Matyu 15 - Krio Fɔs Oli Baybul

Wetin dɛn Granpapa-papa Lan dɛn

¹ Sɔm Faresi ɛn sɔm Ju Lɔ ticha dɛn kɔmɔt Jerusɛlɛm kam mit Jizɔs ɛn aks am se,

² “Wetin du yu lanin bɔy dɛn nɔ de du dɛn tin we wi grampapa papa dɛn bin lan wi? Dɛn nɔ de was dɛn an di spɛshal we bifo dɛn it lɛkɛ aw wi grampapa papa dɛn bin lan wi fɔ du.”

³ Jizɔs aks dɛn bak se, “Wetin du una nɔ de du wetin Gɔd tɛl una, bɔt una de du wetin una granpapa-papa dɛn tɛl una?

⁴ Gɔd se, ‘Rɛspɛkt yu papa ɛn mama,’ ɛn ‘Ɛnibɔdi we tɔk bad bɔt in papa ɔ in mama, dɛn fɔ kil am.’

⁵ Bɔt una se, if pɔsin gɛt tin fɔ gi in papa ɔ in mama fɔ ɛp dɛn, bɔt i se, ‘A dɔn prɔmis fɔ gi Gɔd dis tin ya,’

⁶ una se da pɔsin de nɔ bawn fɔ gi in papa di tin fɔ ɛp am. Dat sho se una dɔn lɛf fɔ du wetin Gɔd se, una jɛs de du wetin una grampapa papa dɛn lan una.

⁷ Una na ipokrit! Na tru da prɔfɛt we nem Ayzaya bin tɔk bɔt una we i se,

⁸ ‘Gɔd se, dɛn pipul ya de rɛspɛkt mi wit dɛn mɔt, bɔt dɛn nɔ want du wetin a tɛl dɛn fɔ du, bikɔs dɛn at nɔ de fɔ mi.

⁹ Di pre we dɛn de pre to mi nɔ min natin, bikɔs dɛn de lan pipul dɛn lɔ we nɔto mi yon.’”

Dɛn Tin we de Mek Pɔsin Sin

¹⁰ Jizɔs kɔl di pipul dɛn fɔ kam klos am, dɛn i se, “Una lisin wetin a de tɛl una, so dat una go lan!

¹¹ Nɔto wetin pɔsin de it de mek i nɔ klin na Gɔd yay, bɔt na wetin di pɔsin de tɔk de mek i nɔ klin na Gɔd yay.”

¹² Di lanin bɔy dɛn se, “Yu bin no se, di Faresi dɛn bin vɛks wɛn dɛn yɛri wetin yu tɔk?”

¹³ Jizɔs se, “Mi Papa we de na ɛvin go rut ɛni plant kɔmɔt we insɛf nɔ plant.

¹⁴ Una lɛf dɛn; dɛn na blɛnyay pipul we de tray fɔ lid ɔda blɛnyay pipul, ɛn if blɛnyay pɔsin lid in kɔmpin, dɛn ɔl tu go fɔdɔm na ol.”

¹⁵ Pita aks Jizɔs mek i tɛl dɛn di parebul in minin.

¹⁶ Nain Jizɔs aks dɛn se, “Fɔ se, sote naw, una nɔ ebul ɔndastand lɛkɛ dɛn ɔda pipul?

¹⁷ Una nɔ si se ɛnitin we pas na una mɔt, na una bɛlɛ i de go, bifo una go pul am kɔmɔt na di bɔdi?

¹⁸ Bɔt di wɔd dɛn we pɔsin de tɔk sho udat i bi, bikɔs nain at di wɔd dɛn de kɔmɔt, ɛn na dat de mek pɔsin nɔ klin na Gɔd in yay.

¹⁹ Nainsay di at pɔsin de mekɔp fɔ du bad tin, fɔ kil; fɔ kip ɔda uman wɛn i dɔn mared, ɔ, if na uman, fɔ kip ɔda man, wɛn i dɔn mared; fɔ slip wit uman wɛn i nɔ mared yet, ɔ if na uman, fɔ slip wit man wɛn i nɔ mared yet; ɔ fɔ tif; fɔ lay pan pipul wɛn in na witnɛs, ɛn fɔ tɔk bad bɔt ɔda pipul.

²⁰ Na tin dɛn lɛkɛ dɛn wan ya de mek pɔsin nɔ klin na Gɔd in yay, nɔto we pɔsin nɔ was in an bifo i it.”

Jizɔs Mɛn Wan Uman In Gyal Pikin

²¹ Jizɔs kɔmɔt de, i go na di kɔntri dɛn we de klos Taya ɛn Saydɔn.

²² Wan Kenan uman, we bin kɔmɔt na wan ples we bin de klos Taya ɛn Saydɔn, kam mit Jizɔs ɛn se, “Masta, yu we na Devid in pikin, sɔri fɔ mi! Mi gyal pikin sik bad bikɔs dɛbul de tɔmɛnt am.”

²³ Bɔt Jizɔs nɔ tɔk natin. Jizɔs in lanin bɔy dɛn go beg Jizɔs, dɛn se, “Drɛb dis uman we de fala wi, sa, i de mek nɔys!”

²⁴ Jizɔs ansa se, “Na to dɛn pipul na Izrɛl we tan lɛkɛ dɛn ship we lɔs, na to dɛn nɔmɔ Gɔd sɛn mi.”

²⁵ Di uman nil dɔŋ bifo Jizɔs ɛn se, “Masta, ɛp mi.”

²⁶ Jizɔs ansa se, “I nɔ rayt fɔ tek di pikin dɛn it ib am gi dɔg.”

²⁷ Di uman se, “Na tru, sa, bɔt di dɔg dɛnsɛf kin it di af af bred dɛn we de fɔdɔm wɛn di masta de it na tebul.”

²⁸ Jizɔs se, “Yu na uman we biliv gud gud! Mek wetin yu want bi.” Di pikin wɛl da sem tɛm de.

Jizɔs Mɛn Plɛnti Pipul

²⁹ Jizɔs kɔmɔt de ɛn i waka na di bich we de klos Lek Galili, dɔn i go klem ɔp wan il ɛn sidɔm de.

³⁰ Plɛnti pipul briŋ dɛn pipul we nɔ ebul waka, dɛn wan we blɛn, dɛn wan we dɛn an ɔ fut day, dɛn wan we na mumu, ɛn plɛnti ɔda pipul we sik, ɛn put dɛn bifo Jizɔs. Jizɔs mɛn dɛn ɔl wan bay wan.

³¹ Di pipul dɛn wɔnda wɛn dɛn yɛri mumu de tɔk; wɛn dɛn si dɛn wan we nɔ bin ebul waka, de waka; wɛn dɛn si se dɛn wan we dɛn an ɔ fut bin day, dɔn wɛl; ɛn dɛn wan we bin blɛn, de si. Dɛn prez di Gɔd we di pipul dɛn na Izrɛl de pre to.

Jizɔs Fid Pas Fo Tawzin Pipul

³² Jizɔs kɔl in lanin bɔy dɛn. Wɛn dɛn kam, i bigin tɔk to dɛn, i se, “A sɔri fɔ dɛn pipul ya, bikɔs dɛn dɔn de tri de wit mi, ɛn naw dɛn nɔ gɛt tin fɔ it. A nɔ want mek dɛn go ɛmti bɛlɛ, sɔntɛm dɛn go fent na rod.”

³³ Di lanin bɔy dɛn aks Jizɔs se, “Usay wi go gɛt bred na dɛzat lɛkɛ dis, we go du fɔ ɔl dɛn pipul ya?”

³⁴ Jizɔs aks dɛn se, “Ɔmɔs bred una gɛt?” Dɛn se, “Na sɛvin bred ɛn sɔm smɔl-smɔl fish nɔmɔ.”

³⁵ So Jizɔs tɛl ɔl di pipul dɛn fɔ sidɔm na grɔn.

³⁶ Dɔn i tek di sɛvin bred ɛn di smɔl-smɔl fish dɛn, ɛn pre ɛn tɛl Gɔd tɛnki; i kɔt kɔt di bred ɛn di fish, ɛn gi in lanin bɔy dɛn fɔ sheb gi di pipul dɛn.

³⁷ Ɔlman it te dɛn bɛlful. Ɛn wɛn di lanin bɔy dɛn gɛda di af af we lɛf, i ful sɛvin blay.

³⁸ Di man dɛn nɔmɔ we bin it rich fo tawzin, ɛn dɛn nɔ kɔnt dɛn uman ɛn dɛn pikin.

³⁹ Jizɔs mek di pipul dɛn go, dɔn i tek bot krɔs go Magadɔn.