Matyu 14 - Krio Fɔs Oli Baybul

Dɛn Kil Jɔn we Bin de Baptayz Pipul

¹ Da sem tɛm de, Ɛrɔd we bin de rul na Galili, yɛri bɔt Jizɔs.

² I bigin tɔk to in ɔfisa dɛn, i se, “Dis nɔto ɔda pɔsin pas Jɔn we bin de baptayz, i dɔn gɛt layf bak. Na dat mek i gɛt pawa fɔ du wɔndaful wok.”

³ Kiŋ Ɛrɔd tɔk dat, bikɔs i bin dɔn mek dɛn ol Jɔn we bin de baptayz, tay am, ɛn put am na sɛl. Kiŋ Ɛrɔd bin du dat fɔseka Filip in wɛf, Ɛrodias; Filip na bin Kiŋ Ɛrɔd in brɔda.

⁴ Jɔn we bin de baptayz bin de tɛl Kiŋ Ɛrɔd se i nɔ rayt fɔ mek i mared Ɛrodias we nain brɔda, Filip in wɛf.

⁵ Kiŋ Ɛrɔd bin dɔn want fɔ kil Jɔn, bɔt i bin de fred di Ju pipul dɛn, bikɔs di Ju pipul dɛn bin tek Jɔn fɔ bi prɔfɛt.

⁶ Bɔt di de we dɛn mek Kiŋ Ɛrɔd in batde, Ɛrodias in gyal pikin dans fɔ di pipul dɛn ɛn Kiŋ Ɛrɔd. Kiŋ Ɛrɔd bin so gladi fɔ di dans we i dans,

⁷ dat i swɛ se, in go gi Ɛrodias in gyal pikin ɛnitin we i aks am fɔ.

⁸ Ɛrodias bin dɔn put wɔd nain pikin yes, so i tɛl di kiŋ se, “Put Jɔn, we bin de baptayz pipul, in ed na plet ɛn briŋ am kam gi mi naw!”

⁹ Di kiŋ bin sɔri bad, bɔt bikɔs i bin dɔn swɛ bifo ɔlman, i tɛl dɛn fɔ gi di gyal pikin, Jɔn in ed.

¹⁰ So i sɛn na di jel se mek dɛn go kɔt Jɔn in ed kɔmɔt.

¹¹ Dɛn put Jɔn in ed na plet, briŋ am kam gi di gyal pikin, dɔn i kɛr am go to in mama.

¹² Jɔn in lanin bɔy dɛn kam tek di bɔdi, dɛn go bɛr am, dɔn dɛn go tɛl Jizɔs.

Jizɔs Fid Pas Fayv Tawzin Pipul

¹³ Wɛn Jizɔs yɛri bɔt dat, i lɛf di ples we i bin de, tek bot go na ples we pipul nɔ bin de. Wɛn di pipul dɛn yɛri bɔt dat, dɛn kɔmɔt na di tɔŋ dɛn we dɛn bin de, dɛn waka bay land go mit Jizɔs.

¹⁴ As Jizɔs kɔmɔt na di bot go na di sho, i mit plɛnti pipul; i sɔri fɔ dɛn ɛn mɛn di sik wan dɛn.

¹⁵ Da sem ivintɛm de, in lanin bɔy dɛn go mit am, dɛn se, “Ivintɛm dɔn kam, ɛn dis na ples we pipul nɔ tap. Tɛl di pipul dɛn fɔ go bay it fɔ dɛnsɛf na dɛn vilej we de klos ya.”

¹⁶ Jizɔs tɛl dɛn se, “Una nɔ fɔ sɛn di pipul dɛn go, una fɔ gi dɛn tin fɔ it!”

¹⁷ Di lanin bɔy dɛn se, “Wi nɔ gɛt pas fayv lof bred ɛn tu fish.”

¹⁸ Jizɔs se, “Una briŋ dɛn kam.”

¹⁹ I tɛl di pipul dɛn fɔ sidɔm na di gras; dɔn i tek di fayv lof bred ɛn di tu fish, i luk ɔp na ɛvin ɛn pre ɛn tɛl Gɔd tɛnki. I kɔt kɔt di lof bred gi in lanin bɔy dɛn, dɔn di lanin bɔy dɛn sheb am gi di pipul dɛn.

²⁰ Ɔlman it te dɛn bɛlful. Wɛn di lanin bɔy dɛn pik di af af we dɛn it lɛf, i ful twɛlv blay.

²¹ Di man dɛn we it bin rich fayv tawzin, ɛn dɛn nɔ kɔnt di uman dɛn ɛn di pikin dɛn.

Jizɔs Waka Pantap Wata

²² Jizɔs mek di lanin bɔy dɛn tek bot ɛn krɔs go oba Lek Galili, bɔt in lɛf biɛn fɔs fɔ tɛl di pipul dɛn mek dɛn tɔn bak go na dɛn os.

²³ Wɛn i dɔn mek ɔl di pipul dɛn tɔn bak go na dɛn os, in wan go ɔp di il go pre. I bin lib de sote ivintɛm.

²⁴ Da tɛm de di bot bin dɔn de midul di lek. Di wata bin rɔf so di bot nɔ bin stɛdi, bikɔs di briz bin de blo traŋa wan.

²⁵ Midul nɛt bay tri oklɔk, Jizɔs waka pantap di wata go mit in lanin bɔy dɛn.

²⁶ Wɛn dɛn si am de waka pantap di wata, dɛn se, “Na gost,” dɛn ala bikɔs dɛn fred.

²⁷ Jizɔs tɔk to dɛn wantɛm. I se, “Una nɔ fred, una nɔ wɔri, na mi dis!”

²⁸ Nain Pita se, “Masta, if na yu, fɔ tru, mek a waka pantap di wata go mit yu.”

²⁹ Jizɔs se, “Kam!” So Pita kɔmɔt insay di bot ɛn bigin waka pantap di wata fɔ go mit Jizɔs.

³⁰ Bɔt Pita fred wɛn i fil di trɔŋ briz, nain i bigin sink na di wata. I ala se, “Masta, sev mi!”

³¹ Jizɔs tret in an ɛn ol Pita wantɛm. I aks Pita se, “Yu nɔ biliv mi? Wetin mek yu dawt?”

³² Dɛn ɔl tu go insay di bot, dɛn di briz tap fɔ blo.

³³ Di lanin bɔy dɛn we bin de insay di bot nil dɔŋ bifo Jizɔs ɛn se, “Fɔ tru, yu na Gɔd in Pikin!”

Jizɔs Mɛn Sik Pipul na Gɛnɛzarɛt

³⁴ Wɛn dɛn krɔs Lek Galili, dɛn rich Gɛnɛzarɛt.

³⁵ Di pipul dɛn na di ples bin no se na Jizɔs; so dɛn sɛn kɔl ɔl di sik pipul dɛn ɔlɔbɔt, dɔn dɛn kɛr dɛn go mit Jizɔs.

³⁶ Dɛn beg Jizɔs fɔ mek di sik pipul dɛn tɔch di bɔtɔm pat pan in klos; ɛn ɛni wan we tɔch am, wɛl wantɛm.