Matyu 13 - Krio Fɔs Oli Baybul

Parebul bɔt Wan Fama we Plant Sid

¹ Da sem de de, Jizɔs kɔmɔt usay i bin de, go sidɔm klos Lek Galili fɔ tich.

² Di pipul dɛn we bin gɛda rawnd am bin so plɛnti, dat i go sidɔm insay wan bot. Dɛn bin tinap na di bich.

³ I bin de pul parebul fɔ di pipul dɛn. I se, “Wande ya, wan fama lɛf fɔ go plant sid.

⁴ As i de skata di sid, sɔm fɔdɔm na di rod, ɛn bɔd kam it dɛn.

⁵ Sɔm fɔdɔm na ston ston usay bɛtɛ dɔti nɔ de. Di smɔl dɔti we bin lib de mek di sid bɔs kwik,

⁶ bɔt wɛn di san wam, di plant dɛn wida, bikɔs dɛn rut nɔ bin go dɔŋ gud insay di dɔti.

⁷ Sɔm fɔdɔm na chuk chuk bush, di chuk chuk bush gro ɛn kɔba di plant dɛn.

⁸ Bɔt sɔm sid fɔdɔm na gud grɔn, ɛn di plant dɛn bia: sɔm bia ɔndrɛd, sɔm bia siksti, ɛn sɔm bia tati.”

⁹ Nain Jizɔs se, “Udat gɛt yes fɔ yɛri, mek i yɛri.”

Wetin di Parebul dɛn Min

¹⁰ Di lanin bɔy dɛn go mit Jizɔs ɛn aks am se, “Wetin du yu de pul parebul fɔ lan di pipul dɛn?”

¹¹ Jizɔs ansa dɛn se, “Gɔd dɔn gi una di chans fɔ no di sikrit tin we ɔda pipul nɔ no bɔt in rul.

¹² Di pɔsin we sabi sɔntin, Gɔd go mek i sabi mɔ ɛn mɔ; bɔt di pɔsin we nɔ sabi natin, di lili bit we i sabi sɛf, Gɔd go pul am nain ed.

¹³ Di rizin we mek a de pul parebul fɔ tich dɛn, nain dis: dɛn de luk, bɔt dɛn nɔ de si; dɛn de lisin, bɔt dɛn nɔ de yɛri ɛn dɛn nɔ de ɔndastand.

¹⁴ So dɛn dɔn mek wetin Ayzaya bin tɔk, bi tru, wɛn i bin se, Gɔd se, ‘Di pipul dɛn go yɛri, bɔt dɛn nɔ go ɔndastand, Dɛn go luk gud, bɔt dɛn nɔ go si,

¹⁵ bikɔs dɛn nɔ de tink, ɛn dɛn dɔn dɛf dɛn yes, ɛn blɛn dɛn yay. If dɛn nɔ bin du dat, dɛn bin fɔ de si, dɛn bin fɔ de yɛri, dɛn bin fɔ de ɔndastand. Dɛn bin fɔ tɔn to mi ɛn a bin fɔ mɛn dɛn.’

¹⁶ “Bɔt una gɛt blɛsin we una de si ɛn una de yɛri.

¹⁷ A de tɛl una fɔ tru se, plɛnti prɔfɛt ɛn plɛnti Gɔd pipul bin want fɔ si ɛn yɛri dɛn tin we una de si ɛn yɛri, bɔt dɛn nɔ si ɛn yɛri dɛn.

Jizɔs Tɛl dɛn Wetin di Parebul bɔt di Fama we Plant Sid, Min

¹⁸ “Una lisin, a de tɛl una wetin di parebul bɔt di fama we plant sid, min.

¹⁹ Dɛn pipul we yɛri, bɔt dɛn nɔ ɔndastand wetin a tɛl dɛn bɔt Gɔd in rul, jɛs tan lɛkɛ dɛn sid we fɔdɔm na di rod. Setan kam pul di wɔd we bin de na dɛn at.

²⁰ Dɛn sid we fɔdɔm na ston ston na dɛn pipul we gladi fɔ biliv di wɔd jɛs dɛn yɛri am so.

²¹ Bɔt di wɔd nɔ sidɔm gud na dɛn at, dɛn biliv fɔs, bɔt i nɔ las. Bikɔs dɛn bin biliv mi wɔd, pipul mek dɛn sɔfa, so dɛn tap fɔ biliv di wɔd.

²² Dɛn sid we fɔdɔm midul chuk chuk bush na dɛn wan we yɛri di wɔd bɔt mi, bɔt di waala ɛn di jɛntri we dɛn want na dis wɔl kil di wɔd na dɛn at, dat mek dɛn nɔ du plɛnti tin fɔ Gɔd.

²³ Di sid dɛn we fɔdɔm na gud grɔn na dɛn wan we yɛri ɛn ɔndastand di wɔd bɔt mi. Dɛn pipul de tan lɛkɛ plant dɛn we bia: sɔm bia wan ɔndrɛd, sɔm siksti, ɛn sɔm tati.”

Di Parebul bɔt dɛn Gras

²⁴ Jizɔs pul ɔda parebul fɔ dɛn se, “Gɔd in rul tan lɛkɛ we wan man plant gud sid nain fam.

²⁵ Wan nɛt we ɔlman de slip, pɔsin we nɔ lek am go plant gras pan di gud sid we di man dɔn plant, dɔn i go we.

²⁶ Wɛn di plant dɛn dɔn gro ɛn bigin bia, pipul si se gras miks pan di wit.

²⁷ Di man we gɛt di fam in bɔy dɛn go aks am se, ‘Masta, nɔto gud sid wi bin plant na yu fam? Aw gras manej gro de?’

²⁸ Di man ansa dɛn se, ‘Na pɔsin we nɔ lɛk mi du dat.’ Di bɔy dɛn aks am se, ‘Yuwant mek wi rut di gras kɔmɔt?’

²⁹ Di masta se, ‘Nɔ, o, sɔntɛm we una de rut di gras, una go mistek rut di wit insɛf.

³⁰ Una lɛ di wit ɛn di gras gro sote di tɛm rich fɔ kɔt di wit. Da tɛm de, a go tɛl di wokman dɛn we de kɔt di gud plant dɛn fɔ pul di gras fɔs, ɛn tay dɛn bay bɔndul ɛn bɔn dɛn; dɔn a go tɛl dɛn fɔ gɛda di gud plant dɛn ɛn put dɛn na sto.’”

Di Parebul bɔt di Mɔstad Sid

³¹ Jizɔs pul ɔda parebul fɔ dɛn, i se, “Gɔd in rul tan lɛkɛ we man tek mɔstad sid ɛn plant am nain fam.

³² Mɔstad sid na di sid we smɔl pas ɔl di ɔda sid dɛn, bɔt wɛn i gro, i de big pas di ɔda smɔl tik dɛn. I de tɔn to big tik, so dɛn bɔd dɛn kin bil dɛn os pan di an dɛn.”

Di Parebul bɔt di Yist

³³ Jizɔs pul ɔda parebul fɔ dɛn, i se, “Gɔd in rul tan lɛkɛ we uman tek smɔl yist ɛn miks am wit wan kitul flawa sote di do fɔ mek bred rayz.”

Wetin Mek Jizɔs Pul Parebul

³⁴ Jizɔs pul parebul fɔ tɛl di pipul dɛn ɔl dɛn tin ya, i nɔ tɛl dɛn natin we nɔto parebul i tek tɔk am.

³⁵ I bin de pul parebul, so dat wetin di prɔfɛt bin tɔk go bi tru, we i se, “I go pul parebul wɛn i de tɔk to di pipul dɛn. I go tɛl dɛn bɔt di tin dɛn we dɛn nɔ bin no frɔm di tɛm we di wɔl bigin.”

Jizɔs Tɛl dɛn Wetin di Parebul bɔt di Gras Min

³⁶ Wɛn Jizɔs lɛf di krawd ɛn go na os, in lanin bɔy dɛn go aks am se mek i tɛl dɛn wetin di parebul bɔt di gras na di fam min.

³⁷ Jizɔs se, “Mɔtalman Pikin na di man we plant di gud sid.

³⁸ Di fam na di wɔl, di gud sid na di pipul dɛn we Gɔd de rul, ɛn di gras na di pipul dɛn we Setan de rul.

³⁹ Ɛn di pɔsin we nɔ lɛk di man we gɛt di fam, ɛn we plant di gras na Setan. Di tɛm we dɛn kɔt di plant dɛn na di tɛm we di wɔl go dɔn, ɛn di wokman dɛn we de kɔt di plant dɛn na di enjɛl dɛn.

⁴⁰ Jɛs lɛkɛ aw dɛn gɛda di gras ɛn bɔn am na faya, na di sem tin go bi di tɛm we di wɔl go dɔn.

⁴¹ Mɔtalman Pikin go sɛn in enjɛl dɛn fɔ pul dɛn pipul we de mek pipul sin ɛn dɛn wan we de du bad, kɔmɔt to dɛn pipul we Gɔd de rul.

⁴² Ɛn di enjɛl dɛn go trowe di bad pipul dɛn na ɛl faya, ɛn dɛn go kray bita wan ɛn bɛt dɛn tɔŋ.

⁴³ Di pipul dɛn we tret na Gɔd in yay go shayn lɛkɛ di san na di say we Gɔd, we na dɛn Papa we de na ɛvin, de rul. Udat gɛt yes fɔ yɛri, mek i yɛri.

Di Parebul bɔt di Gud Tin we dɛn Ayd na Grɔn

⁴⁴ “Gɔd in rul tan lɛkɛ we pɔsin fɛn gud gud dia tin we dɛn bɛr na grɔn, ɛn wɛn i fɛn am, i ayd am bak; i bin so gladi dat i go sɛl ɔl in prɔpati ɛn tɔn bak go bay di grɔn we dɛn ayd dis gud gud dia tin.

Di Parebul bɔt di dia fayn Bid

⁴⁵ “Igen, Gɔd in rul tan lɛkɛ we pɔsin de luk fɔ dia tin we tan lɛkɛ fayn fayn bid.

⁴⁶ Wɛn i si wan we dia pasmak, i go sɛl ɔl in prɔpati ɛn bay am.

Di Parebul bɔt di Fishin Nɛt

⁴⁷ “Semwe so, Gɔd in rul tan lɛkɛ fishin nɛt we pipul sɛn na wata, ɛn i kech ɔl kayn fish.

⁴⁸ Wɛn di nɛt ful, dɛn drɔ am kam na bich, dɔn dɛn sidɔm fɔ pik di gud fish, ɛn put dɛn na blay; dɛn trowe di fish we nɔ gud.

⁴⁹ Na so i go bi di tɛm we di wɔl go dɔn, di enjɛl dɛn go gɛda dɛn bad pipul pul dɛn kɔmɔt to di wan dɛn we de du wetin Gɔd want,

⁵⁰ ɛn dɛn go sɛn di bad pipul dɛn go na ɛl faya, dɛn go kray bita wan ɛn bɛt dɛn tɔŋ de.”

Di Nyu ɛn di Ol

⁵¹ Jizɔs aks dɛn se, “Una ɔndastand di parebul dɛn we a bin pul fɔ una?” Dɛn ansa, “Yɛs!”

⁵² I se, “Ɛni Ju Lɔ ticha, we dɔn lan di tru tin bɔt Gɔd in rul, tan lɛkɛ jɛntri man we de pul dɛn ol ɛn nyu tin kɔmɔt nain sto.”

Dɛn Nɔ Want Jizɔs na Nazarɛt

⁵³ Wɛn Jizɔs dɔn tɔk wetin i bin de tɔk, i kɔmɔt na di ples.

⁵⁴ I go bak nain tɔŋ we nem Nazarɛt. I bigin tich na di Ju mitin os ɛn di pipul dɛn we yɛri am, wɔnda. Dɛn se, “Usay dis man gɛt dis sɛns, ɛn di pawa fɔ du dɛn wɔndaful wok ya?

⁵⁵ Nɔto da kapinta in pikin? Meri nɔto in mama, ɛn nɔto Jems, Josɛf, Saymɔn ɛn Judas dɛn brɔda?

⁵⁶ In sista dɛn ɔl nɔ de na ya? Usay in gɛt ɔl dis sɛns ɛn pawa fɔ du dɛn wɔndaful wok ya?”

⁵⁷ So di pipul dɛn nɔ bin want Jizɔs fɔ de wit dɛn. Jizɔs tɛl dɛn se, “Prɔfɛt nɔ gɛt rɛspɛkt nain yon tɔŋ ɛn in yon fambul dɛn nɔ rɛspɛkt am, bɔt ɔda pipul rɛspɛkt am.”

⁵⁸ Bikɔs di pipul dɛn nɔ bin biliv pan am, Jizɔs nɔ du plɛnti wɔndaful wok na da ples de.