv smɔl lɛkɛ mɔstad sid, una kin tɛl dis mawnten se, ‘Kɔmɔt na ya, go yanda!’ Ɛn i go bi. Ɛn natin nɔ de we una nɔ go ebul du! [

²¹ Bɔt una nɔ go ebul du dis kayn wok if una nɔ fast ɛn pre.]”

Jizɔs Tɔk Igen bɔt In Day

²² Wɛn ɔl di lanin bɔy dɛn mit na Galili, Jizɔs tɛl dɛn se, “I dɔn de rich tɛm we dɛn go an ova Mɔtalman Pikin gi pipul.

²³ Di pipul dɛn go kil am, dɔn i go rayz frɔm di grev di de we mek tri.” Di lanin bɔy dɛn sɔri bad bad.

Jizɔs Tɔk bɔt di Taks we fɔ Pe na Gɔd In Os

²⁴ Wɛn Jizɔs ɛn in lanin bɔy dɛn rich Kepanyɔm, di pipul dɛn we de gɛda taks fɔ pe fɔ di ɛkspɛnsis na Gɔd in Os kam mit Pita ɛn aks am se, “Una ticha de pe di taks we dɛn Ju pipul de pe fɔ di ɛkspɛnsis na Gɔd in Os?”

²⁵ Pita se, “Yɛs!” Wɛn Pita rich na os, Jizɔs fɔs tɔk to am, i se, “Saymɔn, wetin yu tink, udat fɔ pe di difrɛn taks dɛn to di rula dɛn na dis wɔl, di pipul dɛn we gɛt di kɔntri ɔ di trenja dɛn?”

²⁶ Pita ansa se, “Na di trenja dɛn fɔ pe di difrɛn taks dɛn.” Jizɔs se, “So di pipul dɛn we gɛt di kɔntri nɔ fɔ pe.

²⁷ Bɔt fɔ mek dɛn pipul ya nɔ vɛks pan wi, tek yu uk go fishin na Lek Galili. Di fɔs fish we yu kech, opin in mɔt, yu go si wan silva kɔpɔ we go du fɔ pe ɔl wi difrɛn taks dɛn na Gɔd in Os. Yu tek am pe fɔ wi tu.”