Matyu 11 - Krio Fɔs Oli Baybul

Jɔn we de Baptayz Sɛn Mɛsenja dɛn Go to Jizɔs

¹ Wɛn Jizɔs dɔn tɛl in twɛlv lanin bɔy dɛn wetin dɛn fɔ du, i kɔmɔt de ɛn go na dɛn tɔŋ we de na Galili fɔ tich ɛn tɛl pipul di Gud Nyuz.

² Wɛn Jɔn, we bin de na jel, yɛri bɔt di tin dɛn we Jizɔs de du, i sɛn in lanin bɔy dɛn to Jizɔs,

³ dɛn aks Jizɔs se, “Na yu na di pɔsin we bin fɔ kam, ɔ wi fɔ stil de luk rod fɔ ɔda pɔsin?”

⁴ Jizɔs ansa se, “Una tɔn bak go tɛl Jɔn ɔl wetin una yes yɛri ɛn wetin una yay si:

⁵ dɛn pipul we bin blɛn, de si; dɛn wan we nɔ bin ebul waka, de waka; dɛn wan we bin gɛt bad sik na dɛn skin, dɔn wɛl; dɛn wan we bin dɛf, dɔn yɛri; dɛn dayman dɔn gɛt layf bak; ɛn dɛn po pipul dɔn yɛri di Gud Nyuz.

⁶ Dɛn wan we nɔ de dawt mi gɛt blɛsin.”

⁷ As Jɔn in lanin bɔy dɛn de go, nain Jizɔs bigin tɛl di pipul dɛn bɔt Jɔn, i se, “Wɛn una bin go mit Jɔn na di dɛzat, wetin una bin abop fɔ si? Una bin want si gras we de trimbul we briz de blo?

⁸ Wetin una bin go luk? Na man we drɛs wit fayn klos? Na kiŋ os dɛn pipul we drɛs fayn kin de!

⁹ Una tɛl mi, wetin una bin go luk? Na prɔfɛt? Ɛn una si pɔsin we pas prɔfɛt fawe, fɔ tru.

¹⁰ Jɔn na di pɔsin we dɛn bin rayt bɔt na Gɔd in Buk se, ‘Gɔd se, A go sɛn mi mɛsenja we go go bifo yu, fɔ klia di rod rɛdi fɔ yu.’

¹¹ A de tɛl una fɔ tru se, Jɔn we de baptayz, pas ɔlman we bin dɔn kam na wɔl bifo am. Bɔt di pɔsin we gɛt lili rɛspɛkt pas ɔl dɛn wan we Gɔd de rul, pas Jɔn.

¹² Frɔm di tɛm we Jɔn we de baptayz tɛl pipul bɔt Gɔd in rul, sote naw, dɛn bad pipul de fɛt fɔ siz Gɔd in rul.

¹³ Frɔm di tɛm we Gɔd mek di wɔl sote di tɛm we Jɔn kam, ɔl di prɔfɛt dɛn ɛn di Lɔ we Gɔd gi Mozis tɔk bɔt Gɔd in rul;

¹⁴ ɛn if una gri fɔ biliv di mɛsej we dɛn tɛl una, Jɔn na di man we dɛn prɔfɛt bin dɔn tɔk bɔt we dɛn se Ilayja go kam bak.

¹⁵ Udat gɛt yes fɔ yɛri, mek i yɛri!

¹⁶ “Wetin a go se dɛn tide pipul ya tan lɛkɛ? Dɛn tan lɛkɛ pikin dɛn we sidɔm na trit de ple, ɛn de ala kɔl dɛn kɔmpin se,

¹⁷ ‘Wi bit drɔm fɔ una, bɔt una nɔ dans! Wi siŋ bɛrin siŋ fɔ una, bɔt una nɔ kray!’

¹⁸ Wɛn Jɔn bin de wit una, i bin de fast ɛn i nɔ bin de drink wayn, bɔt ɔlman se, ‘Jɔn gɛt dɛbul!’

¹⁹ Wɛn Mɔtalman Pikin kam, i it ɛn drink wit pipul, bɔt dɛn se, ‘Una luk awaŋɔt ɛn drɔnkɔman, i mek padi wit dɛn pipul we de gɛda taks ɛn dɛn Ju pipul we nɔ de kip di Ju Lɔ aw dɛn fɔ kip am.’ Di tin dɛn we pɔsin de du go sho if na Gɔd in sɛns i tek du dɛn.”

Dɛn Tɔŋ we di Pipul dɛn Nɔ Biliv Gɔd

²⁰ Jizɔs tɔk traŋa wan pan di pipul dɛn we bin de na dɛn tɔŋ we i du plɛnti wɔndaful wok pas ɔl, i tɔk pan dɛn bikɔs dɛn nɔ gri chenj ɛn lɛf fɔ du bad.

²¹ I se, “Bad tin go mit una ɔl we de na Kora zin ɛn Bɛtsayda. If pɔsin bin du dɛn wɔndaful wok we a bin du na una ples, na Taya ɛn Saydɔn, di pipul dɛn we lib de bin fɔ dɔn lɛf fɔ du bad lɔntɛm, ɛn dɛn bin fɔ wɛr bag ɛn rɔb asis pan dɛnsɛf, fɔ sho se dɛn dɔn lɛf fɔ du bad!

²² A de tɛl una fɔ tru se, di de we Gɔd go jɔj ɔlman na wɔl, i go sɔri fɔ Taya ɛn Saydɔn pas una.

²³ Ɛn una we de na Kepanyɔm, wetindu una fil se una gɛt pawa pas ɔl di ɔda tɔŋ dɛn? Gɔd go sɛn una ɔl go ɛl! If a bin du dɛn wɔndaful wok we a du na una ples, na Sɔdɔm, dɛn wok de bin fɔ de sote tide.

²⁴ A de tɛl una fɔ tru se, di de we Gɔd go jɔj ɔlman na di wɔl, i go sɔri fɔ Sɔdɔm pas una.”

Una Kam Blo to Mi

²⁵ Da sem tɛm de Jizɔs se, “Papa, yu we na Masta na ɛvin ɛn dis wɔl! A tɛl yu tɛnki bikɔs yu dɔn sho pikin dɛn we nɔ sabi natin, dɛn tin we yu ayd pan di wan dɛn we gɛt sɛns ɛn lan plɛnti tin.

²⁶ Lɛ i bi so, Papa, bikɔs na so yu want.

²⁷ “Mi Papa dɔn gi mi pawa oba ɔltin. Nɔbɔdi nɔ sabi Gɔd in Pikin pas di Papa wangren; nɔbɔdi nɔ sabi di Papa pas in Pikin wangren, ɛn ɛnibɔdi we di Pikin pik fɔ tɛl bɔt di Papa.

²⁸ “Una kam to mi, una ɔl we dɔn taya fɔ tot ebi lod, a go pul di lod kɔmɔt pan una ed, mek una go blo.

²⁹ Una opin una at fɔ di tru tin dɛn we a de lan una, ɛn una lan ɔl wetin a de tɛl una, bikɔs a de bia wit una ɛn a nɔ de tɔk pan una; if una du dat, una go blo.

³⁰ Dɛn tin we a de lan una nɔ at fɔ lan ɛn dɛn tin we a de gi una fɔ du nɔ at fɔ du.”