Malakay 1 - Krio Fɔs Oli Baybul

¹ Dis na di mɛsej we PAPA GƆD gi Malakay fɔ Izrɛl.

Di Lɛk We PAPA GƆD Lɛk Izrɛl

² PAPA GƆD se in bin lɛk Izrɛl. Bɔt dɛn de aks am se aw i lɛk dɛn. I se i wan mek dɛn no se pan ɔl we Isɔ ɛn Jekɔb na brɔda, na Jekɔb in lɛk,

³ bɔt i et Isɔ; dat mek i dɔn lɛf di il dɛn fɔ tɔn ɛmti land we pɔsin nɔ go ebul tap gi wayl animal dɛn.

⁴ If di Idɔmayt dɛn se, ɔl dɛn ples dɛn dɔn pwɛl bɔt dɛn go mek am bak, PAPA GƆD go se ivin if dɛn mek dɛn bak, in go pwɛl dɛn te ɔlman no se na pipul dɛn we PAPA GƆD go vɛks pan sote go gɛt di kɔntri.

⁵ We pipul dɛn we nɔ de na Izrɛl si wetin PAPA GƆD du, dɛn go se PAPA GƆD gud.

PAPA GƆD Tɔk Pan Dɛn Man We De Mek Sakrifays Fɔ Pipul Sin

⁶ I se bɔypikin kin rɛspɛkt in papa dɔn bɔy de rɛspɛkt in masta. I se, so, if dɛn de se in na papa, usay in yon rɛspɛkt de; ɛn if in na masta, usay in rɛspɛkt we i fɔ gɛt go. PAPA GƆD Ɔlmayti se, di man dɛn we de mek sakrifays fɔ pipul sin nɔ gɛt wan rɛspɛkt fɔ am ɛn dɛn nɔ bisin sɛf bɔt in nem.

⁷ I se dɛn de sho se dɛn nɔ rɛspɛkt am we dɛn de bamfa di tin dɛn we dɛn de sakrifays to am. Bɔt dɛn de aks PAPA GƆD aw dɛn de bamfa di tin dɛn, so, i tɛl dɛn se wans dɛn tink se dɛn kin gi am ɛni kayn tin, dɛn nɔ rɛspɛkt PAPA GƆD in tebul.

⁸ I se na bad bad tin fɔ de sakrifays animal we blɛn, we nɔ de waka ɔ we sik. I se if dɛn gi dat to ɛni gɔvna ɔ prɛsidɛnt, if i go gladi fɔ dat.

⁹ I se bɔt dɛn de kam gi PAPA GƆD dɔn dɛn want am fɔ gladi fɔ dɛn, bɔt in PAPA GƆD Ɔlmayti nɔ go gladi wit dɛn fɔ dat.

¹⁰ I se in bin de op se sɔmbɔdi go de we go tɛl dɛn nɔ fɔ wes dɛn tɛm bikɔs in nɔ go tek dɛn sakrifays as i nɔ gladi.

¹¹ PAPA GƆD Ɔlmayti se, frɔm we san grap na mɔnin te di tɛm we i de go dɔŋ, nain in nem big to ɔl di neshɔn dɛn na wɔl ɛn ɔlsay we dɛn de mek sakrifays to am, nɔ kin bi bamfa wan bikɔs ɔl di neshɔn dɛn na wɔl no se in na big PAPA GƆD.

¹² I se dɛn de sho se dɛn nɔ bisin we dɛn de sakrifays bamfa tin dɛn de ɛn dat go lɛ ɔda neshɔn dɛnsɛf nɔ rɛspɛkt am.

¹³ I se, dɛn kin mek se dɛn taya ɛn mek fes pan am, ɛn dɛn kin gi am animal bay we dɛn tek bay fos, ɔ wan we nɔ de waka ɔ i sik as dɛn sakrifays bɔt in nɔ go tek am na dɛn an.

¹⁴ I se, di pɔsin we gɛt animal we natin nɔ du bɔt prɔmis se i go gi PAPA GƆD, go alaki if na di wan we ambɔg i gi, bikɔs PAPA GƆD na Kiŋ ɛn ɔlman na wɔl fɔ fred ɛn rɛspɛkt am.