Mak 9 - Krio Fɔs Oli Baybul

¹ Jizɔs tɛl dɛn se, “A de tɛl una se sɔm pan una we de ya naw, nɔ go day sote dɛn dɔn si Gɔd kam rul na dis wɔl wit pawa.”

Jizɔs Chenj Na Dɛn Yay

² Wɛn siks de pas, Jizɔs tek Pita, Jems ɛn Jɔn go na wan ay il, na dɛn nɔmɔ bin lib de. Wantɛm, Jizɔs in bɔdi chenj bifo di lanin bɔy dɛn yay;

³ in klos sɛf bin wayt pas shatin ɛn i bin de shayn brayt brayt wan, nɔbɔdi na wɔl nɔ ebul bruk klos klin lɛkɛ dat.

⁴ Dɛn di tri lanin bɔy dɛn si Ilayja ɛn Mozis de tɔk wit Jizɔs.

⁵ Pita bigin tɔk to Jizɔs. I se, “Masta, i gud we wi de ya so! Lɛ wi bil tri bafa, wan fɔ yu, wan fɔ Mozis, ɛn wan fɔ Ilayja.”

⁶ Pita nɔ bin no wetin fɔ tɔk, bikɔs in ɛn di ɔda tu lanin bɔy dɛn bin de fred bad.

⁷ Wantɛm wan klawd kam kɔba di san, dɛn yɛri vɔys de tɔk na di klawd se, “Dis na mi Pikin we a lɛk bad, una lisin wetin i de tɛl una.”

⁸ Dɛn luk rawnd kwik, bɔt dɛn nɔ si nɔbɔdi pas Jizɔs in wangren.

⁹ We dɛn kɔmɔt na di ay il go na di tɔŋ, Jizɔs wɔn dɛn nɔ fɔ tɛl ɛnibɔdi wetin dɛn si, bɔt dɛn fɔ wet sote Mɔtalman Pikin dɔn rayz frɔm di grev.

¹⁰ Dɛn nɔ tɛl ɛnibɔdi wetin bi, bɔt dɛn bin de aks dɛn kɔmpin wetin Jizɔs min wɛn i se, “Pɔsin we day go rayz frɔm di grev.”

¹¹ Dɛn aks Jizɔs se, “Wetin mek di Ju Lɔ ticha dɛn se Ilayja gɛt fɔ kam bak na wɔl bifo dɛn tin ya go bi?”

¹² Jizɔs ansa se, “Ilayja mɔs kam ɛn rɛdi ɔltin. Bɔt wetindu dɛn rayt na Gɔd in Buk se Mɔtalman Pikin go sɔfa plɛnti ɛn pipul nɔ go tek am mek natin?

¹³ A de tɛl una se, Ilayja bin dɔn kam, bɔt di pipul dɛn du am wetin dɛn lɛk, ɛn na so dɛn bin dɔn rayt bɔt am na Gɔd in Buk.”

Jizɔs Mɛn Wan Bɔbɔ we Dɛbul de Tɔmɛnt

¹⁴ Wɛn dɛn go mit di ɔda lanin bɔy dɛn, dɛn mit plɛnti pipul gɛda rawnd dɛn, ɛn di Ju Lɔ ticha dɛn de agyu wit di lanin bɔy dɛn.

¹⁵ Wɛn di pipul dɛn si Jizɔs, dɛn ɔl wɔnda bad, dɛn rɔn go mit am ɛn tɛl am kabɔ.

¹⁶ Jizɔs aks dɛn se, “Wetin una bin de tɔk wit di lanin bɔy dɛn?”

¹⁷ Wan pɔsin na di krawd se, “Ticha, a briŋ mi bɔy pikin we dɛbul dɔn tɔn mumu kam to yu.

¹⁸ Ɛnitɛm we di dɛbul kin kam pan am, i kin wap am dɔŋ na grɔn, frɔsh kin de kɔmɔt nain mɔt, i kin de cham in tit ɛn in bɔdi kin stif. A bin beg yu lanin bɔy dɛn fɔ drɛb di dɛbul, bɔt dɛn nɔ bin ebul drɛb am.”

¹⁹ Jizɔs se, “Una dɛn tide pipul ya, una nɔ biliv, aw lɔŋ una want mek a de wit una bifo una go biliv? Aw lɔŋ a fɔ bia wit una? Una briŋ di bɔbɔ kam to mi!” Dɛn kɛr di bɔbɔ go to Jizɔs.

²⁰ Wɛn dɛn de kɛr am go to Jizɔs, di dɛbul wap am dɔŋ wit fiks wɛn i si Jizɔs. Di bɔbɔ fɔdɔm na grɔn, i bigin rol rol ɛn pul frɔsh nain mɔt.

²¹ Jizɔs aks di bɔbɔ in papa se, “Frɔm ustɛm di dɛbul kam insay yu pikin?” Di man se, “Frɔm we i smɔl.

²² Ɛn plɛnti tɛm di dɛbul kin mek i fɔdɔm na faya ɛn insay wata fɔ kil am. If yu ebul fɔ ɛp wi, duya, sɔri fɔ wi ɛn ɛp wi, sa.”

²³ Jizɔs aks di man se, “Wetin du yu aks mi if a ebul mɛn yu pikin? Pɔsin we biliv pan Gɔd ebul fɔ du ɛnitin.”

²⁴ Di pikin in papa ala wantɛm se, “A biliv, sa, duya, ɛp mi fɔ biliv mɔ ɛn mɔ!”

²⁵ Wɛn Jizɔs si se mɔ ɛn mɔ pipul de rɔn kam gɛda rawnd dɛn, i tɔk pan di dɛbul; i se, “Yu dɛbul we de mek pɔsin tɔn mumu, ɛn mek pɔsin dɛf, a de tɛl yu fɔ kɔmɔt insay dis bɔbɔ, ɛn nɔ fɔ go insay am igen!”

²⁶ Di dɛbul mek di bɔbɔ ala big wan, dɔn i wap am dɔŋ na grɔn wit fiks bifo i kɔmɔt insay am. Di bɔbɔ ledɔm na grɔn lɛkɛ dayman ɛn plɛnti pipul tɔk se i dɔn day.

²⁷ Bɔt Jizɔs ol di bɔbɔ in an ɛn ɛp am fɔ grap, di bɔbɔ tinap.

²⁸ Wɛn Jizɔs rich na os, di lanin bɔy dɛn go mit am ɛn aks am se, “Masta, wetindu wi nɔ bin ebul drɛb di dɛbul kɔmɔt insay di bɔbɔ?”

²⁹ Jizɔs ansa se, “Una nɔ go ebul drɛb dɛn kayn dɛbul ya pas una pre.”

Jizɔs Tɔk Igen bɔt In Day

³⁰ Jizɔs ɛn in lanin bɔy dɛn kɔmɔt de ɛn pas insay Galili. Jizɔs nɔ bin want mek ɛnibɔdi no se in lib de,

³¹ bikɔs i bin de lan in lanin bɔy dɛn. I se, “Dɛn go ol Mɔtalman Pikin ɛn an am oba gi pipul we go kil am. I go rayz frɔm di grev di de we mek tri.”

³² Dɛn nɔ bin no wetin Jizɔs min, bɔt dɛn fred fɔ aks am.

Udat Impɔtant Pas Ɔl

³³ Wɛn dɛn rich Kepanyɔm, dɛn go na wan os. Jizɔs aks dɛn se, “Wetin una bin de tɔk we wi de kam na rod?”

³⁴ Dɛn nɔ ansa, bikɔs wɛn dɛn bin de kam, dɛn bin de aks dɛn kɔmpin se uswan pan dɛn impɔtant pas dɛn ɔl.

³⁵ Jizɔs sidɔm, i kɔl di twɛlv lanin bɔy dɛn ɛn tɛl dɛn se, “If ɛni wan pan una want fɔ bi una edman, i fɔ put in yay dɔŋ ɛn wok fɔ una.”

³⁶ Jizɔs tek wan lili pikin, put am midul dɛn ɔl. I tot di pikin nain an ɛn tɛl dɛn se,

³⁷ “Ɛnibɔdi we tɛl pikin lɛkɛ dis fɔ kam nain os fɔseka mi, na mi di pɔsin tɛl fɔ kam nain os; nɔto mi nɔmɔ di pɔsin tɛl fɔ kam nain os, i tɛl di wan we sɛn mi, insɛf fɔ kam nain os.”

Pɔsin we Nɔ De Mekɔp Bad Fɔ Wi, De Fɔ Wi

³⁸ Jɔn se, “Ticha, wi si wan man de tek yu nem drɛb dɛbul. Wi tɛl am mek i lɛf fɔ du dat, bikɔs i nɔ de wit wi.”

³⁹ Jizɔs se, “Una nɔ tɛl am fɔ tap, bikɔs ɛnibɔdi we de tek mi nem du wɔndaful wok, nɔ go tɔk bad bɔt mi wantɛm, wantɛm so.

⁴⁰ Pɔsin we nɔ de mekɔp bad fɔ wi, de fɔ wi.

⁴¹ A de tɛl una fɔ tru se, if ɛnibɔdi gi una wan kɔp wata fɔ drink bikɔs una na mi lanin bɔy dɛn, di pɔsin go gɛt di pe fɔ dat.

Una Nɔ fɔ Mek Ɔda Pɔsin Sin

⁴² “Ɛnibɔdi we go mek ɛni wan pan dɛn mi lili pikin ya sin, i go bɛtɛ fɔ am if dɛn tay big ston nain nɛk ɛn ib am na dip wata.

⁴³ If yu an de mek yu sin, kɔt am kɔmɔt; i go bɛtɛ fɔ mek yu gɛt wan an ɛn gɛt layf we go de sote go na ɛvin, pas fɔ mek yu gɛt tu an ɛn go ɛl we di faya nɔ de ɔt. [

⁴⁴ Da say we wɔrɔm we nɔ de day go it dɛn ɛn faya we nɔ de ɔt go bɔn dɛn.]

⁴⁵ If yu fut de mek yu sin, kɔt am kɔmɔt, i go bɛtɛ fɔ mek yu gɛt wan fut ɛn gɛt layf we go de sote go na ɛvin, pas fɔ mek yu gɛt tu fut ɛn go ɛl. [

⁴⁶ Da say we wɔrɔm we nɔ de day go it dɛn ɛn faya we nɔ de ɔt go bɔn dɛn.]

⁴⁷ If yu yay de mek yu sin, pul am kɔmɔt, i bɛtɛ fɔ mek yu gɛt wan yay ɛn gɛt layf we go de sote go na ɛvin, pas fɔ mek yu gɛt tu yay ɛn go ɛl.

⁴⁸ Da say we wɔrɔm we nɔ de day go it dɛn ɛn faya we nɔ de ɔt go bɔn dɛn.

⁴⁹ “Faya go mek ɔlman klin lɛkɛ aw sɔl kin mek dɛn tin we dɛn de sakrifays, klin.

⁵⁰ “Sɔl na gud tin, bɔt if i nɔ gɛt tes igen, wetin fɔ put pan am fɔ mek i gɛt tes? “Una fɔ mek sɔl de na una layf, so dat una ɔl go gɛt wanwɔd ɛn kol at.”