Malakay 3 - Krio Fɔs Oli Baybul

¹ PAPA GƆD Ɔlmayti se in de sɛn wan mɛsenja we go mek shɔ se ɔltin ɔrayt fɔ am dɔn dɛn go si PAPA GƆD lɛk aw dɛn de luk fɔ am as i go kam nain os; nain na di mɛsenja we dɛn wan fɔ si bikɔs we in kam i go mek shɔ se dɛn kip in Kɔvinant.

² Udat go ebul go ebul bia wetin go apin wɛn i go kam. Bikɔs i tan lɛk di faya we gold ɛn silvasmit de yus ɛn go klin yu lɛk wɔshman waytɛks..

³ I go tan lɛk silvasmit bikɔs i go sidɔm fɔ de mek pipul klin bifo PAPA GƆD. I go mek Livay in bɔypikin dɛn klin lɛkɛ aw dɛn de klin gold ɔ silva te dɛn ebul fɔ de gi di rayt kayn prɛzɛnt ɔ sakrifays to PAPA GƆD.

⁴ Da tɛm de PAPA GƆD go gladi fɔ wetin dɛn de gi am lɛk fɔs.

⁵ I se na da tɛm de in go pas in jɔjmɛnt pan ɔl dɛn wan we de lukgrɔn fɔ pipul, dɛn man we de kip pipul wɛf dɛn, dɛn wan we de fɔ lay pan pipul, dɛn wan we nɔ de gri pe wokman aw dɛn fɔ pe am, dɛn uman we dɛn man dɔn day ɛn dɛn pikin we nɔ gɛt papa; i go ivin jɔj dɛn wan dɛn we de buli fɔrina ɛn dɛn nɔ de fred in we na PAPA GƆD Ɔlmayti.

Dɛn Fɔ De Pe Tayth

⁶ I tɛl dɛn se, bikɔs in we na PAPA GƆD nɔ de chenj, in nɔ dɔn fɔ dɛn we na Jekɔb in jɛnareshɔn yet.

⁷ I se frɔm we dɛn fɔstɛm-papa dɛn de nain dɛn nɔ de du wetin i want. So, if dɛn tɔn bak fɔ du wetin i want, insɛf we na PAPA GƆD Ɔlmayti go du wetin i fɔ du fɔ dɛn. Bɔt dɛn de aks wetin dɛn fɔ du fɔ tɔn bak to PAPA GƆD.

⁸ So insɛf aks am if dɛn go tif PAPA GƆD lɛk aw dɛn de du. Dɔn dɛn aks am bak aw dɛn de tif PAPA GƆD. I tɛl dɛn se, dɛn de tif PAPA GƆD we dɛn nɔ de pe tayth ɛn we dɛn nɔ de gi am di kayn prɛzɛnt ɔ sakrifays we i fit fɔ gɛt.

⁹ I se dat go mek di wanol neshɔn alaki.

¹⁰ I se dɛn fɔ briŋ ɔl dɛn tayth kam na PAPA GƆD in os ɛn natin nɔ fɔ lɛf, so dat it go de de fɔ pipul dɛn; ɛn we dɛn du so, dat go bi fɔ si if PAPA GƆD Ɔlmayti nɔ go opin di winda dɛn na ɛvin ɛn sɛn blɛsin kam dɔŋ.

¹¹ PAPA GƆD Ɔlmayti se i nɔ go mek dɛn tin we de kɛr dɛn mɔni go, kɛr dɛn go. Dɛn tik dɛn go bia frut ɛn dɛn go gɛt wayn fɔ drink.

¹² PAPA GƆD Ɔlmayti se ɔl di ɔda neshɔn dɛn go se dɛn gɛt blɛsin bikɔs ɔlman we tap na di land go gladi.

¹³ Dɛn dɔn tɔk bad tin dɛn bɔt PAPA GƆD bɔt dɛn de aks PAPA GƆD uskayn bad tin dɛn tɔk.

¹⁴ PAPA GƆD sɛf mɛmba dɛn se, dɛn dɛn tɔk se dɛn de westɛm fɔ du wetin PAPA GƆD want. Dɛn nɔ gɛt natin fɔ bɛnifit if dɛn de sho PAPA GƆD Ɔlmayti se dɛn sɔri.

¹⁵ Frɔm da tɛm de, dɛn de luk se, pipul we de kak gɛt blɛsin ɛn udat de du bad, bɛtɛ kin de fala am dɔn ɛnitɛm we dɛn tray PAPA GƆD, dɛn kin ebul rɔnawe pan in pɔnishmɛnt.

¹⁶ Dɛn di wan dɛn we de fred PAPA GƆD tɔk to dɛnsɛf ɛn PAPA GƆD yɛri wetin dɛn se, so i opin wan buk usay i rayt dɛn wan we de fred am dɛn nem, so dat i go de mɛmba se na dɛn de tink bɔt am.

¹⁷ PAPA GƆD Ɔlmayti se na dɛn go bi in yon pipul. I go gi dɛn spɛshal tritmɛnt wɛn i kam fɔ jɔj. I nɔ go mek pin sɛf krach dɛn lɛk aw nɔmɔ man we in bɔypikin de wok fɔ am, nɔ go mek natin du am.

¹⁸ Dat tɛm de, dɛnsɛf go no udat de waka tret wit PAPA GƆD ɛn udat nɔ de du wetin i fil fɔ du, bitwin udat de du wetin PAPA GƆD want ɛn udat nɔ de du wetin PAPA GƆD want.