Malakay 2 - Krio Fɔs Oli Baybul

¹ PAPA GƆD gi di man dɛn we de mek sakrifays fɔ pipul sin dis ɔda.

² I se, if dɛn nɔ lisin to wetin in de se, ɛn nɔ want gi am glori, in PAPA GƆD Ɔlmayti go swɛ dɛn. I nɔ go blɛs dɛn. Di blɛsin we dɛn bin dɔn gɛt sɛf go tɔn swɛ. A dɔn swɛ dɛn ɔlrɛdi bikɔs dɛn nɔ siriɔs pan wetin dɛn de du.

³ I se, in go ala pan dɛn pikin dɛn dɔn di shit we di animal dɛn de pul na dɛn wes, we dɛn de gi am, nain i go put na dɛn fes so dat dɛn nɔ go go bifo am.

⁴ Dat tɛm de, dɛn go no se nain, PAPA GƆD Ɔlmayti sɛn mɛsej to dɛn bikɔs in nɔ wan brok di Kɔvinant we i bin mek wit Livay.

⁵ I se di Kɔvinant we i bin mek wit Livay, na wan we de gi layf ɛn kolat so dat i go fred ɛn rɛspɛkt am; ɛn Livay bin gɛt dɛn as i bin gɛt fred ɛn de tinap fɔ am ɔlsay.

⁶ I se, Livay na bin pɔsin we de tɔk wetin tru fɔ du ɛn i nɔ bin miks pan lay. I bin de du wetin go gi pipul kolat ɛn bin de waka tret wan wit PAPA GƆD ɛn nɔ de ple wit sin.

⁷ PAPA GƆD Ɔlmayti se, man we de mek sakrifays fɔ pipul sin fɔ de tɔk tin we go gi pipul sɛns, ɛn pipul fɔ de go to am fɔ advays.

⁸ I se bɔt di man dɛn we de mek sakrifays fɔ pipul sin, dɔn lɛf wetin dɛn fɔ du, dɛn dɔn lɛ pipul dɛn rɔŋ PAPA GƆD wit dɛn advays, ɛn dɔn nɔnsɛns di Kɔvinant we Livay bin mek.

⁹ Dat mek bikɔs dɛn nɔ de trit ɔlman di sem, i dɔn mek di pipul dɛn nɔ de luk dɛn wit bɛtɛ yay.

Aw Di Pipul Dɛn Biev To PAPA GƆD

¹⁰ Dɛn aks dɛnsɛf se if nɔto di sem papa dɛn gɛt ɛn if nɔto di wan PAPA GƆD mek dɛn ɔl. Dɛn gri se if na so, dɛn nɔ fɔ ambɔg di Kɔvinant we dɛn fɔstɛm-papa bin dɔn mek.

¹¹ Juda de biev lɛk udat nɔ biliv PAPA GƆD ɛn i dɔn du bad bad tin na Jerusɛlɛm ɛn di wanol kɔntri; i dɔn briŋ shem pan PAPA GƆD in os we i lɛk ɛn mared uman we de wɔship ɔda gɔd dɛn.

¹² Dɛn se mek PAPA GƆD lɛ di wan dɛn we de biev so kɔmɔt na di Izrɛlayt dɛn kɔmyuniti ɔ mek i nɔ ansa dɛn prea ɛnitɛm we dɛn wan gi am sɔntin.

¹³ Ɔda tin we dɛn kin du, na we dɛn de put dɛn kray wata ɛn sho se dɛn sɔri we dɛn de na PAPA GƆD in ɔlta bikɔs i nɔ de tek dɛn prɛzɛnt ɔ sakrifays igen as i nɔ gladi wit dɛn.

¹⁴ Dɛn kin aks wetindu. Bɔt na bikɔs na frɔnt PAPA GƆD dɛn ɛn di uman dɛn we dɛn bin mared we dɛn yɔŋ bin tek vaw, dɔn naw dɛn nɔ bisin bɔt am igen pan ɔl we nain na dɛn mared wɛf ɛn dɛn bin dɔn go tek vaw.

¹⁵ Noto PAPA GƆD mek man ɛn uman wan ɛn ivin gi dɛn in spirit? In rizin na fɔ mek dɛn pikin dɛn bi wan dɛn we go fred ɛn rɛspɛkt PAPA GƆD. So dɛn fɔ tek tɛm ɛn nɔ ple dɛn wɛf dɛn wayo.

¹⁶ PAPA GƆD we na Izrɛl dɛn PAPA GƆD se in et dayvɔs. PAPA GƆD Ɔlmayti se dat tan lɛk we yu de wɛr yu kɔmpin in klos bay fos. So dɛn fɔ tek tɛm ɛn nɔ de ple wayo.

Jɔjmɛnt De De Nia

¹⁷ Dɛn dɔn mek PAPA GƆD taya wit bɔku tɔk, bɔt dɛn de aks se aw dɛn mek i taya. We dɛn de se, if pɔsin du bad sɛf, na gud to PAPA GƆD ɛn i de gladi fɔ am ɛn we dɛn de fil se i nɔ go du dɛn natin.